Alguas reglas i buns modos para que l 2013 seia buono.

Salude:

1.  Beba muita auga

2.  Coma mais l que nace an arbles i nas huortas, i menos quemido porduzida an fábricas;

3.  Biba culs 3 fuorças: einergie, antusiasmo i ampatie;

4.  Arranje tiempo para rezar; para plantar i cuidar de flores; d'arbles; etc…

5.  Deia mais tiempo als sous animales de stimaçon;

6.  Lheia mais lhibros de ls que lhiu limpassado (2012);

7.  De beç an quando fai pul menos 10 minutos de siléncio;

8.  Druma uito (8) horas por die;

9. Fai caminadas de 20-60 minutos por die, i anquanto caminae sunri.

Feitiu:

11.  Nun acumpares la sue bida cula de ls outros. Naide fai eideia de cumo ye la caminada de ls outros;

12.  Nun tengas pensamientos negatibos ó cousas asparcidas de que nun tengas manos neilhas;

13.  Nun quergas ser mais do que sós. Manten-te ne ls tous lhemites;

14.  Nun seias mui cara de palo (cizudo);

15.  Nun botes fuora la tue einergie, eilha tamien percisa de cuontas;

16.  Sonha mais;

17.  Ambeija ye ua pierda de tiempo. Tenes todo de l que percisas....

18.  Squeçe questones d’onte. Nun amentes al tou camarada ou tue camarada de ls erros de l passado. Esso mata la felicidade d’hoije;

19.  La bida solo son dous dies, cúrtia de mais para oudiar alguien. Nun oudeie.

20.  Fai las pazes cul tou passado para nun açagar l tou persente;

21.  Naide comanda la tue felicidade a nun ser tu;

22.  Ten cuncéncia que la bida ye ua scuola i que stás neilha para daprender. Porblemas son solo ua parte, qu'aparécen i se zfázen cumo ua classe d’álgebra, mas las liçones que daprendes, quedáran pa la bida anteira;

23.  Sunri i bota mais gargalhadas;

24.  Nun necessitas ganhar todas las çcuçones. Aceite tamien la outra bercion;

 

An quemun:

25.  ten mais lhidaçon cun la tue família;

26.  Da algue de buono als outros to ls dies;

27.  Perdona a todos por todo;

28.  Passa mais tiempo cun pessonas que téngan pa riba de 70 anhos i abaixo de 6;

29.  Fai un çfuorço para que sunrían trés pessonas por die;

30.  Nun ye de la tue cunta l que ls outros pensan de ti;

31. Que l tou trabalho nun tome cunta de ti quando stubires doliente. Ls sous amigos l fazeren-lo. Manten-te an cuntato culs.

Na Bida:

32.  Fai l que ye cierto;

33.  Bota fuora l que nun ye útele, guapo ó alegre;

34.  L tiempo i culas upas de Dius cúran todo;

35.  Por mui buona ó mala que las cousas stéian.... Eilhas un die mudáran...

36.  Nun antressa cumo te sintas, alhebanta-te, amanha-te i aparece;

37.  L melhor inda stá para benir;

38.  Quando çpertares pula manhana, agradeça la Dius pula grácia.

39.  Manten l tou coraçon siempre feliç.

40.  Deseia a todos aqueilhes que amas  un 2013 marabilhoso!!!

LEITURA DE LS LUSÍADAS AN MIRANDÉS

  – CARLOS FERREIRA (Retrato 020)

