Salidos destas froles mirandesas

Destas froles yá nacírun

Quatro nuobos scritores

Que mos mostórun an scrita

Alguns de ls sous balores.

José António Esteves saliu-se

Cun Ls Bersos de Jantonho

Que mos mostrou un cheirico

De l que sabe aquel demonho.

Que mais tenerá scundido

An sue arca de registo

Se nun mos dezir mais nada

You yá quedo cuntento cun isto.

An registo debe el tener

Outro lhibro scundido

A ber se mos l diç a nós

Para que nun quede to perdido.

Se l ponires noutro lhibro

Yá perdido nun quedará

I nós quedaremos a saber

L que scundido ende stá.

L Purmeiro Lhibro de Bersos

Mos trouxo Fonso Roixo

El diçque que ye, you digo nó,

El nun ye ningun coixo.

Fonso Roixo só podie

Salir-se dessa maneira

Ó nun fura el un porsidónimo

De l porsor Amadeu Ferreira.

Bersos guapos el mos trouxo

L senhor Fonso Roixo

Sendo assi, nun me dígades

Que bós sodes un coixo.

Coixo bós nun sodes nada

Acabou-se la çcurçon

Porque L Purmeiro Lhibro de Bersos

A mi me dá la rezon.

Alfredo Cameirão Cun Tortulhas

Cuontas deste Mundo i de l Outro

De bien que me sabien

Até me soubírun a pouco.

Aqueilhas cuontas de bruxas

I las outras tamien

Quedórun a saber a pouco

De l bien qu'eilhas sabien.

Yá passado este tiempo

Penso ne l que mos trairá a seguir

Qu'estas fúrun tan buonas

Qu'inda hoije me stou a rir.

Nós bos stamos sperando

Tiu Alfredo Cameiron

Yá mal you puodo sperar

Pula nuoba oucasion.

I Cuontas Sacadas de la Bida

Nuobas Fábulas Mirandesas

Mos amostrou Faustino Anton

Que mos trazírun tantas belhezas.

Ten ua sabedorie sien fin

Spero que nunca s'acabe

Deixou-mos eiqui un pouco

De l muito qu'el sabe.

Botai mais acá para fuora

Para nós sabermos mais

Al screbirdes estas cousas

Ye ua alegrie que mos dais.

Yá çpuis de ler-mos este

Que mos soubo a pouco

Ye tiempo de bos percurar

Quando ye que screbeis outro.

Pronto, isto astanho fui assi

L de pa l anho bós me direis

Estes salírun destas froles

A ber se bós tamien aparceis.

José António Esteves