28/08/14

Ua buona antrada a todos


Depuis de nien sequiera uma semana passada eissencialmente an Sendin (podie haber sido doutra forma, debiemos de haber pensado i ourganizado essas férias doutra maneira mas quien se lhembrou?), uns dies assi i todo que soubirun mesmo bien i que dórun antre outras cousas para reber amigos aqui de l Froles cumo Amadeu antes de todo mas tamien: la mulhier i l filho del, ls dous armanos, ls pais, Mário Correia i Fernanda Chumbo que ye uma prima mie, José Almendra que tamien ye un primo, Antonho Cangueiro i la sue mulhier, i tamien Cristóban Cecílio, Alfredo Cameiron, Dlaide Monteiro i Teresa Almeida que nun bie yá fazie ua eiternidade i cun quien gustei tamien de cumbersar i de poner un cachico mas solo un cachico por falta de tiempo la cumbersa (siempre anterrumpida!) an die...

Uns dies depuis (inda nun hai muito) staba you a matar suidades oulhando esse programa que passa tamien na RTPi i que se chama « Berano Total ».... Ua pessona antrebistada (nun amporta dezir quien era i nien you fixei l nome) dixo a cierta altura qualquiera cousa aparcida cum l que bou tentar dezir agora :

— Ye pena que ls eimigrantes quéden tan pouco tiempo. Dantes quedában mais tiempo i ajudában mais l'eiquenomie nacional an cumparaçon cun agora...

Respundiu-lhe anton un de ls apersentadores desse programa, dando-mos assi tamien l sou parecer a nós ls telespetadores nua brebe anterbençon que achei assi i todo chena de bun senso:
— Mas sabe, ne l resto de l'Ouropa ou mesmo de l Mundo tamien hai crise. Nun ye solo aqui, an Pertual...

Lhembrei-me anton de screbir aqui ne l Froles l que me passa hoije pul alma yá que inda nun me cumbenci a deixar you tamien l miu rastro nesso que se chama Facebook onde naide até agora me puode ber ou ancuntrar…

Fui-me até l site de la RTP (porque inda dou balor a la TB pública an Pertual cumo tamien aqui an França...) i acabo por ler un artigo que me chama l'atençon. Claro que muitos outros me dan tamien l'eideia que muitas cousas inda nun cuorren bien ne l nuosso País (porsores cun salários an atraso, etc. etc.) mas un particularmiente me ancita hoije a screbir uas linhas, talbeç uas linhas tristes, cumo l númaro de zampregados que oumentou de maneira segnificatiba este anho an França, muitos jobes neste país tamien que nun ancuntran facelemente amprego, i esso mesmo que la palabra « eimigraçon » para falar de ls jobes percipalmiente, ls jobes franceses que procuran amprego ne l strangeiro, quaije nun s'amprega ne l país de l persidente Hollande cumo yá era l caso an outros tiempos, preferindo ls franceses, neste caso, la palabra « expatriaçon » cumo se la França tubisse mais ou menos siempre scapado al cuntrairo de muitos outros países a essa tradiçon ancestral de eimigraçon an grande scala que eisistiu quaije desde siempre an Pertual ou noutros países cumo l'Eirlanda, l'Eitália ou mesmo l'Anglatierra...

Chamou-me por acaso l'atençon un pequeinho artigo ne l site de la RTP que quaije zacunselha ls candidatos a l'eimigraçon nesse caso para l Luxemburgo Ber aqui i quien diç l Luxemburgo ye cumo quien diç la França. Nun hai, tengo la certeza, tan grandes defrenças a nible de possebilidades de ancuntrar amprego (an média) entre esse pequeinho país i un país assi i todo bien mais grande cumo la França. Quiero you dezir que la crise stá anton an muitos sítios i cumo dou a antender esse apresentador de l programa "Berano Total" de la RTP: nó apenas an Pertual cumo ne ls outros países tamien.

Dende la necidade de ancuntrar siempre maneira de resuober ls problemas onde eilhes eisisten i nesse caso tamien an Pertual. Hai que ancuntrar soluçones para que cada qual puoda bibir dignamiente a começar ne l rincon adonde naciu... porque senó : passa un ua bida a matar suidades cumo puode, bendo cumo you fago por bezes la RTP i eimages de l nuosso país natal adonde alguns inda sonhan cun bidas mais prósperas an tierras çtantes, tierras onde muitas bezes l eidioma nien ye l mesmo, tierras onde ye neçairo acraditar tamien an algue cousa...

Bah ! Uas palabricas mais alegres para desear a todos ua buona « rentrée » cumo se diç aqui an França. Ua nuoba antrada cun salude antes de todo. Screbi bós tamien i dezi (se esso tamien bos puode fazer bien) algues palabricas, nien que seia para mos ajudar uns als outros i probar que inda stamos bibos... neste jardin de Froles. 

Ana Maria Fernandes

P.S. Nun puode star ne l ancontro de blogers cun muita pena mie. Ye a Tiegui que l querie dezir percipalmiente yá que a Dlaide le cheguei a dezir quando mos ancuntremos an Sendin na altura de la salida de l nuobo libro cun testos de Amadeu.

3 comentários:

Ana disse...

Dei-me de cuonta que habie squecido de nomear tamien Teresa Almeida neste miu testo. Mas yá stá tamien l nome deilha agora. Puis claro que tamien gustei de cumprimentar Teresa. Bien haia a eilha tamien.

Teresa Almeida disse...

Bien haias, Ana. Ye siempre buono trocar uas palabricas cun ls amigos, anque seia por pouco tiempo.
Pena nun teneres stado tamien an Cicuiro cun nós.
Nunca te canses de scrbir nesta lhéngua que tanto mos ancanta!
Beisicos.

Teresa Almeida disse...
Este comentário foi removido pelo autor.