Carlos Ferreira (1961), naciu an Sendin, cunceilho de Miranda de l Douro. Studou an Miranda, an Bergáncia, an Lisboua i an Salamanca, formando se an Giografie i Planeamento Regional [1986]. La sue tese de Grado ye la purmeira tese ounibersitária scrita an lhéngua mirandesa: “Toponímia, Paisaige i Ambiente, Ua abordaige geotoponímica de Sendin an Tierra de Miranda” [Salamanca, 2004]. Apuis de haber passado alguns anhos an França, bibe an Sendin i dedica se al Turismo, tenendo abierto cula sue tie, Marília Almendra, l Houtel Rural La Tenerie, an Sendin. Ye nesta altura delegado de la Region de Turismo de l Norte an Bergáncia i repunsable de l turismo de natureza nessa region de turismo.
Fui porsor de giografie i de lhéngua mirandesa, de que fui un de ls percipales repundables pul sou alhargamiento i amplantaçon, antre 2000 i 2003. Publicou bárias obras na mirandés, cumo "Cuntas de Camino, Sacadielhas i Outras Cuontas" , "Cuontas que me cuntórun", "L Miu Purmeiro Lhibro an Mirandés / O Meu Primeiro Livro em Mirandês" [cun Paulo Magalhães]. Cun la nobela “Antonho Trucal”, screbida cun l pseudónimo de Abilho Scairo ganhou l concurso lhiterairo pormobido pula Càmara de Miranda na 2003. Para alhá desso ten bários studos, recuolhas i testos oureginales publicados na bários jornales i rebistas, fazendo parte de l’antologie de scritores stramuntanos A Terra de Duas Línguas [IPB, 2010], cordenada por Ernesto Rodrigues i Amadeu Ferreira. Sabemos que purpara nuobas publicaçones, que aguardamos para astanho. Ye un de ls grandes dibulgadores de la lhéngua mirandesa, ousando an todo l lhado, seia na atebidade porfissional, seia política, seia pessonal. Apersentou-se a ler acumpanhado de ls sous filhos, Alice Ferreira i Thibaut Ferreira. Liu las stáncias 64 a 72 de l Canto II.

LEITURA DE LS LUSÍADAS AN MIRANDÉS 

 

– ALCIDES MEIRINHOS (Retrato 016)

Alcides Meirinhos (1961) naciu an Cicuiro, cunceilho de Miranda de l Douro. Até als dieç anhos passa l mais de l tiempo na sue tierra, adonde daprende la lhéngua mirandesa, indo apuis a studar para Miranda [3 anhos] i Bergáncia [5 anhos], alhá bibindo. An 1981 entra na Scuola de Paraquedistas de Tancos, ende seguindo cumo sergento, mas tubo que salir por bias dun acidente. Apuis desso, specializou-se an Logística i Armazenaige, ramo an que agora ye formador, ouditor i ambestigador. Bibe an Albergarie la Bielha, çtrito de Abeiro.
An 2008 ampeça l blogue "Al Balhe de la Baglina" http://baglina.blogspot.pt/ Traduç bárias cuontas para mirandés, an special "La Mona l Maio – Cuontas de la Raia i de l Praino" [Âncora Editora, 2010], cuontas oureginales de l Padre José Francisco Fernandes, natural de Cicuiro. Cumo sue produçon lhiteraira oureginal ten yá ua amportante obra publicada, seia an blogues bários i na ‘Fuolha Mirandesa’ de l Jornal Nordeste, seia ne l lhibro de cuontas "Camino de la Cándena" [Zéfiro, 2011]. Faç parte de la antologie de scritores stramuntanos "A Terra de Duas Línguas" [IPB, 2011], ourganizada por Ernestio Rodrigues i Amadeu Ferreira.
Para alhá de las sues publicaçones, Alcides Meirinhos ten benido a apersentar se cumo un de ls mais çtacados dibulgadores de la lhéngua mirandesa, dando cursos i palhestras an scuolas i na ounibersidade de Abeiro. Al mesmo tiempo, ten benido a fazer un amportante trabalho de recuolha i registro de la cultura i de la paisaige mirandesas, subretodo an retratos. A el se debe l’eideia de criar ls ancuontros de blogueiros mirandeses, de que tamien fui l purmeiro ourganizador [Naso, 2008].
Fizo parte de la Comisson Ourganizadora de la leitura de Ls Lusíadas an Mirandés, tenendo se ancarregue de retratar todos ls leitores, assunto an que fui ajudado subretodo pul sou filho Dinis Meirinhos. Liu las stáncias 30 a 41 de l Canto II.

