Biaige, palabras i pítulas

Fazer ua biaige al praino mirandés ye siempre agradable, porque l praino ye un sítio guapo, assossegado, spitaleiro i adonde se fala mais ua lhéngua.

Fui-me até alhá la sumana atrasada, por bárias rezones solo stube alhá trés dies, mas fui l bastante para me sentir recumpensado. Porque son-me dadas recompensas an to ls sítios i a las cembas.

Inda bien loinge de l praino, na carreira de Bila Rial a Miranda de l Douro, yá you tenie seinhas dun patrimonho lhenguístico, dues ties que ambersában amigablemiente na mesma biaige dezien ua pa la outra:

 “antanho para alhá d’haber poucas cereijas ls storninhos nien las déixan amadurar”.

Cousa marabilhosa, oubir eili a pie de mi la mie fala, la fala que fui de ls mius antepassados, la fala de la mie ourige, la fala que you falei de garoto i falo, la fala que to ls dies percuro giente para falar, la fala que percuro daprender para melhor screbir nas mies cuontas, adonde registro, palabras i eimoçones.

Solo l oulor doce, l oulor fresco i puro salido de las pítulas de las froles, que acobílhan ls cerrados, adiles, beigas, bordas de caminos, prainuras que mos antra nas narizes s’armana a tamanha sensaçon.

Ye todo este ouniberso que me inche l’alma, porque sou mirandés, que mesmo stando loinge nun hai die nanhun que esso squeça, porque debo a essa tierra al miu modo de ser i bibir.

Porque bibo estas riquezas. La natureza dun sítio cun sues gientes, tradiçones, questumes i balores, este mundo de la lhéngua cumo patrimonho d’ounion, cua eidentidade sien pareilho.

Biaijar anté l paino mirandés, por pouco ou muito tiempo, fui siempre i cuntinará a ser recumpensador, ouferece de todo i de l melhor que hai, paisages i assomadeiros, rutas stóricas i seinhas de pobos antigos, artesano, diberson i cultura, quemer i buer, todo esto an cuntato cul pobo spitaleiro, euducado i respeitador.