10/02/12

DÉCIMAS


FRAILE ANTONHO
A CAMINO DE MIRANDA

DÉCIMAS
1
Caminaba Fraile Antonho
Eili pa ls lhados de Bilachana
Cun ua medórra tamanha
Que parcie cousa de l demonho
Mas agarrou-se a Santo Antonho
Que por todo l lhado el anda
Que l ajudasse a chegar a Miranda
Sien prejuízos de monta
I que la cousa quedasse pronta
Sien haber muita purpaganda.
2
Seguiu anton l senhor Fraile
Por caminos i carreirones
Pensando nas sues eilusones
Anquanto la burra pacie ne l balhe
I cumo habie de salir de l baile
Que bie por toda la squina
Lhembrou-se anton de sue nina
I de cousas que habien passado
Naquel tiempo, yá muito atrassado
Quando cunheciu a Delubina.
3
Iba chegando quaije a Miranda
Quando biu anton uns senhores
Montában yá burras cun outros balores
Que yá quemien outras bianda
Homes doutra porpaganda
Por séren senhores de la anquesiçon
Puis que l querien, a el anton
Talbeç l fússen a prender
Sien porquei el saber
Õ talbeç dar-le, só un sermon.
4
Yá apuis a las muralhas
Pensando cun sues botones
Biu tiempos doutras oucasiones
Oubiu bózios de las muralhas
I fui juntando las furfalhas
Passando por Salamanca
Fazendo ua feira franca
Al redor de sue mimória
I fui cumpletando la sue stória
Que yá habie passado tanta tranca.
5
Passou pul huorto de Delubina
Por adonde antraba Antonho Tolés
Que aquel mala rés
Se bie an qualquier squina
A Delubina l quemiu la sardina
I fui Fraile Antonho quien pagou
Que naqueilha hora se lhembrou
I passou todo a peine fino
Delubina terminou sou çtino
Quando de las muralhas s´atirou
6
Fraile Antonho eili quedou
Mirando aqueilhas muralhas
Juntando todas las furfalhas
De la bida que el passou
Anté que a la hora passou
Pulas scaleiras de la Sé
I fui rezando cun muita fé
I tamien cun muita deboçon
Terminando la sue ouraçon
Cun muita curaige i cun fé
7
Antrórun ls Frailes de la anquesiçon
Pa l dáren la bien benida
I dezirun-le lhougo de seguida
Stás preso pu la anquesiçon
De nada te balerá tou sermon
Pensa antes nas cousas feias
Que an Salamanca fazieste a meias
Cun outro lhafrau cumo tu
Passeste-te para barzabu
Sien precisar de candeias
8
Deiqui seguiras tou camino
Para Coimbra irás tu anton
Que la justicia de la anquesiçon
Te marcará l tou çtino
Puoli tenerás, tu l mimo
De outros, cumo tu zafortunados
Que cumo tu séran cundenados
Pula la santa anquesiçon
I bos ansinará l sermon
A todos ls que sois lhebados

José António Esteves
Lar de San Jesé Bumioso

4 comentários:

franciscobelharino disse...

Buonos dies Jesé Antonho,

Guapos ls bersos estes subre l Frei Antonho i sues bidas. Anton cumo bos teneis amanhado cun tanto friu ende por Bumioso?

Un abraço,
Francisco Domingues

franciscobelharino disse...

Buonos dies Jesé Antonho,

Guapos ls bersos estes subre l Frei Antonho i sues bidas. Anton cumo bos teneis amanhado cun tanto friu ende por Bumioso?

Un abraço,
Francisco Domingues

ACangueiro disse...

Tiu Jesé Antonho,

Puis solo bos digo que lestes i agarreste todo de Fraile Antonho. Cuitadica de La Bouba de la Tenerie que solo atamaba sous males culas falas de Frei Antonho.
La SANTA ANQUISIÇON fui madrasta i muitos mandou pa la fogueira.

Abraço,

antonho

José Esteves disse...

Frius porqui ye fruto de l tiempo, Mas nada que nun e puoda aguantar. Até porque agora yá nien bou culas bacas, nien culas canhonas.ye só aguanta-lo eiqui al strafugueiro.

Abraços pals dous,las cousas que se lhabrou ll porsor Amadeu.

José António Esteves