Quaije siempre
falo (scribo) de ls eibentos que l’Associaçon Cultural i Recratiba “Nial de la
Boubielha” (ACRNB) pormobe, l que quier dezir que yá l fiç muitas bezes i l
fago hai muito tiempo, porque estes eibentos ampeçórun hai muitos anhos datrás.
Assi sendo,
son mui repetidos, l que se puode dezir que son siempre mais l mesmo, mas nun
ye bien assi, hai siempre que dezir i tenendo muitas cousas an quemun son
siempre defrentes, duns anhos pa ls outros, l sentimento que se bibiu ua beç será
siempre defrente noutra beç. Ye tamien berdade que ls mais de nós somos ls
mesmos, l lhocal adonde ls fazemos tamien, mas l magosto, la fiesta de Nuossa
Senhora de las Candeias, l 1º de maio dun anho, nun ye armano al de l outro
anho atrasado. Hai siempre, an todos eilhes, an cada nuobo anho un renuobo, ua
gana nuoba, mais fuorça para partecipar.
Bonda saber
que l que mos mobe ye cumbíbir, falar, participar, jogar, mantener las tradiçones
i questumes, falar culs amigos, cunterrános, para que todo esso tubisse sentido i amportáncia.
Bibimos esses dies cun muita alegrie, cula certeza que stamos antendendo l sentimento
de la quemunidade, que l que fazemos hoije ten muito haber cula hardança que mos
deixórun ls nuossos cunterráneos que yá partírun, i que nun será pul nuosso
lado que las geraçones feturas nun ban a cuntinar a cumbíbir.
La mimória coletiva
i associatiba tamien percisa de quemido, estes ancuontros i cumbíbios ténen
tamien esta funçon, percísan de celebraçones, a miu ber quando nun ye assi,
mais cedo ou mais tarde muorren-se i cun eilhas bai agarrado todo un patrimonho
houmano i cultural.
Scribo eiqui
i noutros sítios de l’anternete siempre subre estes eibentos, porque antendo
que la sue dibulgaçon ten sentido, esta calentura que mos bai andrentro, debe
ser partilhada i dada a conhecer a todos.
Nun sei
tamien se la mensaige chega loinge, se tamien ye bien bista por todos, mas esso
pouco amportará, mas ua cousa you sei, ye que ls ancuontros i cumbíbuios de ls
Zenízienses i amigos ténen muita amportáncia
Sem comentários:
Enviar um comentário