Cousas de las nuobas tecnologies

Un mirandés biaijaba pula purmeira beç d’abion.

Quando se purparaba para passar l boqueiro que fai l’eidentificaçon, oubiu ua bozica benida dun computador dezir:

 

 Bitorino, 50 anhos d'eidade, mirandés scorreito, casado pai de filhos, biaijante de l buolo 5271 de la TAP.

Bitorico quedou de boca abierta i un cacho çcunfiado.

-Mirai bós esta cousa ten manha, adonde se biu saber todo de mi!

Fui-se a la retrete, tirou la gorra, la camisa i tornou a bestir la jiqueta i a passar ne l boqueiro.

Diç la bozica:

 Bitorino, 50 anhos d'eidade, mirandés scorreito, casado pai de filhos, biaijante de l buolo 5271 de la TAP.

Bitorino se staba yá cula pulga atrás de l’oureilha pior quedou, eiqui hai marosca, yá se le afiguraba  haber algua muntada.

Tornou a la retrete, zgrinha-se todo, puso la jiqueta alrobés i bestiu ua saia de tie.

-Agora siempre quiero ber s’essa trampa de máquina inda me conhece!-Sclamou Bitorino.

Tornou a passar ne boqueiro.

La bozica dixo:

 Bitorino, 50 anhos d'eidade, mirandés scorreito, casado pai de filhos, por bias de las sues mariquices yá nun puode ir ne l buolo 5271 de la TAP, porque l abion yá se fui.

LEITURA DE LS LUSÍADAS AN MIRANDÉS

 

 [Retrato de Alcides Meirinhos i Dinis Meirinhos]
 

LEITURA DE LS LUSÍADAS AN MIRANDÉS – DAVID SANTOS (Retrato 056)

David Santos (1999) naciu an Sendin, adonde bibe, cunceilho de Miranda de l Douro. Ye aluno de lhéngua i cultura mirandesa nas scuolas de Sendin. Bemos que David naciu mesmo al fin de seclo XX, ne l anho an que la lhéngua mirandesa se tornou oufecial, fazendo parte de las nuobas giraçones que han de lhebar la nuossa lhéngua até al seclo XXI. I ye un gusto mui grande tener eiqui esta mocidade tan animada cumo David, que acompanhou esta jornada cheno de entusiasmo.

Apersentou se a ler acumpanhado de bários colegas i de l sou porsor de Lhéngua i Cultura Mirandesa, Emílio Martins. Liu las stáncias 80-82 de l Canto IV.

LEITURA DE LS LUSÍADAS AN MIRANDÉS

 

 [Retrato de Alcides Meirinhos i Dinis Meirinhos]

LEITURA DE LS LUSÍADAS AN MIRANDÉS – TATIANA RAPOSO (Retrato 058)

Tatiana Raposo (1998) naciu an Sendin, adonde bibe, cunceilho de Miranda de l Douro. Ye aluna de lhéngua i cultura mirandesa nas scuolas de Sendin. Tatiana Raposo naciu mesmo al fin de seclo XX, ne l anho an que la lhéngua mirandesa fui declarada cumo oufecialpula Assemblé de la República, fazendo parte de las nuobas giraçones que han de lhebar la nuossa lhéngua até al seclo XXII. I ye un gusto mui grande tener eiqui esta mocidade tan animada cumo Tatiana i puodo bos garantir que stube a oubir outra beç la leitura feita por Tatiana i lei que ye un ancanto. Dá gusto!

Apersentou se a ler acumpanhada de bários colegas i de l sou porsor de Lhéngua i Cultura Mirandesa, Emílio Martins. Liu las stáncias 87-90 de l Canto IV.

LEITURA DE LS LUSÍADAS AN MIRANDÉS

[Retrato de Alcides Meirinhos i Dinis Meirinhos]

LEITURA DE LS LUSÍADAS AN MIRANDÉS – INÊS PIRES BRÁS (Retrato 056)

Inês Pires Brás (1999) naciu an Sendin, adonde bibe, cunceilho de Miranda de l Douro. Ye aluna de lhéngua i cultura mirandesa nas scuolas de Sendin. Bemos que tamien Inês Brás naciu mesmo al fin de seclo XX, ne l anho an que la lhéngua mirandesa se tornou oufecial, fazendo parte de las nuobas giraçones que han de lhebar la nuossa lhéngua até al seclo XXI. I ye un gusto mui grande tener eiqui esta mocidade tan animada cumo Inês.

Apersentou se a ler acumpanhada de bários colegas i de l sou porsor de Lhéngua i Cultura Mirandesa, Emílio Martins. Liu las stáncias 83-86 de l Canto IV.

