31/10/09

San Martino




Fui cun las bacas pa la Rebolheira
L die de San Martino,
Lhebei un cerron de castanhas
I ua calabaça de bino.

Juntei-me alhá cun Juquin
Mais conhecido por Manhas,
Queimemos un gabelhon
Para assar las castanhas.

Fazimos nós l magosto
No bailhe de la Rebolheira,
I pra zbolhar las castanhas
Chegou ua cumpanheira.

Era Marquita de l Prado
La filha de l capador,
Ye la rapaza mais guapa
Qu’hai por eiqui alredor.

L bino de la calabaça
Inda staba mal cortado
Fazien-le falta las geladas
Que benírun l anho passado.

Açpuis de l bino buido
I quemidas las castanhas,
Quedemos a oubir lhonas
Que cuntaba Juquin Manhas.

Nisto chegou outro home,
Era un tiu yá bielho,
Faltaba-le l gabelhon,
Cun que tapaba l portielho.

I perguntou-mos por el
A ber se l habiemos bido,
Inda staba alhi la cinza
Las silbas tenien ardido.

Çcunfiando de la berdade
Mostrou-se mui oufendido,
I nós para l cuntentar
Dezimos-le se era serbido!

Sentou-se i aceitou.
Anté mostrou outra graça,
I de l bolso de l capote
Sacou ua calabaça.

Pul camino de l Berdugal
Benie outra tie de Augas Bibas,
Cun la ruoca na cintura
Na jabeira traie strigas.

Arrimou-se al pie de nós
A cuntar las sues larotas,
I dalhi a pouco tiempo
Yá só tenie maçarocas.

Sacudiu las sues baquitas
Birou pul mesmo camino,
Mas antes dixo assi:
Adius moços, anté outro San Martino.

La borralheira apagou-se
L bino habie-se acabado,
Las castanhas yá quemidas
San Martino bien passado.




2 comentários:

Abelhon disse...

Bá! andas adelantrado no San Martino. Cumprende-se. debe ser de la pinga cun que molheste ls belhós. I nun apanheste ningua mamota? suorte la tue.

Abraço

franciscobelharino disse...

Buons dies Felç,

Guapos bersos subre las castanhas i l San Martino. You quando por ende andaba tamiem fiç muitos magostos i queimei alguns gabilhones de ls boqueiros de ls cerrados, outras bezes éran las silbas que stában a tapar algua parede.
Nós eiquei por Lisboua inda que nun haba gabilhones para assar las castanhas, inda bamos fazendo l nuosso magosto anual ne l die de todos ls Santos i an beç de gabelhones i silbas alhá bamos arranjando caruma de ls pinhos, ramos d´oulibeira i outros palos secos. Fui assi que mais ua beç L' Associaçon Nial de la Boubielha fizo l sou magosto an Corroios, adonde se ajuntórun arrimado a quarenta pessonas a quemer belhós i a buer uas pingas. Este magosto ampeçou an 1975 i zde esse anho inda nunca falhou.

Un abraço,

Francisco