Buonos dies, Praino!, mie casa

Inda stá cun ls uolhos cerrados l´aldé a esta hora de la manhana, an que todo ye siléncio. Inda nun golséian fumo ls chupones i, ls eiderdons lhebes cúbren ls cuorpos drumidos i acócan rostros i cuorpos angaramonados ou cun perguiça para madrugar. Las mantas que antiempos ls cubrien, pesadas pul ancalcar de l pison, sírben de acunchego al chano friu i als pies, ou énchen-se de polielha an arcas, çquecidas.
Spreitando pal Naso sinto que las Senhoras tamien inda stan stremunhadas na eigreija, anque eilhas alhá ne l alto de l cabeço recíben l sol uns minutos antes de mi.
Al poente, las carbelheiras salúdan-me cun sous ocres i ls terrenos znudos stan brancos de gelada.
La Sierra de Senábria yá abriu ls uolhos i aparece-me ne l hourizonte, mirando-me cun uolhos brancos.
Neste çpedir de l Outonho, sigúran-se ls pinzones de las fuolhas andebles que mui debrebe seran xaragon a ua tierra atrecida. Yá ls gromos de las cereijeiras s´amóstran cumo teticas de ninas a queréren zancaroçar la sue puberdade, nesta natureza de las cousas begetales bien mais afertunadas que nós gente. An cada die l´outonho mos bai tirando fuolhas que sabemos nun mos traieran gromos na primabera.
Scassamente me dou tiempo de screbir estas letras boubas i yá las carbalheiras de la Moura stan mais relhuzientes cun l nacer de sol scalretado a anunciar mais un die cun lhuç clara dun sol que stá acerquita i mos ancandila l uolhos i l stigmatismo mais mos apoquenta a slhagrimonar.
Debrebe la aldé spertará de sou turpor i las pitas ancomeçaran a festejar la salida de mundos brancos que cágan quaije que todos ls dies, l galho bai ampeçar a namorá-las para las angalhecer i nuoba família de piticos há-de salir cumo bolretas amarielhas, tapadicos cun ls eiderdons de prumas i deitados an cama de palha..
La lhuç yá m´entra pulas jinelas a naciente, apago las bumbielhas i ye outro die de nuobas abinturas cun la mie netica, a medrar a uolhos arregalados i que cada beç mais sorbe esta guapura de praino de abós mirandeses. Muita cousa há-de tener para cuntar na scolica, quando, na sigunda aparecir cun la sue cerronica chenica de aprendizaiges nuobas.
La bida ye isto mesmo: Cousas simpres, buídas siempre cun la sede que nun hai nada que l´atame la secura.
Buonos dies, Speciosa!, mui bércio. Buonos dies, Praino!, mie casa.