LEITURA DE LS LUSÍADAS AN MIRANDÉS

 

– ALCINA PIRES (Retrato 017)

Alcina Pires (1953), naciu an Malhadas, cunceilho de Miranda de l Douro. Zde tienra eidade bibiu an Zenízio, adonde fizo la scuola i trabalhou ne l campo, ajudando ls pais, cun quien daprendiu la lhéngua mirandesa. Als 14 anhos saliu a studar para Bergáncia adonde cuncluiu l magistério purmairo an 1975. Cumo porsora passou l mais de l tiempo an Lisboua. Pul caminho dedicou se tamien a la pintura, tenendo feito algues sposiçones. Yá reformada, passa agora l mais de l sou tiempo an Zenízio.
Zde mui cedo ampeçou a screbir an mirandés, tenendo publicado muitos testos, oureginales i recuolhas, an blogues de lhéngua mirandesa i, subretodo, na “Fuolha Mirandesa” de l Jornal Nordeste. Publicou un libro de cuontas, assente nas suas bibenças de nina, an Zenízio, “Lucrécia Cunta-mos Cumo Era” [Zéfiro, 2010].
Liu las stáncias 42 a 50 de l Canto II.

Curso de Lhéngua i Cultura Mirandesas an Lisboua

AMPEÇA HOIJE A LAS 20H 30M

NA CASA DE CASA DE TRÁS-LS-MONTES I ALTO DOURO AN LISBOA,

EILHI ARRIMADO AL CAMPO PEQUEINHO.

ALHÁ BOS SPERAMOS

L terceiro anho de l quarto curso de Lhéngua i Cultura Mirandesas an Lisboua, ten l sou ampeço die 16 de janeiro de 2013. Las classes ban a tener lhugar na Casa de Trás-os-Montes e Alto Douro, a las 20h30m de la nuite de todas las quartas-feiras.

L curso, astanho tenerá l mesmo zeinho que tubo yá an 2007-2008 an Corroios. Assi, pul ansino de la lheitura, scrita i de la fala, quédan reponsábles ls porsores Francisco Domingues i António Cangueiro. Apuis ua beç an cada més l porsor Amadeu Ferreira queda ancarregado de dar la Stória i Cultura Mirandesas.

Las aulas son an special pa ls alunos que frequentórun ls derradeiros dous anhos, pa terminar l Curso Eilementar de Lhéngua i Cultura Mirandesas, mas tamien para nuobos alunos que quergan ampeçar a daprander l mirandés.

"La rialidade ye einacraditable"

L'arble milenar abraçaba la casa. Era gigantesca i deixava que ls suonhos s'ancarrapitáran até se perdéren nas streilhas. Las portaladas eimensas abrien-se a la calor macie i premitien que la lhuç i la magie de la sabana africana antrássen sin trabones.

Talbeç esta bison atamasse l friu qu'apertaba las arbles znudas i prateadas que las bistas de l praino nordestino, na rialidade, ouferecie. Era un bício maduro este qu´eilha tenie de oupir las persianas i abrir l die quando se lhebantaba, mesmo que ls cristales de carambelo bordassen un praino angaranhido.

Até nun cenairo eidílico l miedo puode ser assi: guapo, atlético i beloç cumo la pantera negra que saltou de l'arble i se sgueirou pula portalada de la sala.

Ye claro que la mulhier biu l peligro - claramente; tenie siempre l coraçon d'atalaia. Corriu pa l refúgio, mas la chabe era mui fraca an relaçon a la grima. Solo poderie pertencer a un almairo guardado an triato de trastes bielhos. Un pequeinho trinco, an andeble puorta, para porteger un tesouro sin précio: ls filhos.

Spertou an subressalto i dou l salto para fuora de l suonho. Até l'almofada tembraba de grima. Ye que la rialidade, tamien puode ser paborosa - einacreditable.

Anque spierta, eilha deixou que l suonho cuntinasse a galgar puls galhos dua magnífica arble, talbeç para ampedir que l miedo abaixasse.

Fui ua beç

Un pai tenie trés filhos….

L mais bielho pediu-le:

-Oh pai, you querie un altemoble! Na ounibersidade só you ye que nun tengo!

-Só quando you acabar de pagar l trator.

Ben l outro, l de l meio:

-Oh pai you quiero ua mota!

-Só quando acabar de pagar l trator.

Apuis ben l mais nuobo:

-Oh pai you quiero ua bicicleta?

-Só quando acabar de pagar l trator.

L garoto sal anraibado i quando passa a pie de l galhineiro bei l galho anriba dua pita, bota-le un grande punta pie i diç-le:

-Nesta casa enquanto pai nun acabar de pagar l trator ándan todo da pie!!!

