11/02/12

Provérbio Chinês

Se quieres un anho de prosperidade, sembria milho.
Se quieres dieç anhos de prosperidade, planta arbles.
Se quieres cien anhos de prosperidade, eiduca las pessonas.

8 comentários:

Unknown disse...

Çculpa Leonardo, mas nun cuncordo.
Las pessonas nun se eidúcan, respéitan-se.
Quien ye quien para eiducar?
Que ye esso de eiducar?

Abraço
Tiu Almendra

leonardo antao disse...
Este comentário foi removido pelo autor.
leonardo antao disse...
Este comentário foi removido pelo autor.
leonardo antao disse...

Buonas nuites Almendra:

Bós que sodes Porsores sabeis melhor que you respunder a estas questones. Mas permiti-me que faga ua cúrtie reflexon. Ua de las fases mais amportantes de la bida de todas las pessonas ye l que passan nas Scuolas (básica, secundária, ounibersitária, …) a daprendíren cousas, a eiducáren-se, a respeitáren-se, a formáren la cuncéncia de que ser eiducado ye ajudar ls outros culs quales cumbibemos a séren felizes i acraditáren que ye siempre possible daprender mais.

Que ye esso d'eiducar?
Para mi, eiducar ye sembrar eideias (de buona cumbibéncia) tales cumo:
- cumprir ls hourairos (pontualidade, na mie ária melitar ye fundamental);
- nun dezir palabrones, acusaçones,chamar nomes;
- cumprirmos las nuossas tarefas, antregar ls trabalhos a tiempo;
- gustarmos d'eideias nuobas;
-sforçarmos-mos por fazer siempre melhor;
- respeitarmo-mos uns als outros; (…)

Quien ye quien para eiducar?
Para mi, todos nós. La Scuola (Básica, Secundária,…) percisa de giente que nun pense an resultados eimediatos, mas si lhentos, d'apersndizaige de muitas i dibersificadas cousas. Percisa de Porsores (i Pais) que colaboren na formaçon de pessonas cula cuncéncia de que ser eiducado ye ajudar ls outros a zambolber carateristicas protetoras de la sue maneira de bibir.
Todos mos podemos eiducar uns als outros, porque todos sabemos de la “scuola de la bida” que debemos tratar ls outros cumo gustarímos que mos tratassen a nós.

Çculpai se me alonguei demasiado amigo Almendra i mui oubrigado pulas buossas preguntas.

Un abraço amigo
Leonardo

Unknown disse...

Leonardo,
Ser porsor nun ye fácele i muito menos eisercer l'oufício.
Tamien nun ye fácele antender l que debe ser ua scuola i para que debe serbir.
Nas nuossas sociadades, la scuola nun ye mais que ua anstituiçon al serbício de ls antresses de quien manda.
Mas este nun ye sítio para essas çcussones porque nun hai spácio nien tiempo.
Mas cuido que quaije chegueste al eissencial:
"Todos mos podemos eiducar uns als outros, porque todos sabemos de la “scuola de la bida” que debemos tratar ls outros cumo gustarímos que mos tratassen a nós". Ende stá l que debe ser ua scuola, miesmo sien paredes.
"Naide ansina naide, daprendemos uns culs outros".
Muita giente stá acontra la eigreija i la relegion porque nunca antendiu nada. Jasus/Cristo algo que poucos anténden.
Marx, Cunfucio, Pessoa, Saramago... I muitos homes mais...
I Jasus?
Míran para Cristo, la eigreija l crestianismo, la anstituiçon Romana. Probes de sprito, mas tamien deilhes ye l reino de Dius.

Abraço amigo
Tiu Almendra

leonardo antao disse...

Buonas nuites Almendra:

Ye berdade que "Naide ansina naide, daprendemos uns culs outros" i que
“Muita giente stá acontra l'eigreija i la relegion porque nunca antendiu nada”. Assi sendo ye nuossa respunsabelidade, an special de ls mais bielhos, ajudarmos ls mais nuobos a custruir ua bida cuncentrada an balores que mos permitan bibir un stilo de bida houmano i crestiano.
Quales son estes balores? A mi parece-me que son ls que mos ajudan a bibir de buonas relaçones uns culs outros, tales cumo, l respeito, l'amisade, l'hounestidade, la toleráncia, la solidariadade, la generosidade, …, sin squecer l'amor pula natureza, pulas plantas i puls animales.

Abraço amigo
Leonardo

Unknown disse...

Buonas nuites Leonardo,

Cuncordo cun quaije todo, menos cun essa de debedires las pessonas an bielhos i nuobos.
Que ye esso?
Hai ye bibos. Hai pessonas.
Esso de nuobos i bielhos ye relatibo i funciona mais para debedir que ajuntar.
Cada un debe cuntribuir cul que puode i recebir l que percisa.

Abraço
Almendra

leonardo antao disse...

Buonas nuites Almendra:

Gustei desta buossa ouserbaçon, “esso de nuobos i bielhos ye relatibo i funciona mais para debedir qu'ajuntar”, que demunstra que teneis sprito moço, apesar de, tal cumo you, ya tenermos muitos pelos brancos.

Tamien defendo esta filosofie de bida, nun mirar a l'eidade, mas si al spírito de coperaçon antre pessonas, an que “cada un debe cuntribuir cul que puode”, percurando cumprender ls outros, nunca squecendo que “l'eiducaçon anda siempre de manos dadas cula coperaçon” .

Abraço amigo
Leonardo