24/01/11

Nun riu


Lhebadas las sedas pul tiempo
Rufada la piel que las cobrie
Bonda-me, sien un lamento
L´auga a correr menos frie
Ne l riu adonde nabego, lebe

Las bordas ampáran l speilho
Adonde me miro tranquila
Ls delores siguran l leito
Prenhado pu la bida
Nun bibir de quien s´astrebe

Nácen flores ne ls sous lhados
Freixos, silbas i salgueiros
Adonde siguro las eimages
De suonhos siempre pormeiros
Para que an suonhos m´eilebe

Deixou-me l tiempo la magie
Tecida na mie eisséncia
Deixou-me l tiempo ua squina
Cun ua manada d´einocéncia
Para que algua nineç cunserbe

6 comentários:

Abelhon disse...

I bien cunserbada:)
Chi

Adelaide Monteiro disse...

Ei Abelhon

Como te tenes amanhado cun tanto friu i sien flores adonde cuolhas l puolo?! Yá quantá que nun te bie.
Bien haias. Tengo dies, Abelhon!
Outros hai, an que la nineç se scamuje.

Un chi

AF disse...

"Deixou-me l tiempo ua squina / cun ua manada d'einocéncia..."

Guarda bien essa squinica
bs.
A.

Fir disse...

Belo poema, Delaide.

Nun quereis ambiá-lo pa la "fuolha poética"?

Abraço,

Fir

franciscobelharino disse...

Buonas tardes Delaide,

Ye cun essas squinicas que mos lhembram la nuossa nineç d' einocéncia, que bamos lhebando esta bida inda cun algua alegrie i sprança ne l feturo.
Bien haias,
Francisco

Adelaide Monteiro disse...

bien háiades amigos.
Fir, bou a tratar desse assunto. Uobrigada por haberes dibulgado.

Beisicos

D.