La rojura de la lhata

Siempre l pobo dixo que meter las narizes adonde nun se ye chamado dá malo resultado.

Mas tamien to l mundo sabe que nun ye solo quando se mete l nariç, las manos, mirar tamien dende nun ben cousa buona.

Fui l que acunteciu al garoto de la mie benzina i amiga Anicas, i bamos a ber se you me dou bien meter-me na bida deilha cuntando esta cuonta, que sendo eilha que me la cuntou tamien nun me dixo que nun era pa la screbir.

Anicas fui bien abinturada pula suorte. Quando moça era de las rapazas de l lhugar más sbeltas, anté habie quien dezisse que se fusse filha de tiu Antonho Agusto outro galho cantarie. Çpuis de casada fui-lo cun trés ninos, trés garotos que quijo Dius séren ls más guapos i zampolhinados de l Bárrio de Belharino. Hoije homes taludos i fuortes que na temporada de l’eimigraçon se scapórun a fazer pula bida nas tierras de l’Ouropa, i cumo lhebában la tempra de mirandeses i stramuntanos ende birórun trabalhadores eicelentes, atletas i anté ampresários.

Pul sou ampeinho, dedicaçon, smero, houmildade nun fúrun poucas las bezes que criórun ambeija, bingando assi a la par de ls demás, chubindo na scaleira social i cultural, metendo na cerrona las necidades que stában agarradas i coladas de la region i paiç.

Mas s’Anicas dantes tenie ourgulho de la buona mai q’era, hoije la proua de ser la “grand-mère”, nun ye más pequeinha, porque ls filhos i nuoras le bótan nietas ne l regaço i algazarra por to la casa i sítio adonde ls criou. Tamien ye berdade que nun sconde las trabessuras de ls tiempos queilhes éran desse tamanho i cundiçon.

I fai-lo cun alegrie i muitos suspiros de suidades, cuntando-me ls cuidados, sustos, cobradeiros de cabeça que le metírun al lhongo de la bida.

Por esso me dezie de la redadeira beç que falemos deilhes: mira tu que l más nuobo ua beç quando la fornada cozie fui-se a meter las narizes na boca de l forno, agarrando na lhata que la tapaba, por bias de querer sacar un rosco!

La rujura de la lhata que tapa la boca era tamanha que l garoto nun fui capaç de quedar calhado i nun mirandés purfeito, sacudindo las manos botou-se a rogar pragas, “ la puta de la lhata si stá bien caliente”.

You que m’ambaiaba a barrer l chano nien quedei an mi, por bias de cuidar que l garoto podie quedar queimado nas manos.

Mas el si era i inda ye lhambisqueiro, todo l que nun fur amargoso, gosta.

Faustino Antão