10/10/09

L bruxedo anfernal



Fuorte carraspana you apanhei
Neste demingo passado
Dórun las bruxas cumigo
Achei-me an casa deitado


Bós ende senhor bino
Nun bos admito chalaça
Nun bos métades cun quien passa
Deixai-me cun miu çtino
Nun me tumbeis ne l camino
Que you nun bos anquemodei
Fuste tu que you bien sei
Acunteciu sien abiso
Por cousas que l bino fizo
Fuote carraspana apanhei

Cheguei eilhi al baladinho
Al mancebo de l migalha
Quando ua pata me falha
Lhougo eilhi perdie l camino
Bou i meti de çofino
Cai drento dun balado
Eilhi quedei sparnacado
Sien me poder lhebantar
Passei la nuite a beilar
Este demingo passado

Bou lhebantar-me nun podie
À cumo la cousa stá
Las patas dezien anda alhá
Mas la cabeça nun querie
Era asneira que ferbie
Falaba solo cumigo
Quando me lhebanto i sigo
Meti pula ribeira fuora
Que bai a ser de mi agora
Dórun las bruxas cumigo


Tan pouco fazer-me mal
Fui l que mais admirei
Na porçon que calculei
Quinze quartilhos i tal
Mas l bruxedo anfernal
Cercaba-me por to l lhado
Por eilhas fui agarrado
Traie-me de lhado a canto
A las trés horas i tanto
Achei-me an casa deitado

José António Esteves




3 comentários:

Adelaide Monteiro disse...

Á amigo Zé Antonho, essa si fui de ls fuortes!
Mui guapos estes bersos i chenos de buona desposiçon.
Beisicos

AF disse...

Mui bien amigo José António,

Faziste-me lhembrar l Teçtamiento de Maria Parda de Gil Vicente, que un die destes yá l bou a publicar an mirandés neste nuosso blogue.
Bien háiades por tan guapos bersos i que nunca se bos seque l beneiro.

Un abraço,
Amadeu

José Esteves disse...

Buonas tarde.
A las bezes ye preciso
Agarrar ua buona carraspana para afuogar las maugas. Se bien que las mies yá nien cun carraspanas se ban, queilhas yá d´aprandierun a nadar.
Saludos i ante outra beç.

José António Esteves