PASSOS COELHO
.
.
L purmeiro-menistro fui apupado i até ansultado por manifestantes, adonde se anclúen sindicalistas, eilemientos dua comisson d'utentes contra las portaiges nas outo-stradas de la region, alguns populares i trabalhadores de la Peugeot Citroen, a la chegada a Goubeia, na Sierra de la Streilha.
Passos Coelho tentou inda chegar a la fala culs manifestantes mas nun cunseguiu. Solo falou cun jornalistas, a quien garantiu que l paíç "nun bai mergulhar an deficuldades inda maiores", debido a la crise.
Ne l percurso, de bárias dezenas de metros, que fizo a pie antre l recinto de la feira de l queiso de la sierra i ua sposiçon d'atebidades eiquenómicas de Goubeia, l purmeiro-menistro dixe "star culas pessonas eisige coraige, eisige bun senso".
"Nós tenemos que saber oubir las pessonas quando las deficuldades son muitas i you sei que las deficuldades son muitas. Nun tengo nanhun porblema an oubir las pessonas, dar-me cunta de las sues deficuldades", sublinhou.
Acrecentou que "l que ye amportante ye que las pessonas sában que l paíç nun bai mergulhar an deficuldades inda maiores, porque nós stamos a cumprir culas nuossas oubrigaçones para puxar l paíç para riba".
"I ye esto que nós tenemos de dezir a las pessonas, tenemos de les dar ua mensaige de sperança i de cunfiança, nun podemos deixar que las pessonas quéden sin hourizontes, sin spetatibas, pa l feturo", salientou.
Passos Coelho declarou inda que ls pertueses "ténen d'acraditar que stá a ser feito l que ye necessairo para que l paíç torne a crecer i a tener amprego"
4 comentários:
El (cun essa cara de anjo) até parece que stá cheno de buona buntade i de buonas antençones mas yá hai cousas que mos surprénden i nó oubregatoriamente ne l bun sentido...
Ultimamente, fúrun declaraçones de l menistro de la defesa por eisemplo que só podien chocar a mais dun : Que las Fuorças Armadas debien oubediéncia total al Stado, por eisemplo… ?! Mas ls melitares, cumo qualquier outro cidadano, son seres houmanos i nó máquinas ! I inda bien que assi ye porque senó nunca habie eisistido l 25 de Abril!
Por esso hai que pensar bien !
Ua de las maiores bitórias de ls regimes democráticos ye cunseguir que las Fuorças Armadas stéien al serbício del Stado i de ls gobernos eileitos democráticamente.
Mario Soares fui l que mais trabalhou para sujeitar l poder militar al cebil.
Ls gobernos eileitos democráticamente ténen l poder que le bino de l boto.
Naide deberie tener lhugar de mando sien ser eleito.
Naide puode amponer las sues eideias als outros.
Naide puode star arriba de las leis.
Solo quien ye de l tou lhado ye que ye sério?
Nun hai lhados, hai giente i naide ye eigual, mas para fazer parte de un Stado hai que respeitar las leis desse Stado i ls outros.
Las guerras cebiles solo son possíbles por haber quien debide las pessonas an lhados.
Nun Stado democrático las çfrências dében ser para somar i nó para debedir.
Pensar bien ye tener amor i nó ódio ne l coraçon i na mente.
Primo,
You solo quis tentar antender cumo ye que ls nuossos países son gobernados, se hai que dezir que todo stá bien ou se pul cuntrairo achamos que se puode ou se debe de fazer melhor.
I será berdade que « naide ye eigual » ?
La respuosta na realidade tanto puode ser « Si » cumo tamien puode ser « Nó » !
De que lhado ye que you me coloco anton ? Só puode ser de l lhado que dá sprança a todos (porque todos percisamos de sprança) i adonde hai trés luzes que mos andícan l berdadeiro camino. Son eilhas : Lhiberdade, Eigualdade i Fraternidade.
Un abraço
Prima Ana,
Stou d'acordo an todo l que screbiste agora.
Para mi tamien essas trés palabras son sagradas. Esse debe de ser l nuosso lhado.
Tamien ye berdade que para alguns la palabra eigual ye dúbea, yá que para eilhes hai uns mais eiguales que outros, bonda que nun le fágan selombra.
Abraço
Enviar um comentário