Cuntinaçon
Passamos
l portal de la Casa. Agradable surpresa, ua Casa cun campo, bien amanhada, sous
diregentes recebíran mos de braços abiertos. Ls Galandun Galundaina, un abraço de
amisade, alhá stában para fazer la abertura. Amadeu tenie ua stima mui grande pur
estes ambaixadores de la música mirandesa. Ende estaba l jobe, Fernando
Belezas, que solo coincie de facebook, agora tenie ouportunidade de l cumprimentar
i dar le ls parabienes pula einiciatiba.
Tiempo
de ampeçar, abeixamos a la sala. You iba solo para star i scuitar palabras de la
merecida houmenage, sou cumbidado a ir pa la mesa i alhá m’assentei. L
persidente de la Casa, engº José Maria Gonçalves dá las
buonas benidas i l jobe Fernando fai la apersentaçon.
Alfredo Cameirão dá las buonas tardes an mirandés, agradece l
cumbite an nome de la Cámara de Miranda de l Douro i de la Associaçon de
Lhéngua i Cultura Mirandesa. Apuis fala de Amadeu Ferreira, l grande Home que
fui i ye. Eisemplo de Home houmilde, de grande saber i l grande oubreiro de la
lhéngua i cultura mirandesa. Hoije l pobo mirandés ten ourgulho na sue lhéngua
i cultura. L grande patrimonho cultural i de saber que mos deixou, na scrita:
poesie i prosa, na ambestigaçon de la toponímia i outros saberes. Acrecentou tener
sido un perbileijo coincer i cumbibir cul porsor Amadeu i cunfessou que le
stará eiternamente agradecido, puis fizo del ua persona melhor.
Fui la mie beç de falar. Nun ye fácele para mi falar de
Amadeu, nun solo pula relaçon de amisade de hai muitos anhos fortalecida die a
die para ua relaçon de famílha. Dezia me el muitas bezes: la familha ye a que
mos calha na rifa, ls amigos somos nós que los scolhemos.
An 1976, tenie you dezuito anhos quando lo coinci, an Sendin.
Eiqui fundou ua scuola para ls jobes que nun tenien tido possiblidades de
studar. Fui miu porsor durante dous anhos. Andamos muito tiempo sien saber un
de l outro, reancuontramo nos na grande Lisboua an 1984 i zdende nunca mais mos
zapartamos, mesmo agora sien la sue perséncia fisica to ls dies mos falamos.
Apuis fizo se la lheitura de algues de sous scritos, tanto de
prosa cumo poesie. L ancerramiento de la houmenage fizo lo l persidente de la
Assemblé Giral de la Casa, Dr Francisco Diogo Fernandes.
Fui ua buona houmenage. A mi gustou me i fui cun einorme
alegrie que stube na Casa de Trás ls Montes i Alto Douro ne l Porto a
houmenagear Amadeu Ferreira. Ua cena a la nuite, gustou me.
Parabienes a to ls persentes i un abraço arrochado a Fernando
Belezas que ourganizou todo.
António
Cangueiro
1 comentário:
Buonos dies amigo António
- Stnn mui bien las crónicas, gustei de lher, nun fusse assi nun quedaba a la par de mais esta einiciatiba.
- Einiciatibas de todo l mercimiento quando se trata de l jurista, ambestigador, scritor, porsor i mestre Amadeu Ferreira. Que tanto dou a la léngua i a la cultura. Eibentos adonde la sue mimória i obra steian an çtaque son siempre bien benidos.
- Oubrigado a todos i a bós por mos ponerdes an die cun crónicas assi.
Un abraço arrochado
FAntão
Enviar um comentário