01/06/13

Marrocos







Inda nun hai muito, un familiar que tamien bibe an França i que nun tardará muito an se reformar dixo-me assi :
- Se fusse hoije, nun gastaba l que gastei para fazer casa an Sendin. A tal punto que se m’aparcisse alguien que me disse hoije l que alhá gastei, bendie todo eimediatamiente ! Ampecei a tener este pensar subretodo zde que naciu la mie nieta, hai poucos meses…

I la nieta desse miu familiar naciu an França tal cumo acunteciu yá culs filhos. I todos, neste momento, bíben an França a nun ser ua armana i outros membros de la familha que biben tamien an Pertual…

Ora todo me lhieba a tomar estes testemunhos seriamente an cuonta. Tamien you bibo an França i sei que you tamien tengo ou tenerei que fazer ciertas scuolhas i tomar ciertas decisones…

Por outro lhado, nun ye la purmeira reportaige que beio an França que mostra Franceses que, ua beç na reforma, tóman la decison de ir a bibir ne l Strangeiro, uns meses ou até l anho todo, mas neste caso un de ls çtinos preferidos ye, talbeç até de loinge, un paíç cumo Marrocos. Las rezones, antre outras, son estas:

- Casas, nesse paíç, mais baratas que na Ouropa….
- Un clima mais caliente ne l Ambierno que nun oubriga un a gastar rius de denheiro para se calcer (i l Norte de Pertual, para dar un eisemplo, nun scapa a essa regra)…
- La lhéngua francesa (i nó apenas l árabe) que muitos marroquinos fálan i anténden i que facelita la quemunicaçon cumo tamien l’adaptaçon a outros questumes i a outro ambiente…

Mas puls bistos, hai Pertueses (i Pertuesas !) que tamien se dórun de cunta de las bantaiges de ir a passar parte de l anho de l outro lhado de l streito de Gibraltar. I para ir i benir quando quieren ou le dá la gana, nada melhor que essas casas subre ruodas que son las outocarabanas. Ora subre este assunto, sei un pouco de l que falo porque durante alguns anhos you tamien fui porpietaira dun desses beículos.

Mas para bos dardes de cuonta, bede bós tamien este bíbeo:

Chama-se Maria Amélia, ten 78 anhos i “ Durante cinco meses, até meados de março, instala-se num parque de campismo em Agadir, a sua cidade marroquina preferida ...” eiqui 

  

6 comentários:

leonardo antao disse...

Buonas nuites Ana Marie,

You admiro las straordinárias culidades desta senhora Marie Amélia i l sou gusto pul campismo i pul carabanismo. Al cuntráro deilha, la mie spriéncia an Marrocos fui mui dolorosa.

Nua scurson que fiç an final de Agosto de 2009, caí an Tetuan i bati cul ombro subre l'argola de fierro dua tapadeira de ls sgotos i parti l braço na zona de l'ombro. Çmaieii quando acordei, cun delores horribles pedi ua ambuláncia para ir al Spital i ser assistido pul “Cartão Europeu de Seguro de Doença”. Dezírun-me qu'eilhi nun habie Serbício de Salude, nin ambuláncias nin Médicos i que yá tenien chamado un carro de la cumpanhie de turismo por adonde biajaba para me lhiebar al Spital Ceuta, Spanhol.
Esse carro nun tenie nada para apoio médico i demorou bastante tiempo a ultrapassar la longa fila de carros que stában na frunteira d'antrada an Ceuta, ambaixo dun calor abrasador de 38º i cun muitas delores, an special debido al balouçar de l carro pulas stradas chenas de buracos por adonde me trasportórun até l spital de Ceuta.

Sofri muito até chegar al Spital de Ceuta, adonde fui anestesiado para alebiar las delores i trasportado pa l Spital Melitar an Lisboua adonde fui ouperado al braço squerdo, que se partiu i torceu na zona de l'ombro.

Felizmente la recuperaçon fui rápida i buona, mas nunca squecerei la dolorosa spriéncia porque passei nessa fatídica queda an Tetuan.

Un abraço
Leonardo

Ana disse...

Caro Leonardo,

Caros amigos,

Cumo yá ye un pouco tarde agora, deixo para manhana la respuosta que terei muito prazer an partilhar cun Leonardo.

Mas anquanto i nó, quiero dezir que me dei de cuonta que l BÍDEO que you cunsegui ber hoije pula manhana acerca dessa tie chamada Maria Amélia Fernandes yá nun stá an linha a estas horas, ne l sítio de la rebista Visão. L que ye stranho i pena al mesmo tiempo porque fui subretodo esse bídeo (mais inda que l artigo) que a mi me motibou a screbir este testo. Achei essa pessona de 78 anos straordinaira. Inda stube a fazer alguas tentatibas para ber se ancuntraba outra beç esse bídeo mas por anquanto nun l ancuntrei.
Se alguien cunseguir ou soubir cumo fazer, que mos anforma i diga tamien qualquiera cousa.

Buonas nuites

leonardo antao disse...

Buonas nuites Ana Marie,

Renbiei-te agora, por email, esse bídeo, "L Ban de a mie abó " L'alegrie de bibir dua senhora de 78 anhos ....Un testemunho guapo! Ua mulhier de fibra, mai de 6 filhos, bibe na Gafanha de la Nazaré, ó melhor, bibe nua "Ban" correndo l mundo.

Un abraço
Leonardo

Ana disse...

Quien speraba, Leonardo ?!

Dais-mos la proba que sodes un perito an anformática! Cun specialistas cumo bós, la lhéngua mirandesa mostra que puode ser spierta que you sei alhá !

Mas que pena l que bos acunteciu an Tetuan ! Tendes assi i todo ua bantaige an relaçon a mi, you que nunca tube até agora la suorte de ir até Marrocos mas faç parte esse paíç daqueilhes que un die gostarie de ber. Quantas bezes un nun oubiu falar de Ceuta, de Tânger (dende l nome daqueilha fruta que son las tangerinas), de Casablanca, Marrakech, i perto de Agadir: Essaouira (l’antiga Mogador) adonde parece que hai ua torre parecida cula de Belén an Lisboa...
Acho que tubistes mesmo pouca suorte quando stubistes alhá. You, todas las pessonas que cunheço que alhá stubírun, siempre me dezírun que gustórun. Até colegas franceses mius que chégan a organizar biaiges para las scuolas (carreiras zde l Sul de la França que atrabéssan la Spanha toda i pássan por Gibraltar!).
I l gusto até pegou an familiares mius: sobrinos de Sendin que bíben an França i que stan juntos cun Francesas de ourige marroquina !

Bá, a ber se tenemos la suorte todos de poder apreciar esse paíç nas melhores cundiçones possibles ! Tengo la certeza que esse paíç cumo ls sous habitantes bien l merécen.


leonardo antao disse...
Este comentário foi removido pelo autor.
leonardo antao disse...

Buonas nuites Ana Marie,

Nun sou perito an anformática, mas tengo un filho que ye Angenheiro Anformático i de Cumputadores, i gusta muito de Marrocos i, por esso, ne l passado més de Márcio, el i mais trés amigos, alugórun ua Carabana i percorrírun quaije todas las cidades que referistes no buosso comentairo i ua grande parte de l Paíç, cumo pudeis berificar no email que acabei de bos reambiar.

Apesar de la dolorosa spriéncia porque passei an Tetuan, gustei de l pouco que bi i percorri, por esso recomendei l miu filho que fazisse essa biaige que you gustaba de tener feito nesse anho.

Un abraço
Leonardo