Oubi un jornalista dezir, hoije pula
manhana, na rádio France Inter (la rádio cula maior oudiéncia an França):
“José Manuel
Barroso (Ye mui ralo an França las pessonas usáren ls dous apelhidos “Durão Barroso”)... : aquel
que nun diç quaije nada an 10 lhénguas !” (Celui qui ne dit presque rien en 10 langues !)
Se tubisse
tiempo, tamien bos falarie por eisemplo dun artigo eiditado ne l 19 de Junho
passado ne l jornal Le Monde an que l inda atual Persidente de la Commisson
Ouropéia ye pura i simpresmente acumparado a un camaleon !
Mas se todo esso
acunteciu ye porque uns dies antes parece que esse nuosso cumpatriota ("dotado de la faculdade de mudar de cor") achou que
la posiçon de la França era “reacionaira”... Só porque la França quier cuntinuar a defender, an relaçon a l’heigemonie
i al peso de ls Stados Ounidos, antre outras cousas tamien l sou cinema que repersenta ua riqueza económica i cultural sien ningua dúbeda.
L que quier
Barroso afinal ? Que acunteça an França la mesma cousa que an Pertual adonde féchan salas uas atrás de las outras cumo yá acunteciu an Bergáncia por eisemplo ?
L’Ouropa, nessas
cundiçones, repersentada por alguien ancapaç de la
repersentar corretamiente (tenemos mais ua proba eibidente!) poderie correr sérios perigos se naide reagisse. Mas ye ampossible nun reagir. Ye l que stá a acuntecer. Tamien neste cuntinente yá ye tiempo que ciertas cousas múden. Para salir de la situaçon an que stamos. Que só antressa a alguns.
4 comentários:
Buonas nuites Ana Marie,
L'Ouropa stá a tornar-se un triato d'anjustiças.
Quien será l'ansenador i quien seran ls atores,que diariamente mos ouferecen l spetaclo d'anjustiças?
Un abraço,
Leonardo
Buonas nuites a to l mundo.
Ana: quando Duron Barroso se fui pa la Comisson Ouropeia, deixou de se apresentar cumo "Durão" por dues rezones. La purmeira ye que l sonido "ão" - tan quemun pa ls pertueses - ye mui difícele de prenunciar pa outros pobos; la segunda ye que, an buona berdade, José Manuel Barroso ten la manie que ye "Durão" cu ls pertueses, mas cun outros ye mui mole. Chamar-le camaleon ye un ansulto pa ls camaleones. Na berdade, Barroso nun passa de un ouportunista que salta de un partido pa l outro cunforme las cumbeniéncias i que solo pensa an agradar als poderosos pa subir na bida (bonda pensarmos na cimeira de las Lages i na ne l apoio que deu a George W. Bush pa ambedir l' Iraque). De resto, segundo yá li un die destes, ls franceses respundírun-le como el merecie.
Leonardo: nun chamai l triato para adonde nun ye chamado. L Triato ye ua arte nobre, nun ten nada que ber cun esto.
Un abraço.
Buonas nuites Firmino,
Chamei l triato eiqui, porque oubi nun jantar an Peruja/Eitália, ne l passado die 15 de Júnio, mais ó menos esto “la Ouropa stá a tornar-se un triato d'anjustiças i ls atores, qu'ouferecen l spetaclo d'anjustiças, son ls políticos de la Comisson Ouropeia, ls gobernantes de ls países i ls tecnocratas de la Troika”.
Stou d'acuordo cun bós que “L Triato ye ua arte nobre, nun ten nada que ber cun esto”, tanto mais que screbistes ua antressante peça de triato que gustei mui de ler, “Las Grandes Dionísias”. Mas l que se stá a passar agora mesmo an Pertual cul Gobierno parece ser un triato cumo acabei agora (20.40) d'oubir a un comentador de la TV1 António Costa, “acabamos d'assistir a ua pieça d'ancenaçon”, dramática para todos nós ls pertueses, que me fai lhembrar aqueilha frase de las manifestaçones ne l Brasil “nun percisamos de gáç lhacrimogénio, l Gobierno dá muitos motibos pa l pobo chorar”.
You gusto mui de triato, tamien fui ator, quando era studante, fiç de Arauto na pieça “Edipo Rei” i fiç outros papales noutros triatos al lhongo de a mie bida, adonde daprendi a tratar las pessonas de l triato cun mui respeito i a custruir cun eilhas relacionamientos mui fuortes, porque un de ls grandes oubjetibos de l triato ye percurar fazer las pessonas mais felizes.
Bien-habas Firmino por esta ouserbaçon i cuntinai a screbir para esta nobre arte de percurar tornar las pessonas felizes.
Un abraço,
Leonardo
Buonas nuites, Leonardo.
You tamien oubi un quementador qualquier falar an triato i ancenaçon. Ye perciso ua paciéncia!
Quedo cuntento por haberdes gustado de las "Grandes Dionísias". A ber se fazeis publicidade junto de ls buossos amigos.
Un abraço.
Enviar um comentário