LEITURA DE LS LUSÍADAS AN MIRANDÉS

 

 [Retrato de Alcides Meirinhos i Dinis Meirinhos]
  
 LEITURA DE LS LUSÍADAS AN MIRANDÉS – EMÍLIO MARTINS (Retrato 055)
 

Emílio Martins (1971) naciu an Sendin, cunceilho de Miranda de l Douro. Formou-se an stória na Faculdade de Letras de la Ounibersidade de l Porto. Bibe an Sendin, adonde ye porsor de mirandés bai para bários anhos.

Emílio Martins ye ua pessona bien coincida de ls mirandeses i mesmo fuora de las tierras de Miranda. Este coincimiento ye subretodo debido al grupo de musiqueiros que formou cun outros sendineses, chamado “Pica Tümilho”, ua banda que a eilha mesma se apersenta cumo sendo de Rock Agrícola i que ye mui popular antre la giente nuoba. Para alhá de l sou cunceito mui oureginal de spetaclo, esta banda canta solo an mirandés, l que ten sido mui amportante para lhebar l mirandés para fuora de la nuossa tierra, cumo para ancentibar la giente mais nuoba a adaprender la nuossa lhéngua. Emílio Martins ten sido l rostro i la percipal streilha de l grupo. L anho atrasado deixou l grupo, mas speramos que cuntine, puis muita falta faç, tanto el cumo l grupo.

Para alhá desso, Emílio Martins y escritor de lhéngua mirandesa, que yá publicou bários lhibros zde 1999, de que se çtácan ls dous belumes de bersos “La Proua de Ser Sendinés”. Ten tamien publicado cuontas i triato. Ye l triato ua de las atebidades a que le ten dedicado muita amportança, seia cun ls sous alunos, seia cula quemunidade sendinesa.

Emílio Martins ye porsor de mirandés nas scuolas de Sendin, apersentando-se a ler acumpanhado de bários de ls sous alunos. Liu las stáncias 69-79 de l Canto IV.

L miu cumpadre Zé

Yá habien passado uas buonas sumanas que you nun ancuntraba miu cumpadre Zé.

Resulbi ir a saber del. Cheguei-me a la puorta i bati. Nun purmeiro instante nun oubi nada, mas çpuis lhougo antandi que benien a abrir la puorta. Era l miu cumpadre, mas cun cara de pessona que stá mala.

Anton cumpadre l que se passa cun bós?

Nun quergades saber l que me duol.

Bó... ye assi tan grabe?

Sabeis alhá l que bai puorqui. Duol-me todo. Oulhai la spinha nu l´andreito, nin sei quando serei capaç de l´andreitar, inda ban passar uns tiempos. Diç l doutor que ten un déficit. Apuis ye l stomado, i ls antestinos que nun funcionan, nun trabalhan, stan meio parados assi cumo la economie. Las piernas caminan, caminan,... mas ye cumo se nun tubissan çtino. I por último, la cabeça parece que anda a las buoltas, a las buoltas i nun sal de l miesmo sitio, ye assi cumo ua spiral. Ye l sindroma de “gasparix” chama-se mais ou menos assi.

Á cumpadre la cousa stá mala.

Ide-bos embora antes que bus cuntamine.


Valter Deusdado

AGRADECIDO

AGRADECIDO

You sou Jantonho Stebes

Que l bengo a agradecer

L trabalho marabilhoso

Que l buosso Jornal stá fazer.

Cumo quien nun quier la cousa

Un die armei-me an scritor

Scritos que aparcirun ne l Jornal

Pu la mano de l senhor comendador.

Saliu un, salirun dous, salirun trés

I depuis sairun muitos mais

Porque sei que bós mirandeses

Dessas cousas tamien gustais.

Anton cuntinei a screber

I fui ganhando outra bida

Que la que you tenie tenido

Andaba yá meio perdida.

La fala que sabie falar

Ganhou outra forma screbida

I la nuossa lhéngua mirandesa

Passou a ser mais cunhecida.

Por obra de l Jornal Nordeste

Que ua grande upa mos dou

I hoije assi a mie maneira

You agradecer-le l stou.

Digo muito muito oubrigado

Por estes dieç anhos de lhuita

Fúran poucos ls agredecimentos

Mas la buossa ajuda fui muita.

Sien eilha, serie mais custoso

De lhebar la cruç al calbário

Mas baliu bien la pena

Que eilha hoije diç l cuntrario.

Fui lhebada por ende a fuora

Nas fuolhas de l buosso Jornal

A todos ls mirandeses spalhados

Pe ls quatro cantos de Pertual.

