15/10/09

Anda un cuorbo na berjeira



Anda um cuorbo na berjeira

A cata de la lhumbriç
La coquelhada amarradeira
Al pie del nada le diç.

Speta l bico no chano,
Alhebanta la cabeça,
L sfuorço nun será bano
La lhumbriç que le apareça.

Sgarabata cun las patas
No meio de la yerba berde
Chega a achar carrapatas
Se ua canhona las perde.

Ai cuorbo páixaro malo
Que atrais la mala suorte
Merecies era cun palo
Porque adabinas la muorte.

Anda un cuorbo na berjeira
A cata de la lhumbriç,
La chínchara na freixeira
Diç-le: “tente na raíç”.



3 comentários:

AF disse...

Guapo l tou poema Félç.
Tamien nós cuntamos la cuonta de la «chincha raíç».
Mas quien nun sabe pregunta i eiqui bai la mie eignorança: splica-me alhá bien l que ye ua «berjeira».

Un abraço amigo poeta,
Amadeu

Félç disse...

Amigo Amadeu, quedo mui cuntento por ser aluno i ansinar l porsor eheheheheh.
"Berjeira" chaman-le an Fuonte Aldé i tamien yá oubi esta palabra noutros lhugares, àqueilhas partes mais frescas de ls cerrados, onde la yerba queda berde mais tiempo.
I agora aprobeito para acrecentar na anformaçon que dei eiqui a tiempos sobre ls topónimos de la mie tierra: - la Berjeira de las Silbeiras, la Berjeira de Balongo, la Berjeira de Camino de Picuote i la Berjeira de la Lhameira, antre outras.
Estas berjeiras que nomiei situam-se no bailhe de Fuonte Aldé, cunsanto se bai no sentido sul/norte de l lhado dreito de la strada.

AF disse...

Bien haias Feleç pula tue repuosta, que esta nuite yá aprendi mais algue cousa.
You tengo essa palabra ne l miu dicionário, mas nun tenie esse sentido i por esso you preguntei, puis quedei cun dúbedas. L que alhá stá, nesse dicionário, era l seguinte:

berjeira s.f. 1. Pequeno terreno plano junto a um curso de água. 2. Leira.

Agora yá quedou mais cumpleto. Sabes, Feleç, hai que daprender cun quien sabe i you siempre fiç assi.
Inda porriba l porsor me ansinou mais uns chamadeiros. Se soubires de mais beijeiras nun deixes de dezir.
Esto ye l que se chama agarrar dous coneilhos cun ua sola caiatada.

Un abraço amigo,
Amadeu