Quaije se puodie dezir que ne ls dies que cuórren l que sobra de buono para l ser houmano ye la buona cumbibéncia.
Mas tamien podie dezir sien m’anganhar muito que esto fui siempre l que sobrou, puis tiempos strampalhados i dies amalinados siempre hoube, custosos d’antender, que ancarambélan l coraçon de quienquiera, cumbídan a solidon anrezinando-mos pur todo i pur nada, rebólben l soto de las recordaçones i las lhembráncias píden tiempo, bótan la nuossa bida al Dius te me dou.
L’Associaçon Cultura i Recreatiba Nial de la Boubielha (A.C.R.N.B de Zenízio), naciu nun tiempo an que las gientes de Zenízio a bibir an Lisboua i sous alredores nun tenien cundiçones de s’ír a sue tierra amenudas bezes, mas las ganas de saber de ls sous i las amboras d’alhá éran muitas, ancuntrórun na cumbibéncia l modo d’atamar esse formieiro que ataca sien se ber, las suidades.
Scolhírun l die de Todos os Santos (l purmeiro de Nobembre) para s’ajuntar, para se béren, cumbersar, saber uns de ls outros, botar eideias, cumbíbir cumo quemunidade, fazer un magosto i saborear ls belhós.
I assi ten acuntecido çque ampeçou hai trinta i cinco anhos, siempre l’Associaçon pormobiu este ancuontro. Na mimória de ls tiempos, hai que dezir-lo, ye de lhoubar l ampeinho i sfuorço que ls repunsables siempre botórun para que ls Zenízienses sous familiares i cunterráneos s’ajuntassen i cumbibissen
Zde la purmeira hora se rebelou saludable, i outras einiciatibas nacírun para ajudar a medrar esta quemunidade tan amiga i amante de las tradiçones, questumes i sperta pa la cultura de la nuossa region.
L die de “Todos os Santos” cumo fiesta purmeira de la nuossa Associaçon cuntina bien atual, cuido you, porque hoije tamien las pessonas percísan de cumbibir, tener tiempo i oucasiones para zabafar, acalcer l’amisade que ye l que sobra quando ls tiempos son çfíceles, machorros, i quieren lhebarmos de mansico pa l scampado de la solidon.
Ls magostos fúrun siempre un spácio, un lhugar adonde cáben todos, i ténen que cuntinar a ser-lo.
Que modo mais guapo hai que este para tener proua an ser Zeníziense?
-You cuido que nanhun. Ls afazeres (lhabutas) de las nuossas bidas ne l die a die nun mos deixa tiempo nanhun, anton ye ou nun ye berdade que ye nestes ancuontros que apertamos las manos, damos abraços als amigos d’anfáncia, de scuola, zanferrujamos la nuossa lhéngua, zanterramos las nuossas abenturas.
Ls ancuontros i cumbíbios solo se fázen pa las pessonas i culas pessonas, pur esso you siempre acredito na sincera mensaige de la Direcion de l’Associaçon.
Ne l próssimo die de “Todos os Santos” (1 de Nobembre) béngan todos al magosto, que son bienbenidos.
Nota: Estes retratos son de ls magosto de ls anhos atrasados
An 2008
An 2008
An 2002
An 1999
An 1980
2 comentários:
Caro Faustino
Pus l magusto ye assi ua spéce de l´aldé de Zenisio un ponto pequeinho. Mas stá alhá todo. L miesmo sentir, la mesma suidade.
Ye cousa para cuntinar
Un abraço
Válter
Caro amigo Faustino i caros associados i amigos de ls zenizienses!
La Direcçon de L’ACR Nial de la Boubielha cuntina lhuitando para que esta tradiçon nun se muorra.
L maior balor que ten este i ls outros cumbíbios, ye l de la Amisade que se bai mantenendo i criando antre las pessonas que neilhes partecipan.
Pur esso, caros associados i amigos de ls zenizienses, que teneis coincimento de l extraordinário balor de la amisade, nun deixeis de benir l Magosto.
Cuomo screbiu Faustino, “ls magostos fúrun siempre un spácio, un lhugar adonde cáben todos...Nestes ancuontros apertamos las manos, damos abraços als amigos d’anfáncia, de scuola, zanferrujamos la nuossa lhéngua, zanterramos las nuossas abenturas".
Al participar no magosto, stamos a cuntribuir pa la felicidade de todos ls outros i, pa la nuossa berdadeira felicidade.
Pur esso “ne l próssimo die de “Todos os Santos” (1 de Nobembre) béngan todos al magosto, que son bienbenidos”.
Un abraço,
Leonardo
Enviar um comentário