De Pertual i nun só

Tamien ls que stan ne l strangeiro

Puodirun ber cumo la nuossa fala

Fui lhebada al mundo anteiro.

Hoije yá puixa de sous galones

Que yá trai bien lhebantados

I bai le lhebrando a esses outros

Que nun somos assi tan atrasados.

Mas puodeis quedar çcansados

Que nun mos bamos a calhar

I nun quedaremos parados

Até eilha, a la ounibercidade chegar.

L digo cun muita proua

Sien me star you a armar

Mas sie porque ye l lhugar

Adonde eilha ten que star.

A la par cu las sues armanas

La Pertuesa, i las strangeiras

Porque isto de ser Lhéngua ouficial

Ten que tener las sues maneiras.

Mais ua beç muito oubrigado

A todos ls colaboradores

Deste nuosso Jornal Nordeste

Por tantos, i tantos fabores.

Cu la upa de ls screbidores

A quien l debemos agradecer

Por la ajudar-des a salir

De l tolheiro que la querien meter.

I porque ye maré d´agradecimentos

Tamien nun me puodo squecer

De l Doutor Amadeu Ferreira

Por todo l que ten stado a fazer.

I ye muito l que ten feito

Até me atrebo a dezier

Sien el nun dirie estas cousas

Que stou parqui a dezier.

Digo le oubrigado senhor doutor

Porque sei que bien l merece

Mos ajudou a quedar mais ricos

I la lhéngua mirandesa agradece.

I an jeito de çpedida

Digo assi a mius modos

Biba la lhéngua mirandesa

I muito oubrigado para todos.

Jantonho Stebes

Lhar de San Jesé Bumioso

L’Associaçon Cultural i Recreatiba Nial de la Boubielha stá de parabienes.

 

Fui sien dúbedas nanhuas mais ua taluda einiciatiba, esta de la fiesta de Nuossa Senhora de las Candeias pormobida pul’Associaçon.

Assi cuido que todos ls que trabalhórun para queilha fusse possible stan de parabienes i puoden sentir proua porque ls fruito stubo bien a la bista de todos, i quando assi ye ganhan to l mundo.

Na missa de deimingo passado, que  se celebrou a meidie n’Eigreija de la Paróquia de “Val Figueira” dezida pul nuosso cumpanheiro i amigo Pr. António Morais (de Bilachana), que siempre mos recebiu de braços abiertos stubo muita giente, talbeç tenga sido l anho an que mais pessonas s’ajuntórun, ende armanados na fé i relhembrando ls nuossos familiares i cunterrános que yá mos deixórun (yá se muorrírun) rezemos i ganhemos fuorças para cuntinar la nuossa jornada.

 Culas lheituras an mirandés, puis siempre l Pr. António Morais acarinou este modo de las fazer, puis ye el tamien un apaixonado i falante, demos cuntinidade a un de ls oujetibos que se perpuso la direçion, que ye alhargar i tener persente cada beç mais l mirandés ne ls nuossos cumbíbios i atebidades.

 Quando nestas missas las lheituras son lhidas an mirandés, nun las fai defrentes de la outras, nien ye esse l perposito, mas si chamar al de riba la mimória de ls nuossos antepassado, pais i abós que siempre l falórun, poner ne l sou lhugar este patrimonho lhenguístico que mos ye tan querido i se ende la maiorie ten essa lhigaçon anton melhor. 

Apuis de la missa ajuntemos-mos para almuorçar eilhi nua Quinta (restourante) bien acerca adonde quemimos passando ua tarde bien animada i regada, nun faltórun las cumbersas, lhonas i grácias cumo siempre.

 Cumo to l mundo sabe, l tempo de la fogueira de cepos que ardie la nuite anteira a la Capielha, ne l terreiro a meio de l’aldé de Zenízio yá alhá bai, l modernismo i l zambolbimiento puode apagar todo, mas hai alguas cousas que nunca será capaç de pagar que son las nuossa alhembráncias, aqueilho que fui grabado cumo ua de las cousas mais guapas que se fazie, l “DOUS DE FEVREIRO” (fiesta de Nuossa Senhora de las Candeias), la fiesta de la cunfraternizaçon, la fiesta an que nun quedaba naide sien cenar, la fiesta que to las famílias tenien proua an tener cumbidados de fuora a la mesa.

Agora doutro modo, mas acá bamos dando cuntinidade a essas tradiçones i questumes, i fazemos fé i queremos que assi seia, nestes dies todos ls que quejíren s’ajunten i cumbíban.