Sé Catedral de Miranda de l Douro

 

 

Na zona nordeste de l território nacional queda la guapa i periférica cidade de Miranda de l Douro, eilebada a la catadorie de sede eipiscopal an 1545, altura an que tamien passou a la cundiçon de cidade. Tamien por orde de D. João III, Miranda de l Douro eirie ber nacer la sue eimensa catedral, a partir dun porjeto delineado ne ls ateliers de la capital, altarado i cumpletado, alguns anhos mais tarde, pul arquiteto Miguel de Arruda, coadjubado puls mestres spanholes Francisco Velásquez i Pedro de La Faia.

Para se arguer la Sé mirandense, terá sido çtruída l'antiga Eigreija de Santa Marie, templo gótico de l reinado de D. Dinis. Demolido esse templo trecentista, las obras de la Sé maneirista ampeçórun an 1552, sendo eilha cunsagrada an 1566. Até 1780, la catedral fui l centro aglutinador de la bida social, relegiosa i cultural de Miranda de l Douro. Nesta altura, l papa decidiu la reunificaçon de l bispado desta cidade frunteiriça cun Bergáncia, quedando esta radadeira cumo centro de l bispado nordestino. Frunteira a un amplo sagrado ergue-se l'amponente i sólida fachada catedralícia, marcada pulas altas i poderosas torres sineiras retangulares, cubiertas por pequeinhas cúpulas cun sbelto lhanternin. La parte central de la fachada ye rematada superiormente por balaustrada i sbelta cruç barroca de fierro fraugado, sendo fuortemente marcada pul austero i monumental portal nobre maneirista, zambuolbendo-se an cumposiçon retabular de dous andares i rematado por cruç lhatina. L portal ye ritmado ne ls dous pisos por pares de sbeltas colunas, lhadeando l'arco de buolta purfeita de la puorta i l janelon axial superior. La cantarie de ls dous pisos de la fachada ye rasgada por uito sóbrias jinelas, rializando parte de l sistema d'eiluminaçon de l'anterior de l templo.

Na parte anterior de la catedral queda un jardin, adonde se antegran ls restos de l monumental claustro granítico quinhentista, seriamente danificado por un ancéndio oucorrido ne ls ampeços de l sieclo XVIII. Son inda besibles las galeries de l piso térreo, culs sous arcos abatidos assentes an pedamiegos quadrangulares.

L'anterior de l templo apersenta cuorpo de trés nabes debedido an cinco tramos i traseto mui zambuolbido, ambas las árias cubiertas por bóbedas de brício decoradas cun nerburas i reforçadas por arcos torales, assentes an pedamiegos de l'orde toscana.

L cuorpo de l'eigreija ye prenchido por un cunjunto de 12 altares i retábulos an talha dourada, obras que ban zde l stático maneirismo quinhentista, passando pul austero barroco nacional, até al mobimentado i túrgido barroco joanino setecentista, anriquecidos inda por guapos eisemplares de pintura i scultura de ls sieclos XVI-XVIII.

La capielha-mor ten un belíssemo retábulo de talha dourada maneirista, yá cun lhaibos decoratibos de l proto-barroco seiscentista. Cuncluída an 1614, la sue outoria debe-se al mestre spanhol Griegório Fernandez. Çpuosto an dous andares i debedido por colunas, nel púoden ouserbar-se bárias státuas de santos i relebos referentes a la bida de Cristo i de la Birge Marie. L çtaque bai para un soberbo Calbário, cunjunto scultórico de grande tenson dramática. Rialça-se inda neste magnífico ambiente de talha dourada l eisuberante uorgon barroco de l sieclo XVIII i l'eiquelibrado cadeiral maneirista de Quenhientos, cumpuosto por spaldar d'arcaries cun pinturas, lhadeado por colunas coríntias i rematado por dossel i friso de lhinhas barrocas ondeantes.

Correçon-l "Dous de Febreiro" (fiesta de Nuossa Senhora de las Candeias) dastanho ye die 3 de l més que ben

-Ne l die 02/01/2013 publiquei eiqui ua ambora cul titalo l "2 de febreiro" dastanho ye i die 10 de febreiro, por rezones de logistica de l restourante i de la paroquia ten que ser l deimingo die 3 de febreiro, assi las mies çculpas i la correçon.

L tradecional cumbíbio que l’Associaçon Cultural i Recreatiba “Nial de la Boubielha” (ACRNB) pormobe to ls anhos, antanho ye ne l deimingo, die 3 de febreiro.

