Nuossa Senhora de l Naso
Hoije bos bengo anquemandar
L que sobrou deste home
Que ye pa la Senhora l guardar.
Fui só isto que sobrou
Daquel terrible acidente
Dai-le agora la buossa bençon
Que l teneis a la buossa frente.
La buossa bençon bos pido
Para almiar ls caminos
Deste cachico de home
Culs buossos poderes debinos.
Neste die anternacional de l eidoso
Senhora, nós bos benimos a besitar
I bos queremos pedir
Haber se mos podeis ajudar.
Agora que yá somos belhicos
Mie Senhora, mie Senhorica
A ber se la Senhora mos puode dar
Na nuossa bida ua ajudica.
Se nun fur muito you pedir
I la ajuda nun se bos acabar
Pido-bos tamien la buossa bençon
Pa l miu querido lar.
Botai ls uolhos por Bumioso
A ber se la cousa muda
Que stá alhá l lar de S. José
A percisar de la buossa ajuda.
Pido pa las sues funcionárias
Diretores i diretora
Tamien para todos ls outentes
Mirai por todos agora.
Mirai por nós Senhora de l Naso
Ajudai la nuossa bida
Que sien la buossa ajuda
Seguro que stará perdida.
Somos ciento i tal pessonas
Antre ls outentes i quien cuida de nós
Eiqui stou you mie Senhora
Anquemenda-los a todos, a bós.
Mirai por nós Senhora de l Naso
Percipalmente por quien bos aborrece
Nós quedaremos mui felizes
I l S. José bos agradece.
Agradece el, i agradecemos-bos nós
Eiqui naide pensa l cuntrário
Oubrigado por nos acolherdes
Hoije eiqui ne l buosso santuário.
Tamien pa ls outros lares
You bos pido mie Senhorica
Que eilhes bien merécen
Tamien ua ajudica.
Pa ls outros que alhá quedórun
I pa ls que stamos neste lhugar santo
Pido-bos you Santa Senhora
Tapai-mos a todos cul buosso manto.
Stendei-mos Senhora l buosso manto
Para todos poder-mos passar
Só assi ye que la nuossa bida
Tenerá rezones para eilha brilhar.
Oubrigado Senhora de l Naso
Por mos fazerdes cumpanha
Que assi cula buossa ajuda
Esta giente bien s´amanha.
Yá me bou you a çpedir
Mas queda eiqui l miu coraçon
Que you yá bou fortalecido
Cula buossa proteçon.
Mais ua beç muito oubrigado
Por neste die mos acolheres
Cumo siempre Santa Senhora
Cumpriste culs tous deberes.
José António Esteves
2 comentários:
Buonos dies,
Bersos guapos, santidos i chenos de eimoçon!
Un pedido assi, nun bai ser recusado pula certa.
Ls buossos bersos traien siempre la fuorça que eimana de giente fuorte i cun curage.
Un abraço,
Antonho Cangueiro
Oulá amigo Jesé
Cumo siempre la fuorça de l querer, l'eimoçon i l sentimiento stan agarrados a las palabras que botais ne ls buossos bersos.
Nuossa Nenhora de l Naso ha de star siempre acerca daqueilhes que la benéran i tráien ne l coraçon.
Gustei muito destes bersos.
Sabeies que dua buona parte de l termo de Zenízio siempre se bei l Santuario? Quantas nun teneran sido las bezes que guardado l tagalhico de canhonas nun fiç pedidos a Nuossa senhora!
Segredo mius i deilha, i quien nun ls ten?
Un abraço Arrochado
Faustino
Siempre la fuorça de
Enviar um comentário