Este bideo fui feito ne l die de ls jogos tradecionales (populares), jogos ourganizados i pormobidos pul'associaçon "Sol Nascente" (Zenízio). Quiero eiqui deixar ls mius parabienes i ua palabrica de muita stima i agradecimiento als eilemientos repunsables destes jogos que son ls sous uorganos, als de la direcion. Oubrigado por mos permitir ua tarde chena d'eimoçon, camaradaige i cumbíbio, a ampeçar ne ls ninos i ninas que ua grande parte deilhes partecipórun pula purmeira beç, até als beteranos que se debáten cun garra i retidon por lhebar un purmeiro lhugar. Sei que trabalhórun durante muito tiempo para que assi acuntecisse, tamien sei que fazeis todo sien mirar a meios, dando l buosso melhor, tamien quiero que sában, que pul miu lhado i de muitos associados i até de la populaçon an giral teneis muita cunsideraçon. Astanho fui un anho cumo hai muito nun se bie, ne l que toca a cunfraternizaçon, lhoubado seia l sfuorço que faziste para que assi acuntecisse, la quemunidade nunca squece quien trabalha, sei que muitas bezes la cumpreençon nun ye muita (ye causo para dezir cada cabeça sue sentença) mas l que amporta ye l resultado a la fin i este ye buono, you digo fui eicelente, assi tengades fuorças i animo para que pa l anho que ben seia eigual ou melhor. La quemunidade Zeníziense, que anda sparbada pul mundo, que nestes scassos dies bai a l'aldé, para alhá matar saludades de la família tamien quien anchir l'alma cun cumbersa i cumbíbios culs demais moradores, i cuido que este ye un bun modo de l fazer. Cun muita ou pouca çputa ne ls jogos la berdade l que amporta ye rebibir, relhembrar las tradiçones de l nuosso pobo. I mirai, que se nun fur assi cada un de nós more alhá ou por fuora perde un cachico de la sue eidentidade. Un Zeníziense ou ua Zenizense quando alhá stá ou ande por esse mundo afuora nun ye solo ua persona ye tamien ua amuostra, un decumiento, ua jinela als outros atrabeç de la sue cultura. L'eidentidade de l nuosso pobo tamien stá feita culas nuossa tradiçones i questumes. Oubrigado a todos por mais esta temporada, agora que stou bien loinge de Zenízio, cuntino a fazer las mies andadas i bien feliç por pertencer a esse pobo. Biba Zenízio. (F.A)
https://www.facebook.com/video.php?v=357160844435900&set=vb.259918887493430&type=2&theater
Sem comentários:
Enviar um comentário