Esta fiesta ten para todos las zenízienses, sous familiares, amigos i cunterráneos un special i perfundo segneficado, puis la sue nomeada i festeijo ben de tiempos bien datrás, siempre n’aldé de Zenízio, se festejou l die de Nuossa Senhora de las Candeias, tamien mui conhecido antre to l mundo pul dous de febreiro.

Era ua fiesta i ainda ye, adonde nun solo las deboçones  se rebelában, mas tamien l sprito spitaleiro de l pobo de Zenízio, nesse die las famílias ajuntában-se i naide quedaba ne l terreiro de la fiesta sien cenar, fusse de que aldé fusse, pariente, amigo conhecido ou çconhecido, ls rapazes i rapazas cumbidában-los para s’ajuntar a la mesma mesa.

Agora, agarrados als mesmos percípios, i acumpanhando l’eiboluçon de ls tiempos, mais ua beç la Direcion de l’Associaçon pormobe l cumbíbio de l “Dous de Febreiro” , adonde todos stan cumbidados para relembrar i cumbibir.

Nota: Bien debrebe l porgrama será eiqui divulgado i ne l site de l’Associaçon www.nialdelaboubielha.org .

PAULO MEIRINHOS

 

 

Paulo Meirinhos, (Miranda de l Douro, 1972) Musiqueiro i porsor de música, Lhicenciado an Eiducaçon Musical pula Scuola Superior de Eiducaçon – Anstituto Politécnico de l Porto. Frequentou l Cunserbatório de Música de l Porto adonde studou Guitarra Clássica.

Frequentou l curso de Doutoramiento an Música Mobimiento i Drama na Ounibersidade de Salamanca, Facultade de Stória i Geografie adonde treminou parte curricular de l curso.

Eiserce funçones de Téquenico Superior de Música ne l Munecípio de Miranda de l Douro adonde ten lhiebado a cabo ua série de porjetos ne l ámbito de la promoçon de la cultura mirandesa: ansino de strumientos musicales tradecionales (gaita de foles i percussones), danças mirandesas i derige l Coro Anfantil de Miranda de l Douro.

Dedica-se a la custruçon de bários strumientos musicales, cumo la rabeca i de percusson, cumo l pandeiro mirandés, l qual dotou de nuobas possibelidades téquenicas.

Depuis dun percurso por bárias bertentes de la música, atualmente dedica-se a la música tradecional de Trás-los-Montes cun special ancidéncia na Tierra de Miranda. Neste ámbito, fundou an 1996 l Grupo de Música Tradecional Galandun Galundaina i l'associaçon cultural cul miesmo nome.

Ten eiditado i colaborado an bários diçcos de recuolha de música tradecional, (Modas de Dúes Eigreijas 1989, Gueiteiros del Praino Mirandés 1999, L’alma 2000, Galandun Galundaina L purmeiro 2002, Galandun Galundaina Modas i Anzonas 2005, Galandun Galundaina Senhor Galandun 2010) i ourganizado bários eibentos que ténen por base la tradiçon de la Tierra de Miranda (Rezosa - Festibal de Cultura Mirandesa que se rializa zde 1989 i L Burro i l Gueiteiro que bai yá na 10ª eidiçon).

Ye Formador de l Cunseilho Científico-Pedagógico de la Formaçon Cuntínua nas seguintes árias i domínios: Eiducaçon Musical/Música, Spressones (Musical), Didáticas Specíficas (Música).

Lhecionou ne l Anstituto Piaget antre ls anhos de 2000 i 2005 adonde fui cordenador de l curso de Eiducaçon Musical i de Prática Pedagógica na Bariante de Eiducaçon Musical, i zampenhou bários cargos antre ls quales, de persidente de l Cunseilho Cunsultibo de la Direçon.

Cul grupo Galandun Galundaina de l qual ye musiqueiro zde la sue fundaçon, ten dado cuncertos ne ls percipales palcos i festibales de l paíç i ne l strangeiro (Spanha, Fráncia, Almanha, Bélgica, México, Cuba, Brasil, Malásia, Cabo Berde...).

