24/06/13

Mejadeiro (urinol, mictório, urinal, mijadeiro, mingitório, urinório….)

 
Para mi mejadeiros, ye l nome cierto, para aqueilhes afamados sítios adonde ls homes çpeijan la bexiga, múdan l’auga a las azeitunas, mesmo que an pertués tenga muitos, alguns deilhes bien refinados i afidalgados, you siempre le chamei assi çque ne an 66 de l seclo atrasado cheguei a Lisboua, i fiç bida durante dous anhos no Alfeite, bien acerquita.

Porque anquanto andaba a ser buieiro atrás de l tagalho de canhonas, nun tenie lhugar cierto, nun habie lhugares reserbados als tius, era na hora i adonde mos daba la gaba, a pie d’arble, parede, loija, squina todo serbie, bien ou mal apuntado un debertisse an mijar alto, criar obras d’arte ne l puolo de ls caminos, bandeando dun lhado pa l outro l jato de la cunsuolaçon.

Mas an Lisboua nun era assi, i digo-bos-lo nun hai dúbeda que tenemos que mos rendir al ambentor de tan brilhante eideia, quien nun sabe que ye de las cousas mais gostosas de la bida un alibiar-se, quando stá bien chenico, puoden ouferecir-le todo, la r……. mais buona que sien çcarregar nun bai alhá.

A miu ber ls mijadeiros, nun era solo adonde un çpejaba la tipa, porque apuis de buer uns cacharros (copos), porque antra ten que salir,  por muito que s’aperte, eilhes fúrun l purmeiro facebook de ls homes, nun sei quando fui criado este d’agora, l que sei ye que era ende, nas paredes de ls mijadeiros qu’un ancuntraba tanta i tan buona aformaçon,  éran palabras íntimas, frases sabias, nomes de giente eilustre cun carreira na bida i sien bida na carreira, poesie de la melhor, zbocada i decorada de poetas que assi ganhórun nomeada, lhonas, amboras i calúnias, graburas i dezeinhos de ties qu'éran un spanto, era ende que se mandaba a la m….. ls altos zignatarios de la naçon, se chamában lhadrones a las figuras públicas (que you saba naide fui multado cun 1300€ pul fazer) se chamaba boubo al xefe, claro que na telbison ye mais xique, se daba a conhecer ls amantes i rebelaba quien éran ls xifrudos. Se mandaba trabalhar ls bufos i zgalhaba na dita sociadade amprouada, se çcarregaba toda la rábia de dies de trabalho mal pagos, la rebuolta de nada mudar, i mesmo qu’un dezisse an altos bózios que esta m…. yá nun s’andreita i fusse lhebado als calobouços de la pide, antimado por falar mal de l stado de las cousas, puodie siempre çculpar-se que staba a falar cula sue pix…. 

I falar cun eilha nunca fui proibido, graças a Dius, speramos que assi cuntine, porque nun habendo hoije quaije nanhun mijadeiro, al lhargo de ls anhos las recuntruçones ancarregórun-se de acabar cun estes simbles de la cidade que siempre antendiu ls sous mijadores, mais die menos die mejamos pulas calças abaixo.

I para ancerrar esta mie houmenaige a estes simbólicos sítios, l purmeiro facebook de ls homes, ls mijadeiros (nuca soube se las ties tamien tenien, un buraco para ua cousa i outro pa l’outra) tamien tengo que cunfessar, que éran sítios bien batidos por giente cun modos zbiantes, i apuis dua nuitada pulas casas de la specialidade ne ls afamados bárrios, nun habie pacéncia para naide mos poner a mijar.






3 comentários:

ACangueiro disse...

Antonho Carrasqueiras, bós nun bedes que mejar, alíbiar de augas quando un anda apertado ye cousa que solo quien andube eiqui hai uns anhos por esta nuossa Lisboua puode apreciar. A mi deu-se-me ua risada cun esta buossa cuonta.
Bien pimpona.
Atrás de las carrasqueiras alibían-se outras cousas.

ACangueiro disse...

Antonho Carrasqueiras, bós nun bedes que mejar, alíbiar de augas quando un anda apertado ye cousa que solo quien andube eiqui hai uns anhos por esta nuossa Lisboua puode apreciar. A mi deu-se-me ua risada cun esta buossa cuonta.
Bien pimpona.
Atrás de las carrasqueiras alibían-se outras cousas.

Material Para Construção Marson disse...

Nossa que demais, veja também produtos como Mictório na Marson - Material para Construção Online.