Cumo astanho era un anho d’eileiçones pa ls uorganos de direcion, realizou-se ua assemblé i la eileiçon de ls nuobos uorganos, a quien fúrun deseados muitos eisitos i un bun trabalho.

Fui guapo ber to l mundo sastisfeito, seinha de que ls ancuontros i cumbíbios son la melhor manzina para ganhar fuorças i bencir las canseiras de l die a die.

Parabienes a todos, l’Associaçon deseia a to l mundo mais ua beç un bun anho de 2013.

 

LEITURA DE LS LUSÍADAS AN MIRANDÉS

 

 

[Retrato de Alcides Meirinhos i Dinis Meirinhos]

LEITURA DE LS LUSÍADAS AN MIRANDÉS – FRANCISCO DOMINGUES (Retrato 053)

Francisco Domingues naciu an Zenízio hai 65 anhos i la fala mirandesa ye la sue purmeira lhéngua. Zde l sou ampeço (2001) que frequentou las classes de la Associaçon de Lhéngua Mirandesa an Lisboua, i zde 2004 que ten benido el próprio a ser porsor de lhéngua i cultura mirandesas, tanto an Lisboua cumo ne l Alto do Moinho (Seixal). Ten sido mui grande la sue dedicaçon al ansino de la lhéngua mirandesa, nunca se poupando a todos ls sfuorços até cun prejuízo de la sue bida pessonal.
Francisco Domingues ten benido a screbir subretodo ne l blogue http://frolesmirandesas.blogspot.com/, mas tamien na “Fuolha Mirandesa” de l “Jornal Nordeste”.
Ye formado an Eiducaçon Física, habendo sido porsor nessa ária de l saber. Hoije stá reformado, i derige cula sue tie, Irene Domingues, un coleijo an Lisboua, na zona de Alcántara.
Apersentou se a ler acumpanhado de la sue tie Irene Domingues. Lírun de modo antercalado de dues an dues stáncias. Liu las stáncias 49, 50, 53, 54, 57, 58, 61, 62, 65 i 66 de l Canto IV.
[subre Francisco Domingues ber tamien ls retratos / testos 008 i 024, yá publicados]
 

LEITURA DE LS LUSÍADAS AN MIRANDÉS

 

[Retrato de Alcides Meirinhos i Dinis Meirinhos]

— com Glória Fidalgo.

LEITURA DE LS LUSÍADAS AN MIRANDÉS – FRANCISCO AFONSO FIDALGO (Retrato 052)

Francisco Afonso Fidalgo (1945), naciu an San Pedro de la Silba, cunceilho de Miranda de l Douro i ende bibe.
Ye sue fala l mirandés, zde siempre, i ten la ousado para fazer la sue poesie, puis dun poeta popular se trata, cun bersos yá publicados na Fuolha Mirandesa de l Jornal Nordeste. Ye l persidente de la Junta de Fraguesie de San Pedro.
Apersentou se a ler acumpanhado de la sue filha, Glória Fidalgo, la berdadeira antuante de el alhá star a ler Ls Lusíadas an mirandés. Cun eilha fizo ua leitura ampressionante, alternando las stáncias, que fúrun lendo de modo mui bibo. Bien háiades Fracisco Fidalgo i fuorça cula nuossa lhéngua ende na San Pedro i na buossa família.
Liu las stáncias 31, 33, 35, 37, 39, 41, 43, 45 i 47 de l Canto IV.

LEITURA DE LS LUSÍADAS AN MIRANDÉS

 

 

[Retrato de Alcides Meirinhos i Dinis Meirinhos]

— com Glória Fidalgo.

LEITURA DE LS LUSÍADAS AN MIRANDÉS – GLÓRIA FIDALGO (Retrato 051)

Glória Fidalgo (1977), naciu an San Pedro de la Silba, cunceilho de Miranda de l Douro. Nesta cidade fizo ls sous studos, na Scuola Secundaira. Alhá cuntina a morar.
Trabalha na ampresa Europarques Hispano-Lusos, que ye propiatária de ls barcos que chúben i abáixan l Douro an Miranda de l Douro, ua de las biaijes mais fantásticas que ye possible fazer pula tierra de Miranda, ne l grandioso canhon de l Douro Anternacional. Ir a MIranda i nun fazer esta biaije ye pior que ir a Roma i nun ber l Papa. Alhá podereis ancuntrar a Glória, muita beç a apersentar l bolo de l amponiente bufo rial que alhá ténen.
Glória Fidalgo fizo un sfuorço mui grande para star nesta leitura de Ls Lusíadas, puis solo salie de l trabalho apuis de la leitura acabar. Nien assi zistiu, i amanhemos un hourário al modo. Al fin, nun fui perciso i todo se cumpuso na hora. Bien haias Glória por esse grande sfuorço i por nun zistires. Cuntina sempre assi i que muita giente siga l tou eisemplo.
Apersentou se a ler acumpanhada de sou pai, Francisco Afonso Fidalgo, cun quien daprendiu l sou guapo mirandés i tamien cun la giente de la sue tierra. Lírun ls dous a la par, alternando las stáncias.
Liu las stáncias 31, 33, 35, 37, 39, 41, 43, 45 i 47 de l Canto IV.