A M - Augusto Moreno

Eiducador i filólogo pertués,  Augusto César Moreno naciu a 10 de nobembre de 1870, an Lagoaça,  Freixo de Espada à Cinta,  i faleciu a 2 d'abril de 1955,  ne l Porto.  Formou-se na Scuola Normal Purmária de l Porto (1887-1890) i fui docente an bárias localidades,  cumo Mogadouro,  Aldé Galega de l Ribateijo (Montijo) i Miranda de l Douro. 

 

L sou antresse pul ansino lebou-lo a participar an bários cungressos, até qu'an 1900 se tornou membro de l cuorpo docente de la Scuola de Halbelitaçon pa l Magistério Purmário de Bergáncia.

Eisigente na sue profisson,  l'antresse pula léngua materna i pul ansino lebou-lo  a aperfeiçoar i aperfundar ls sous coincimientos,  tenendo-se tornado coincido,  nun solo cumo porsor mas tamien cumo filólogo,  gramático,  pedagogo,  poeta  i prosador.  Ye outor d'obras cumo Moral i Eiducaçon Cíbica (1933),  Liçones de Lenguaige (4 bols., 1937-39),  Gramática Eilementar (1939) i Dicionário Cumpleto de Léngua Pertuesa (1962),  antre outras.

 

Debido a porblemas auditibos que le causórun xordeira,  retirou-se de l'ansino an 1924,   tenendo regressado al  trabalho nuobe anhos mais tarde,  desta beç cumo rebisor literairo na Casa Eiditor Figueirinhas,   a cumbite de l duonho António Figueirinhas.

An 1935 mudou-se pa la cidade de l Porto,  cuntinando l'atebidade literária i pedagógica.

 

Dou un amportante cuntributo al studo de la léngua pertuesa atrabeç de ls artigos que screbie para bários jornales i rebistas,  cumo,  por eisemplo,  l Purmeiro de janeiro (respundendo a preguntas subre prosódia),  Rebista Nuoba,  de Trindade Coelho, Rebista Lusitana, de Leite Vasconcelos,  i Eiducaçon Nacional.

 

Fui sócio de l’Anstituto de Coimbra,  lhugar propuosto por Bernardim Machado,  i recebiu l grau d'oufecial de la Orde de la Anstituiçon Pública an 1933.

 

Republicano,  fui persidente i bice-persidente de la Cámara Municipal de Bergáncia passado l'amplantaçon de la República.  An houmenaige a la sue dedicaçon a la tierra i al reconhecimiento de l sou trabalho,  l sou nome fui atribuído a la scuola preparatória de la cidade.

A M (ADRIANO MOREIRA) – mais ua curjidade!

 

 

L Centro Cultural Adriano Moreira, l mais relebante eiquipamiento cultural de la region, fui durante sieclos çtinado a fines eiducatibos. Custruído ne l'anho de 1562 para Cumbento de Freiras Claras fui antregue als Jesuítas adonde fundórun un prestigiado Coleijo. Cula spulson de la Orde ne l'anho de 1759, ende se anstalou an 1766 l Seminário Diocesano; de 1853 a 1968 l Lhiceu Nacional i de 1968 a 1995 la Scuola Preparatória Augusto Moreno.

 

Recuperado ne l'anho de 2004 pul Munecípio, eiqui stan anstaladas: la Biblioteca Municipal; la Biblioteca Adriano Moreira; la Academie de Lhetras de Trás-los-Montes; l Cunserbatório de Música;  Salas de Sposiçones i spácio de mimória de la Cidade.

 

A 05 de Outubre de 2010, la Cámara Municipal atribuiu l nome de l Porsor Adriano Moreira al Centro Cultural Municipal, eniciatiba que simbolicamente houmenageia la grandeza de muitos strasmuntanos, homes i mulhieres qu'al lhongo de sieclos ténen dignificado i enaltecido l'eidantidade strasmuntana, ne l qual l sentido de l deber i d'honra, son marcas de la nuossa Stória.

