Zde hai uns tiempos para acá, la prostituiçon ye un tema de debate
an França. Nun quieren muitos franceses an relaçon a esse fenómeno de sociedade (outros dirán sien heisitaçon que ye un drama, un flagelo) que la França tome eisemplo na
Almanha ou mesmo até na Spanha. Son esses dous por acaso ls países mais citados
de momento pula cierta por séren países
bezinos i subre l’Almanha hai até quien diga que an matéria de prostituiçon esse
paíç ye l « bordel » de l’Ouropa...
Esta nuite finalmente fui botada ua nuoba lei ou cunjunto de
leis até çtinadas a lutar de maneira mais eificaç contra aqueilho que ye cunsiderado tamien por alguns cumo ua praga de l’houmanidade bielha por bezes cumo l mundo.
Nun se trata a partir de agora de julgar, cumo era muitas bezes inda l caso, las
prostitutas cumo las únicas ou principales respunsables
mas de cunsiderar ua beç para todas (i
aqui stá pula cierta la nobidade desta nuoba lei) que ls berdadeiros respunsables son na realidade "ls clientes", quier dezir: todos aqueilhes (ou
aqueilhas) que págan para que outros homes ou mulhieres satisfágan ls sous
deseios cun atos sexuales, cuntribuindo para fazer de la prostituiçon un tráfego cun
antresses financeiros eibidentes i cun todos ls peligros psicológicos i houmanos
que esse fenómeno tamien repersenta na
medida an que giralmente la prostituiçon puode rapidamente tornar-se ua forma de scrabidon an que ls andibíduos cuorren tamien l risco de perder muita de la sue degnidade.
Quedou decidido anton antre todas las medidas que
fúrun tomadas tentar dar mais apoio inda do que dantes a todas las pessonas que por rezones bárias acában anfeliçmiente por cair na prostituiçon mas subretodo i ye esso que dá agora que falar porque nun era l caso dantes: ua multa de
1500 euros çtinada a penalizar ls andibíduos a cada beç que procúran i acéitan pagar atos sexuales cun prostitutas ou prostitutos mesmo quando estes ou estas son maiores de eidade …
Dua maneira ou doutra stamos delantre dun problema de sociadade sério. Hai que
pensar nestas cousas i todos juntos ajudar a ancuntrar soluçones. Aqueilhas capazes
de porteger siempre ls mais frágeles. Ye un deber. Ye ua obrigaçon.
3 comentários:
Las statísticas amóstran que ls "clientes" son maioritairamiente homes. Talbeç por las mulhieres séren mais facelemente capazes de sentir na piel todo l drama que puode rapidamente repersentar la prostituiçon que transforma maioritairamiente mulhieres tamien an berdadeiras scrabas i bítimas de sociedades predominantemente machistas... Para meditar !
Buonas tardes Ana Marie!
Ye berdade qu'este ye “un porblema de sociadade sério”, cuja ourige stá, para mi, nun solo na crise eiquenómica, mas tamien na maneira superficial cumo ls moços i moças cumbiben cul sexo, na baixa eidade cun que ls ampeçan a fazer sexo i na forma cumo las moças sponen alguas de las partes eróticas de l cuorpo (peitos coixas, barrigas,…) cunduzindo, todo esto, a la banalizaçon i a la comercializaçon de balores tan nobres i perfundos cumo son l sexo i l'amor.
Un abraço,
Leonardo
Enviar um comentário