Mas quien nun sabe que ls dies d’Agosto ténen todo menos de
pequeinhos, i muito mais taludos bíran quando s’anda a pan i auga, Florindico,
puosto que la pormessa staba paga, mirou pa l sol i botou cuontas a la bida,
era melhor ír-se a tener cun “listo” que se regalaba mesmo stando preso a un
trampo, cula selombra de las touças. Porque isto de ser burro i tener l’oubrigaçon
de lhebar l dunho a la romarie, algua cousa habie de tener de buono, era quedar
na cumpanhie de ls de la sue spécie i dar al rabo para xutar las moscas.
Florindico, nun se fizo murcho, bai de zatar l’arriata i
saltar para anriba de l lhombo, mas assi l fizo assi l burro l chimpou no chano,
bai mais ua beç i bota abaixo, mais un par de bezes i quedar ne l lhombo i
seguir caminho ye que nun habie maneira.
Até que s’oubiu ua
boç rouca i serena que benie alhá de l alto, “bai-te a poner l chouriço
adonde staba”. Florindico, home de fé, que até yá habie feito fé que na
purmeira fuonte íba a dar algun cunsuolo a las tripas, perdiu essa fé. Mas
ganhou fé de que l chouriço si nun era del, i que las tripas por agora nun
s’íban a cunsolar cun aquel manjar.
Caramba, afinal el só tenie tirado un, i San Burtelameu
staba carregadico deilhes. Cousas de la bida, fé ye fé i alguien tubo fé que
aquel chouriço nun íba a ser quemido por Florindico.
Ou serie quel yá
tornaba a star malo?
Bálha-mos ua albarda,
cuontas son cuontas, solo acradita quien quejir.
Sem comentários:
Enviar um comentário