LEITURA DE LS LUSÍADAS AN MIRANDÉS

 

[Retrato de Alcides Meirinhos i Dinis Meirinhos]

LEITURA DE LS LUSÍADAS AN MIRANDÉS – BALBINA MENDES (Retrato 050)

Balbina Mendes liu las stáncias 20 a 29 de l Canto IV, desta beç an sustitutiçon dua pessona que faltou.
Podeis ber ls dados personales de Balbina Mendes ne l testo 027, yá publicado.

LEITURA DE LS LUSÍADAS AN MIRANDÉS

[Retrato de Alcides Meirinhos i Dinis Meirinhos]

LEITURA DE LS LUSÍADAS AN MIRANDÉS – ISAURA MARCOS (Retrato 048)

Isaura Marcos (1967), naciu an Sendin, cunceilho de Miranda de l Douro, i ende mora. Studou biologie i geologie na Faculdade de Ciências de la OUnibersidade de Lisboua. Ye porsora na scuola de Miranda de l Douro.
Nun sendo falante de mirandés de todos ls dies, bieno eiqui a dar apoio a la nuossa lhéngua, puis an casa de sous pais nunca se falou outra cousa i cun eilhes lo daprendiu a falar. Speramos que esta seia ua seinha para cuntinar sien parar ne l uso de la nuossa lhéngua, ansinando se la tamien als sous filhos, assi cuntenta i decidida cumo s'apersenta ne l retrato.
Cun eilha bien tamien la sue filha Tatiana Raposo, aluna de las classes de lhéngua i cultura mirandesa. Liu las stáncias 11 a 15 de l Canto IV.
 

LEITURA DE LS LUSÍADAS AN MIRANDÉS

[Retrato de Alcides Meirinhos i Dinis Meirinhos]

LEITURA DE LS LUSÍADAS AN MIRANDÉS – CAMILA ALMENDRA (Retrato 049)

Camila Almendra (1960), naciu an Sendin, cunceilho de Miranda de l Douro, i ende mora i fizo ls sous studos até al 12.º anho, yá d’adulta..
Daprendiu l mirandés cun sue mai i sous abós, i la giente de la rue. Quando quier usa lo sien dificuldade. Assi cuntine apuis desta fiesta de leitura de Ls Lusíadas.
Apersentou se a ler a la par de l sou tiu, Norberto Marcos, i de seu cunhada Isaura Marcos.
Liu las stáncias 16 a 19 de l Canto IV.

LEITURA DE LS LUSÍADAS AN MIRANDÉS

 LEITURA DE LS LUSÍADAS AN MIRANDÉS – Norberto marcos (Retrato 047)

Norberto Marcos Guet (1957), naciu an Sendin, cunceilho de Miranda de l Douro, i alhá mora. Ende i por Bergáncia fizo ls sous studos, até al 12.º anho.
Ye falante de mirandés zde siempre i usa muito la nuossa lhéngua ne l sou die a die. Fui persidente de la Junta de Fraguesie de Sendin, i nessa culidade algues bezes falou ne l cunceilho an mirandés, un notable uso anstitucional de la nuossa lhéngua ampeçado pul persidente de la junta Manuel Ferreira, mas que anfeliçmente nun tubo cuntinidade.
Liu las stáncias 1 a 10 de l Canto IV.

LEITURA DE LS LUSÍADAS AN MIRANDÉS

[Retrato de Alcides Meirinhos i Dinis Meirinhos]

LEITURA DE LS LUSÍADAS AN MIRANDÉS – FÁBIA DE JESUS CASQUEIRO (Retrato 039)

Fábia de Jesus Casqueiro (1926), cun 82 anhos quaije a bolber [14/8], naciu an Bilachana, aldé de l cunceilho de Miranda de l Douro, adonde inda bibe. Fui la mais nuoba de siete armanos i solo eilha studou, formando-se an porsora de l ansino básico.
Dou scuola toda la bida, an Samartino de l Peso i ne ls Stebais, cunceilho de Mogadouro, mas l mais de l tiempo fui na sue tierra, na Bilachana.
Daprendiu l mirandés cun la sue família i cun l pobo de Bilachana. Cun ua mui guapa pernúncia, fui la mirandesa de mais eidade que se apersentou a ler Ls Lusíadas. Berdadeira entusiasta de la nuossa lhéngua, chegando a ler bersos i outros testos an mirandés ne l porgrama de rádio “Bons dias Tio João”, de la RBA de Bergáncia.
Fui ua proua mui grande tené-la a ler i speramos que l sous antusiasmo sirba de eisemplo para muita mocidade mirandesa que agora ampeça ls caminos de la nuossa lhéngua.
Liu las stáncias 102 a 110 de l Canto III.

