17/02/12

Guste-se ou nó



Para mi i muita giente, claro stá, que só bou adonde me quieren, adonde me sinta bien, porque nun repersento naide, mas yá nun ye bien assi quando se repersenta un paiç, son ls simbles dua nacion, son la redadeira spráncia de dezir l que stá mal, de rebelar la podridon de las cousas.

La cousa nun stá bien, quando se fuje de las repunsablidades, se tapa las oureilhas, para nun oubir aqueilhes que inda acreditan ne l supremo repersentante dua Nacion, porque cumo l dezírun aquelhes studantes anraibados, mesmo que por bias de l nuosso sistema político el nun seia repunsable pulas decisones de la gobernaçon, ye por fuorça de l cargo oubrigado a oubir aqueilhes que ténen porblemas i que ls gobernates fázen oureilha moucas.

Puode até haber rezones bien fuortes para faltar al ancuontro de jobes dua scuola cumo acunteciu onte, mas que passa a ser un ato de cobardie a esso passa, i nun hai nada que proíba qualquera assi pensar, por esso inda eilhes nun mos tirórun.

Cumo se pode star da bien soutro die, cula cuncéncia serena, l’alma an paç i ua risica na cara, falando culs nuossos i pa l mundo quando se stá an falta, nun se fizo ls deberes i strapulhar por ende afuora.

A quien mos repersenta, an quien depositamos cunfiança, (tenga ou nó l nuosso credito, gustemos ou nó) nun puode star adonde seia todo de la quelor rosa, adonde le déien palmas i acenos de bien benido, dígan i quérgan bien.

Quien mos repersenta, i se diç ser ls oubidos i ls uolhos de todos, ten que ír-se, ber i star, ls barrios de lhata adode nun hai las más eilementares cundiçones dua família criar als filhos, a las scuolas sbarrulhadas, sien materiales d’ansino al friu i a la chúbia, a las aldés adonde ls mais bielhos nun ténen cundiçon dina de poder ír-se al doutor ou spital, a las fabricas adonde se trabalha i nun se recebe, andar pula rue a la nuite para ber quien pide un caldo ou drume nun carton.

Seia este ou qualquiera, home ou mulhier, guapo ou feio, alto ou baixo, nun oubir ls necitados i aqueilhes que quieren dezir de sue justícia, ye mais que pouca bergonha, ye algue que roça la falta de denidade, sien eiducaçon i sien sentido de Stado.

You sei que toda esta mie lhamúria, ten cumo pecado, dezir mal de ls outros, cousa que solo se debie fazer, an cundiçones d’ouportunidade de respuosta, mas noutro sentido tamien l pecado queda assi a modos de sanado, porque zabafei i nun fiç ouféncia cun palabrones nien chamei de nomes.

5 comentários:

Tortulhas disse...

Buonos dies Faustino,

Pertual debe ser l solo paiç de l mundo adonde l Quemandante Supremo de las Fuorças Armadas le fuge i se sconde de dues dúzias de garotos armados cun peligrosos papeles pintados.
Abraço

Ana disse...

Tamien you, Faustino, mesmo ne l strangeiro, bi las eimages desses adolecientes que querien dar a saber a Cabaco, i al Paíç anteiro afinal, que muitas cousas na scuola deilhes inda fázen falta ou anton nun stan bien... Mas el ancuntrou ua çculpa qualquiera i acabou por nun ir...

Yá oubi dezir ende a alguns que esse Persidente nun ten statura para zampenhar un cargo tan amportante cumo esse i you ye tamien l que penso. A tal punto que se preguntardes als Franceses (ou a outros habitantes de outros países de l mundo, tengo la certeza) se sáben pul menos qual ye i cumo se chama l Persidente de la República Pertuesa, poucos, mui poucos mesmo, stou cumbencida anfeliçmente, seran capazes de respunder... Talbeç la culpa nun seia só deilhes... !

Un abraço

leonardo antao disse...
Este comentário foi removido pelo autor.
leonardo antao disse...

Buonas nuites Faustino,

Gustei deste tou zabafo que eibidencia bien que stan a fazer falta gobernantes para lhuitar por un Pertual cun menos zeigualdades, cun menos anjustiças i melhores cundiçones de bida.

An mie oupenion ls bobernantes que deixan de star adonde nun le déien palmas, son solo aqueilhes qu'eisercen l poder cun einorme eirresponsabelidade, ancumpeténcia, arrogáncia i falta de prudéncia.

Muitos de nós santimos-mos atreiçonados por aqueilhes que mos gobernan. Pul “Comandante Supremo” (qu'aliás nun manda nada), porque zapareciu, aparentemente, de la lhuita por melhores cundiçones de bida de l Pobo Pertués, i puls Gobernantes que nun saben l que quieren i nun ténen política para cousa algua a nun ser pa l que manda la “troika”.

Será possible cuntinarmos a aguantar mais este estado de cousas?

Un arrochado abraço,
Leonardo

faustino.antao disse...

Buonos dies

-Gustei muito de ls buossos comentairos, pequeinhos mas bien sclarecedores, eilhes son tamien crónicas de l que bos bai andrento.

- Mas nun hai que zanimar, l pobo un die bai a penheirar todo l que hai de malo, porque por bien feias que stéian las cousas, inda hai muita giente por ende hounesta, i que trabalha de buona fé, pena ye que na quadrilha de ls políticos seia la más pequeinha parte (minoria) porque ne l que toca a gestores, diretores, admenistradores, i todos aqueilhes que ténen an manos decisones inda son la maior parte (maiorie), senó cumo dezie mie mai, balha-mos Dius.

Ajuntando a esses tenemos las associaçones houmanitairas, (feitas por giente boluntaira) berdadeiros eisemplos dua sociadade justa, pedindo, recolhendo i çtribuindo todo l que ls mais necitados percísan, assi fusse an todo i nun teneriemos galatons de probreza.

Un abraço
Faustino