Onte pula tardica stube alhá.
Na Casa de Trás os Montes e Alto Douro ne l
salimiento de mais un lhibro, i que lhibro “Ditos Dezideiros” (Provérbios
Mirandeses), de l porsor, ambestigador, scritor Amadeu Ferreira.
Ir alhá, a
mais un eibento cultural nua casa que tanto ten dado a la cultura al lhargo de
ls anhos yá mercie la pena, mas tratando-se de mais un salimiento dun lhibro an
mirandés i cua temática que tanto diç a todos ls mirandeses, cumo son ls Ditos
Dezideiros (Provérbios Mirandeses), i screbido por quien fui, anton la
tarde fui d’ouro.
Stubo cinco streilhas la seçon de salimiento, quier
pulas rezones de l lhibro, pulas palabras de ls ouradores, quier pulas palabras
que l outor botou, agradeciu a todos la perséncia, mas quien ten que agradecer
somos nós, nun fusse el, you i cuido que la maiorie que l arrodeaba stabamos
mais probe. Çfrutar de la sue perséncia i de quedar dunho de mais ua obra a la par
de muitas que yá publicou ye anriquecedor.
L star na perséncia
del ye yá un fuorte ansinamiento quier cumo spriéncia de bida, quier quedando dunho
dua mensaige i dun balor patrimonial.
L porsor,
ambestigador, scritor Amadeu quier neste salimiento quier al largo de la sue
bida, pula dedicaçon, pula capacidade intelectual, pula ourganizaçon i relaçon
culas quemunidades mirandesas nun houbo eigual, ansinou, pormobiu, lhançou
semientes por todo quanto ye sítio i quijo arrimar-se a la lhéngua mirandesa.
La proba de todo
esso ye l eisemplo de l’Associaçon Cultural
Recreatiba Nial de la Boubielha (Zenízio) na región de Lisboua i
alredores, que fui atrabeç del, de l amor que ten a las pessonas i a la
cultura, ansinou a ler i screbir mirandés an cursos, spargiu l saber agarrado a
la cultura de la region atrabeç de palhestras, sendo hoije l mirandés atrabeç
de la publicaçon de libros de ls associados, cuontas an sites i blogues ua de
las bertentes mais fuortes andrentro desta quemunidade.
L spácio na casa ye pequeinho para tanta giente
que quijo quemungar mais ua beç de la cumpanhie deste grande amigo, la
sastisfaçon era grande i giral.
Oubrigado amigo por mais este cachico d’ouro.
Que Dius te l pague tanto trabalho i dedicaçon
Un abraço
Faustino Antão
Retratos sacados por Leonardo Antão
3 comentários:
Eicelene reportage Faustino,
Buonas nuites Faustino i António Cangueiro!
Sin tirar mérito al eicelente testo de l Faustino, esta reportaige fotográfica fui feita por mi, cumo bós sabeis . Subre eilha pido, zde yá, çculpa la quien nun gustaba de ser retratado nin d’aparecer ne l facebook.
L'amportante ye cuntinarmos a participar i a acumpanhar Amadeu Ferreira, que ye un eisemplo de la grandeza i l'arte bibir, sabendo bencer ls oustaclos i ls sofrimientos de la bida i, por esso, merece to la nuossa stima i cunsidraçon.
Buonas Fiestas para todos.
Un abraço,
Leonardo
Bien haiades, amigo Faustino, por partilhar esses momentos preciosos que engrandecen a amizade que sentimos todos por Amadeu Ferreira. Muita força e energia para continuar.
Ana Maria
Enviar um comentário