You proíbo, tu proíbes... EILHES PROIBIEN ! !

A que amenaças stában sujeitos ls malianos estes últimos meses antes de ampeçaren a sentir-se outra beç an lhiberdade faç agora pouco mais de 15 dies graças a l'anterbençon de tropas de suldados malianos ajudados tamien por  franceses, nigerianos, togoleses, etc. ?

Este decumiento fui ancuntrado na puorta dun restourante, an Gao, cidade maliana lhibertada hai dous dies, sendo la última la  de Tombuctu que ampeçou a ser lhibertada solamente onte.

L decumiento ancuntrei-lo aqui ne l site de la rádio Europe 1:   http://www.europe1.fr/International/A-Gao-la-liste-des-interdits-1396643/

Na lista de amenaças proferidas i redigidas por un lhado nun francés mais que aprossimatibo quier dezir cun bastantes erros i an árabe por outro (mas cumo nun cunheço essa lhéngua nun fazerei comentairos), podemos assi i todo ler l seguinte:

Las cousa(s) proibida(s) na cidade  (Ye proibido,a...)

1. que la mulhier sala pa la rue sien l béu islámico
2. que abaixe até la ribeira sien l béu islámico 
3. l comércio de cigarros, droga i álcool assi cumo l sou cunsumo
4.  ber filmes ilícitos 
5. la mixidade (las fiestas, las motorizadas...) 
6. la bruxarie(s) 
7. la música i la sue distribuiçon 
8. l “zina” i l que se le assemelha (puls bistos, an árabe: relaçones sexuales antre un home i ua mulhier sien que estes steian casados i outras relaçones sexuales cunsideradas anormales...)

Passa-se ou inda se passaba todo esto, inda nun hai muito, solo nun paíç cumo l Mali, quier dezir: un paíç de África, pobre i subzambuolbido, a miles de quilómetros de la nuossa bielha Ouropa ?!

De forma ningua !

Quedamos de boca abierta quando sien ir mui loinge mos damos de cuonta que moças percipalmente, cun menos de trinta anhos até, que fúrun nuossas alunas, alunas médias ou cun fracos resultados giralmente  assi i todo, deixórun de se bestir normalmente ou cumo questumábamos bé-las bestir-se  i pássan (mas até quando?) a tapar l pelo, l cachaço i l resto de l cuorpo cun grandes roupones giralmente de quelor preta. 

Onde?

A pouco metros de adonde you moro. 

An França.

Anformaçon

Anformaçon

Porque me chegórun alguns ameils dezindo que las lheituras que publiquei eiqui a la purmanhana, stában mui sumidas lhougo nun se podien ler bien

-You digo que bonda calcar an cada ua deilhes i anton si yá quédan an buonas cundiçones, puis ye l que se fai cun qualquiera eimaige eiqui publicada, tamien sei que la maiorie l sabe fazer i fai.

-Eiqui queda esta anformaçon, puis siempre fui de l'oupenion de que todo l que publico seia bisto ou lido por todos.

Buonas tardes i muitas i buonas lheituras.

Faustino

Lheituras de la Missa

- Estas son las lheituras de la missa, de l deimingo die 3 de Febreiro (próssimo més) n'Eigreia de Val Figueira, que l'Associaçon Cultural i Recreatiba "Nial de la Boubielha" pormobe to ls anhos na fiesta de Nuossa Senhora de las Candeias.
- Son lhidas an mirandés (tamien stan çpnibles an pertués para que to la giente antenda), missa celebrada pul P. António Morais, nuosso cunterráneo de Bilachana.

