Ende queda l testo screbido hai uns tiempos i salido na
FUOLHA MIRANDESA de l Jornal Nordeste a 23 de Dezembre.
Merecemos ser felizes
Anda se me la cabeça a buoltas sien saber l que dezir. Camina l
remolino de l tiempo cula fuorça que l tiempo ten. Foi “onte” que naci,
Salazar mandaba. Cinquenta i siete anhos se passórun, yá son alguns, mas
assi i todo puodo dezir “onte”. Puodo andar por acá, mais cousa menos
cousa, mais quarenta anhos, chegarie als nobienta i siete. Todos mos
bamos, naide acá se queda. Penso nesto i digo cun to la sinceridade: nun
antendo ls senhores de l denheiro, de l poder, tanta la ganáncia, mas
para quei? Puodan ser gobernantes, ampresairos, tener ilhas, castielhos,
abiones, carros, casas, mulhieres ó homes…., l que lhieban quando se
muorren? Que mimória i feitos acá queda deilhes? Esto nun quier dezir
que nun haba gobernantes i senhores de l dinheiro de muito saber i
einiciatiba, todos nós sabemos que los hai i muitos i inda bien.
Percisamos de buonos gobernantes, buonos políticos, buonos ampresairos.
Quien hoije quier ser político? Ls melhores arrenhégan de la politica
cumo l diabro de la cruç. Todo l mundo sabe todo. Craticar ye mui
fácele. Quédan para mos gobernar ls menos capazes. Cada un de nós puode
se bestir cula piel dun home que ten saber, ganha buono denheiro i ye
hounesto. Cumbídan lo para menistro. El diç que si? Stá buono de ber, a
dezir nó, nun quiero ser menistro. Para quei, ganhar menos i tener la
sue bida sfrangalhada. Esso nun quier dezir que nun tenga que dar, cumo
la lei manda, a coincer todos ls sous bienes i, se los ganhou cun
transparença i hounestidade, nada ten a scuonder.
Ls jornalistas
i ls duonhos de las telebisones, sáben lo mui bien que se tubíren mais
personas a ber telebison, hai mais publicidade i ls ourdenados crécen pa
l drobo ó l triplo. Hai que traier polémicas para agarrar las personas.
Debates i falar de cousas sérias, poner las personas a pensar puode
traier rebuolta i cun esso naide ganha. An beç de rebuolta, eiducar
parece me ser l camino a seguir i que todo l mundo ganharie: ls senhores
de l denheiro, se nun quejíran ser ganaciosos; melhores políticos para
mos gobernar, puis la Democracie siempre ye melhor que la ditadura i
homes mais felizes pula cierta seriemos.
Quando la justícia for
amplacable cun quien s’aporbeita de ls cargos, ls aporbeitadores íban
pensar dues bezes antes de fazer fuosse l que fusse acontra ls denheiros
públicos ó pribados. Ls poderosos nun se senten amenaçados. Ténen
denheiro para pagar la justicia que ls porteje. Tenemos l causo
reciente, l BES, se ls respunsables, atençon tene que haber probas, i
todo andica que las hai, l sítio adonde haberían de star: presos i todos
ls sous bienes sacados para l stado, siempre daba para ancobrir un
nadica l déficete.
A mi lhembra se me la casica pequerrica de la
mie aldé, adonde naci, morei i creci até arrimado a mius binte anhos.
Nun tenie casa de banho, nun tenie un quarto para mi. L aire friu
d’ambierno antraba pulas frinchas, pulas teilhas i assopraba silbando.
Mas alhá fui feliç. Mesmo que ls ricos tubíssen mais denheiro, l bibir
nun era tan çtante.
Ampecei l que arriba screbi antes de salir de
casa. Arrimadas agora que son las cinco de la tarde, stou assentado
andrento de la carruaige de l camboio i l miu pensar zmaçaroca se
delantre dua nina cun sous seis meses a ser mimada por sue mai
aparentando pouco mais de biente anhos. Las dues çfazen se an
cumplicidades: fago te ua festica, dás me un sunriso; dou te ua cantiga,
abanas tou corpico…, nistante se passa l tiempo a mirar para tanta
alegrie.
Nubres, sol, streilhas, ouniberso… cosmos…tiempo que
ruodra sien parar. I nós, homes, mulhieres, cousa tan pequeinha somos…,
para quei tanta mordesquina? Todo se bai i puode ser nun…ai...,
merecemos ser felizes nesses sfregantes TALES…
2014 outubre, 24
Sem comentários:
Enviar um comentário