GORAZES - MOGADOURO

 

 

 

L nome de “FEIRA DE LS GORAZES”, que an mirandês dezíen “Grazes” fui siempre la feira de Mogadouro. Miesmo quando you era garoto siempre oubi dezir que la feira de Sendin era la feira de ls burros, mas bamos a la ourige de l nome “gorazes”:

La chicha marrana, ó goraç, era dada, por moradores i feirantes, an pagamiento de l'ampuosto anual, al senhorio de Mogadouro - Santa Casa de Misericórdia, passado ls Táboras tenéren caído an zgraçia - cujos fiscales, inda an 1768, aparecien ne ls dies de la feira para fazeren la coleta an spece. Ye desse questume de cobrança de l'ampuosto an gorax - ó gorazil, "(...) ua spadua de cochino, a saber, to l quarto delantreiro cun duoze cuostas (...)" - que terá benido l nome Feira de ls Gorazes!

FEIRA D'ANHO DE SENDIN

 

FEIRA DE LS BURROS

La feira d'anho de Sendin fui criada an 15 de Setembre de 1923 pula Cámara Municipal de Miranda de l Douro a requerimiento de la Junta de Freguesie desse tiempo.

 

Ne l requerimiento, la Junta de Freguesie pedie “…la criaçon de la feira d'anho para to la spece de ganado, asenino, muar i cabalar, a rializar ne l die 13 de Outubre de cada anho i, quando, porbentura, la mensal fur nesse die, terá lugar ne l die catorze eimediato…

”Por eiqui se deduç que la feira mensal yá se rializaba die 12, sendo pur esso mais antiga, i cumo passa al die útele seguinte se fur an Sabado ó Demingo, podie anton calhar an die 13.

 Passou a ser coincida por “Feira de ls burros”.

La justificaçon de l pedido ser pa l die 13, ten a ber cula feira de ls Grazes an Mogadouro, pus ne l requerimiento se referie que “…podendo ls feirantes, quando assi l zeiáren, i sin trastorno de maior seguir passando deilha pa la feira de ls Grazes que ten lugar na bila de Mogadouro…” Que cumo se ancontra decumentado, pul menos zde l sieclo XVIII, tenie lugar ne ls dies 15 i 16 de Outubre…”.

La praça de l´aldé

Atrabessar la praça

era ua einorme abintura

até ls pies zalinhában

an acanhamiento de mirares spantados

a fugir d'outros

que zafiában

l'eiquilíbrio de ls çapatos


A las bezes lhembro-me

de las rosas que nun se scundie

i me salien al rostro

i de la priessa d'atrabessar la praça

qu'ouceano brabo parecie

Éramos peixes atoleimados

fuora de l festibal de la lhagona antiga

cántaros d'asa partida

sede de lhibardade i fiesta


A las bezes lhembro-me

de la bida que se perdie

nua cultura arcaica

zajustada

solo eilhes assentában arraiales na praça

i na sue ansegurança

repersentában l papel

que le staba çtinado


Passo agora na praça

na sue rial dimenson

i dou cumigo a cumprobar

la fuorça de la mente

que fai cenairos

çtruoce rialidades

i molda la bida a ua eideia

qu'afinal solo mora an nós


I la fuonte borbulha al fondo la praça

fuorça eimanente de bida

Batida festiba de l coraçon de l'aldé

i alhena als zatinos de l tiempo

rompe l lheito de piedra

i cuntina a manar

cun alegrie de naciente

Curso de Lhéngua i Cultura Mirandesas an Lisboua

L terceiro anho de l quarto curso de Lhéngua i Cultura Mirandesas an Lisboua, ten l sou ampeço die 16 de janeiro de 2013. Las classes ban a tener lhugar na Casa de Trás-os-Montes e Alto Douro, a las 20h30m de la nuite de todas las quartas-feiras.

L curso, astanho tenerá l mesmo zeinho que tubo yá an 2007-2008 an Corroios. Assi, pul ansino de la lheitura, scrita i de la fala, quédan reponsábles ls porsores Francisco Domingues i António Cangueiro. Apuis ua beç an cada més l porsor Amadeu Ferreira queda ancarregado de dar la Stória i Cultura Mirandesas.

Las aulas son an special pa ls alunos que frequentórun ls derradeiros dous anhos, pa terminar l Curso Eilementar de Lhéngua i Cultura Mirandesas, mas tamien para nuobos alunos que quergan ampeçar a daprander l mirandés.

Un abraço arrochado i anté die 16-01-2013,

AMPEÇO DIE 16-01-2013 - A LAS 20H30M.
TOCA A FAZER LAS ANSCRIÇONES EIQUI MESMO.

 TODO L MUNDO SE PUODE ANSCREBER.