 
Mais anformaçones, subre la hora i to l porgrama ye solo besitar www.nialdelaboubielha.org

LEITURA DE LS LUSÍADAS AN MIRANDÉS

[Retrato de Alcides Meirinhos i Dinis Meirinhos]

LEITURA DE LS LUSÍADAS AN MIRANDÉS – MARIA IRENE CASTRO (Retrato 045)

Maria Irene Castro (1959), ye natural de Sendin, cunceilho de Miranda de l Douro, adonde mora. Ende fizo ls sous studos até al 6.º anho.
Ten-se dedicado a bários oufícios, an special l de tecedeira, i muita soma de tapetes i colchas yá saliu de las sues manos de prata, seia an bárias culidades de lhana seia de lhino. Nesse campo, ye ua de las grandes artesanas de las tierras de Miranda.
Tamien ne ls redadeiros anhos se ten dedicado a fazer fumeiro para fuora, nua cozina tradecional, i puodo bos dezir que las tabafeias deilha son de l melhor que hai.
Daprendiu a falar na sue família i na rue de l Barrialto, an Sendin, adonde naciu i se criou. Fala bien de berdade.
Liu las stáncias 130 a 137 de l Canto III.

LEITURA DE LS LUSÍADAS AN MIRANDÉS

[Retrato de Alcides Meirinhos i Dinis Meirinhos]

LEITURA DE LS LUSÍADAS AN MIRANDÉS –AFONSO JANTARADA (Retrato 044)

Afonso Jantarada (1997), ten las sues raízes an Sendin, de adonde son sous abós. Por essa bila de Miranda de l Douro passou muito tiempo cun sous abós i cun sue bisabó, de quien daprendiu la lhéngua, cumo el mesmo diç nun de ls sous guapos poemas. Studa na Lisboua, ne l 10.º anho, i eiqui bibe cun sous pais.
An 2012 publicou l sou purmeiro lhibro de poesie, "Calantriç de Nineç / Imagem de Infância" [Âncora Editora], adonde se amostra yá un bun poeta.
La lhéngua mirandesa ye para Afonso Jantarada ua berdadeira cunquista, fruto de muito sfuorço i ua gana sien lhemites. Tenendo an cuonta las sues dificuldades naturales, Afonso Jantarada ye ua fuorça de la natureza i un eisemplo para todos ls mirandeses, an special la mocidade. El faç parte de l grupo de mirandeses, i tengo fé que muito inda creça, que ha de lhebar la lhéngua mirandesa al seclo XXI.
Ne l anho de 2012 frequentou las classes de l curso de la Associaçon de Lhéngua Mirandesa na Lisboua. I na 2013 cuntina. Speramos que nunca zista i que cuntine a ser ua anspiraçon para todos nós.
Apersentou se a ler acumpanhado de sue mai, Maria José Afonso Peres Jantarada [Zé Jantarada], i de sou pai, António José Antonio Jose Fonseca Jantarada, sendo el l antuante desta partecipaçon familiar na leitura de Ls Lusíadas, tenendo siempre l apoio de sous pais, un eisemplo a seguir puls mirandeses.
Liu las stáncias 126 a 129 de l Canto III.

LEITURA DE LS LUSÍADAS AN MIRANDÉS

[Retrato de Alcides Meirinhos i Dinis Meirinhos]

LEITURA DE LS LUSÍADAS AN MIRANDÉS – JOSÉ MARIA GOMEZ (Retrato 040)

José Maria Gomez (1956), ye natural i morador na Villalcampo, porbíncia de Çamora, eilhi a dous trancos de Miranda. Ye todo quanto sabemos deste armano de la bielha tierra lhionesa, adonde se falaba l lhionés, família de lhénguas a que tamien pertence l mirandés, i que cun entusiasmo mos pediu para ler un cachico de Ls Lusíadas, associado-se a la fiesta de la lhéngua que eilhi se passaba. I assi fui que liu, sien mais purparaçon, i garanto bos que la pernúncia del nun ye nada mala. Talbeç un die el mos benga a dar nuobos dados de la sue bida. Fui un gusto grande tenerbos cun nós, José Maria Gomez, repersentando l pobo de Aliste, siempre tan acerca de l pobo mirandés, seia na sue bida, seia na sue lhéngua i cultura.
Liu las stáncias 111 a 112 de l Canto III.

Tornou l sol

 

Tornou l sol, nesta manhana de fin de Janeiro, apuis dun més d´auga i nubrineiros. La casa  ten un cierto oulor a mofo, anque l´auga ne l zumificador naça que nien an naciente, ampenhado an la chupar toda. Ye l précio que hai que pagar por se bibir nas bordas de Sintra, aqueilha guapura natural que l aire quijo capar, arrincando árboles cun cientos d´anhos, sien duolo nien piadade.

