Hoije torno a fazer l papel de l diabro.
Si, porque
fúrun muitas, son muitas i Dius querga que cuntínen a ser muitas las bezes que
m’alhebanto i bózio, zmascaro las zeigualdades deste paíç, porque l miu génio,
l miu feitiu ye assi, nunca mirei bien las zonestidades, séian eilhas (béngan)
dun lhado ou de l outro, de riba ou de baixo, de giente de bien ou de mal, de
ricos ou probes, sacrafícios para un, sacrafícios para todos, sermos eiguales
ne ls direitos, sermos eiguales ne ls deberes.
Hoije ua de
las cousas que melhor queda, mais justa i mais lhimpa ye lhuitar, lhuitar fazendo
oubir-se na sue rezon i cundiçon, screbindo, acompanhando, stando solidairo, para que
séiamos ua sociadade eigualitaira na justícia, para que l s cidadanos séian
respeitados, na salude para que todos puodan tener dreito a séren recebidos i
tratados ne ls spitales, centros de salude, tener un médico, ne l ansino para
que todos téngan ouportunidades de nas scuolas, ounibersidades recebir de l
mesmo modo esse bien tamanho que ye l saber.
Mas peçque
nien siempre ye assi, cumo to l mundo sabe, fui por ende que ampeçei la mie crónica,
que berdade se diga nun ye fácele ampeçar, quando se quier falar (screbir), fazer
l papel de l diabro (ralhar subre ls pequeinhos, quando tamien l sou), porque
peçque hai ua fuorça andentro de mi que me puxa para scunder, mirar pa l outro
lhado i nun abrir la boca, calhar, nun screbir, nun falar cun naide porque son
armanos, que son pessonas a quien you na tierra nun debo culpar puls pecados
deste mundo. Mas percuro you, será que puodo julgar ls outros que stan bien
alhá riba eiquenomicamente, que fugírun cun cerronadas de dinheiro para fuora,
nun pagórun ampostos al stado, sien tamien mirar aqueilhes que l fázen dun modo
ou de l outro l mesmo i stan a miu lhado!?
Justo, se
quiero ser, tengo que cráticar que stá mal quier uns quier outros, porque se
quiero eisejir a este miu paiç que me deia, las ruas, caminhos, stradas amanhadas,
un centro de salude, un spital, un médico adonde seia recebido, spitalizado, tratado,
ua scuola cun ferramientas, porsores para ansinar i que haba classes, para todo
esto i l mais (que nun cabe nesta crónica) que digo tener dreito, tengo que pagar
ls mius ampostos, nun fujir als mius deberes.
Mas esto ye
guapo de dezir, mas nun passa disso.
Este
deimingo datrás tube d’ir a un spital para besitar ua amiga que fui aconselhada
pul médico a quedar ua sumana an çcanso (mai dua nina, nacida hai un meses) para
ser bijiada. I ende me dei cunta mais ua beç de cumo son las cousas, ua raça (ou
étnia) atopiu l spital a la hora de las besitas. L spácio de ls corredores, de
las salas de besitas, l stacionamiento de ls altemobles, ls corredores, scaleiras
i todo l mais que habie para lhebar pessonas era deilhes, cun modos muitas
bezes que nun son l própio desse lhugar, porque hai giente sufrindo. Son reis i
senhores, quien nun quier que se baia ambora, porque eiqui nun se fala an
dreitos, l dreito ye só deilhes.
I para
deberes, cumo ye? You sei, tu (que lés esta crónica) sabes, eilhes sáben, que
deberes quando toca a pagar ampostos, nien xeta, nun págan un centabo, paga tu i you.
Ls dolientes,
séian eilhes quien fúren, de que raça ou étnie ou sien eilha, quelor, ou crença
ténen dreito a séren tratados, seia adonde fur, eiqui ou ne la fin de l mundo.
Puode, i
tengo que aceitar, que haba giente que diga, este só bei estes cuitados
(naide ye cuitado) só beio ls pequeninos, ls probes, ls mal androjados i squece
que tamien ténen dreito a la bida, nun ye assi, tamien falo ne ls
andenheirados, nua sociadade tamien hai lhobos cul çamarro de cordeiro.
Sem comentários:
Enviar um comentário