Ábren-se las bidraças, até que einfin, sien miedo que ua borrascada entre pulas jinelas. Ls bielhos tórnan als sentalhos de las pracetas i jardins, cumo lhagartos, a piçcanar ls uolhoss, yá zaquestumados de la lhuç de l sol. Janeiro geladeiro stá a chamar por Febreiro namoradeiro i assi, nun tardaran a abrir ls bretones de ls anúncios, flores que anuncian que la Primavera stá para debrebe. Ne l miu huorto yá quantá que ls jarros abrírun, cun aquel eirotismo todo, talbeç para calcer ls nuossos uolhos, cumo patromaqueç a almiar tiempos anfulhinados.

Spreguiço-me, pongo ls guarda-chubas a secar, colgo ls benairos ne l filo, abro las jinelas, calço las alparagatas i, an menos de nada, la mie perra dá-se de cuonta que bamos a caminhar. Dá uas lhadradelas de alegrie i bai a buscar la bola para apuis fugir atrás deilha. L capote que trai bestido de pastora scocesa há-de hoije quedar seco i eilha cun menos peso anriba de l lhombo.

Que benga sol, digo you, para ber se las missagras quédan mais zanferrujadas, las jogas rúgen menos, ls múscalos stéian mais spurridos i la cabeça deixe de doler por bias de la cachaceira.

LEITURA DE LS LUSÍADAS AN MIRANDÉS

 

LEITURA DE LS LUSÍADAS AN MIRANDÉS – ANA AFONSO (Retrato 046)

Ana A Afonso liu las stáncias 138 a 143 de l Canto III [que eiqui se cunclui].
Fizo la leitura para substituir ua pessona que faltou.
Quien quejir ber l retrato i la biografie de Ana Afonso, baia al testo 028, yá publicado i adonde se amenta noutra sue leitura.

LEITURA DE LS LUSÍADAS AN MIRANDÉS

[Retrato de Alcides Meirinhos i Dinis Meirinhos]

LEITURA DE LS LUSÍADAS AN MIRANDÉS – ANTÓNIO JOSÉ FONSECA JANTARADA (Retrato 043)

Antonio Jose Fonseca Jantarada (1967), ten las sues raízes an Sendin, de adonde son sous pais. Bibe i trabalha an Lisboua. Eiqui se formou na Ounibersidade Católica Pertuesa i trabalha na EDP, an Lisboua, adonde ye director.
La lhéngua mirandesa solo agora la stá a daprender i a studar, tenendo sido aluno de l curso de la Associaçon de Lhéngua Mirandesa, an Lisboua, ne l anho de 2012. Nessas classes siempre acompanhou l sou filho Afonso Jantarada, eisemplo que amostra cumo ls filhos puoden ajudar ls sous pais a bolber a la sue lhéngua i cultura de ourige. Speramos que nun pare i baia sempre palantre na daprendizaije de la nuossa fala.
Apersentou se a ler acumpanhado de la sue tie, Maria José Afonso Peres Jantarada [Zé Jantarada], i de l sou filho mais bielho, Afonso Jantarada, sendo este l grande antuante de traier ls sous pais outra beç pa la lhéngua mirandesa. Un grande i eimocionante eisemplo ye todo este apoio.
Liu las stáncias 123 a 125 de l Canto III.

LEITURA DE LS LUSÍADAS AN MIRANDÉS

[Retrato de Alcides Meirinhos i Dinis Meirinhos]

LEITURA DE LS LUSÍADAS AN MIRANDÉS – MARIA JOSÉ AFONSO PERES JANTARADA (Retrato 042)

Maria José Afonso Peres Jantarada [Zé Jantarada] (1968), ten las sues raízes an Sendin, de adonde son sous pais. Bibe i trabalha an Lisboua. Eiqui se formou na Ounibersidade Técnica i trabalha ne l CECOA – Centro de Formação Profissional para o Comércio e Afins.

La lhéngua mirandesa solo agora la ampeça a daprender i a studar. Speramos que nun pare i assi le deia cuntinidade a la fala de sous pais.

Apersentou se a ler acumpanhada de l sou tiu, Antonio Jose Fonseca Jantarada, i de l sou filho mais bielho, Afonso Jantarada, sendo este l grande antuante de traier ls sous pais outra beç pa la lhéngua mirandesa. Un grande i eimocionante eisemplo ye todo este apoio.

Liu las stáncias 120 a 122 de l Canto III.

LEITURA DE LS LUSÍADAS AN MIRANDÉS

LEITURA DE LS LUSÍADAS AN MIRANDÉS – ANTÓNIO CANGUEIRO (Retrato 041)

António Cangueiro liu na sue culidade de membro de la Comisson de Leitura, para substituir ua pessona que faltou. Quien quejir por ber ls sous dados ne l retrato i testo 007.
Liu las stáncias 113 a 119 de l Canto III.