19/11/12

Miu cumpadre Zé


You pensaba quel starie alhá para l Alentejo, porque el habie hardade la casica de ls pais, fazira uas oubricas para passar alhá uns tiempos balientes çpuis de se reformar.

Mas anton nun ye que inda mal passoran dues sumanas i yá staba outra beç de buolta. Al bé-lo eili, fui-le a falar.


Á cumpadre anton yá benistes?

O!..., sabeis alhá cumo las cousa stan puli.

Anton l que se ten passado?

Pus oulhai. Purmeiro fechoran ls curreios. Agora las cartas i outras cousas ye quando calha. A seguir fui la scuola, porque yá nun habie garotos, e tal i tal...Cpuis fui la guarda, la GNR, agora nun se buoltoran a ber. Seguiu-se l serbício de salude. Agora naide pude ficar malo, ou anton murre-se. Segui-se l tribunal. Nun ye que you guste de tribunales, mas son necessairos. Agora ye la junte de freguesie, era l que restaba a las pessona para socorrer ua urgência.

Muito me cuntais bós.

Oulhai sabeis l que falta fechar, ye l lar de ls bielhos, por anquanto..., por anquanto...


Qundo deixei l miu cumpadre, iba you pensando. Un paíç que nun ye capaç de poboar l sou spácio fisico, ye un paíç que só pude star malo.


Valter Deusdado

20 comentários:

leonardo antao disse...

Buonas nuites Valter,

An muitas tierras de l'anterior solo falta ancerrar l lar de ls bielhos, l paíç nun ye capaç de poboar l spácio físico i stá a ficar mui malo. Se l Stado nun abançar cul relançamiento eiquenómico i criaçon d'ampregos, muitas aldés cairon nun abismo i zaparecíren. Ls nuossos gobernantes debian pensar bien nesta possibelidade ….


Un abraço,
Leonardo

Unknown disse...

Falas bien Leonardo, mas cun que denheiro? Todos ls que fálan deberíen antes, fazer por dar trabalho cul denheiro cun que ban alimentando ls bancos que tanto oudéian. Mas ls bancos son gente? Son l denheiro de quien l aforra para outros jogáren!

leonardo antao disse...
Este comentário foi removido pelo autor.
leonardo antao disse...
Este comentário foi removido pelo autor.
leonardo antao disse...

Buonas nuites Almendra:

Nun ye fácele respunder a la buossa pregunta, mas bou tentar, spondo alguas de las mies modestas eideias.

Ls gobernantes deberian eilaborar leis que retirassen dibersos prebilégios de carros, telemoble, cumbustible, çpesas de repersentaçon i de biajar gratuitamente ne ls trasportes públicos (an 1ª classe) i outros prebilégios…., qu'inda possuen ls Admenistradores de las Ampresas Públicas, ls einúmaros Gestores i Quadros Superiores, dirigentes i técnicos dessas ampresas i de dibersos outros ourganismos públicos.

L grande eiquenomista Peter Drucker defendia que l gestor solo deberie ganhar ne l mássimo, 20 bezes mais que l salairo médio de la sue ampresa/ourganizaçon. Ne l nuosso Paíç, hai Gestores, Persidentes de Bancos que ganhan mais de 500 bezes que l salairo médio.

L'ansensibelidade social d'alguns banqueiros, de las agéncias de rating, d'alguns gobernantes, sin scrúpulos, sin preocupaçones sociales i sin balores morales, lhança todos ls dies miles de pessonas ne l zamprego i na pobreza.

Ls gobernantes deberian criar leis que tirassen muito mais als que ganhan muito mais que la média d'ourdenados, als que fázen parte de la casta de prebilegiados, cun ourdenados scandalosos, cumparatibamente cula maiorie de l pobo.

Ye bergonhosa la cuntenidade de prebilégios remuneratórios absolutamente anconcebibles nun regime democrático, subretodo an períodos de crise i d'austeridade cumo l'atual.

Se ls gobernantes retirassen alguns destes prebilégios, haberie, amigo Almendra, muito mais denheiro para ambestimientos an todo l nuosso stimado Paíç.

Un arrochado abraço,
Leonardo

Unknown disse...

Que bien falas Leonardo! You cuncordo cun todo esso! Mas ls bancos son de quien ten l denheiro! L goberno nun puode fazer esso todo dun die pal outro porque las "corporaçones" nun déixan! L PS deixou todo esso d'adrança inda que cun l'apoio de l PSD i CDS i l que ye mais grabe cul acordo de todos ls que ténen botado nas eileiçones an gente corrupta, solo porque defénden ls sous antresses corporatibos! Dízen muitos que son acontra l regime de Salazar. Mas esse era yá un regime CORPORATIBO, nada ten a ber cun "Cooperatibas". La difrénça ye solo de lhibardade de spresson, porque mesmo ls botos cuntínan a ser comprados!
Falas tamien ne que deberie ser ne l mundo anteiro, mas ls bancos quien son? Sós tu i todos ls que méten ou ban alhá a pedir denheiro!
Eixige anton als tous ampregados para séren sérios!
Criar leis, mas quien las cria nun ye l'assamblé de la república? Quien ls scuolhiu?
Quando l PS gobernaba nun acuntecie yá todo esso?
Quieres-los alhá outra beç?
You sou acontra muito de l que faç este goberno, mas nun ye por nun ser de squierda ou nun me dar mais denheiro.

leonardo antao disse...
Este comentário foi removido pelo autor.
leonardo antao disse...

Buonas nuites Almendra,

Tal cumo bós “You sou acontra muito de l que faç este goberno, mas nun ye por nun ser de squierda ou nun me dar mais denheiro” mas porque nun beio soluçones para anfrentar i solucionar esta crise eiquenómica.

Bibemos tiempos cumplicados de “corporaçones” cumo bós screbistes, i l qu'esta giente que mos goberna prescrebe para solucionar la crise ye de l tipo dun regime salazarento de “aperto de l cinto”.

Apertan-mos biolentamente l cinto quando aproban brutales oumientos d'ampuostos, quando al peso de las medidas d'austeridade mos juntan l zamprego i quando lhançan cerca de 40 mil porsores pa l zamprego, çtruindo l feturo de miles de famílias,….

Mas la mie maior preocupaçon, amigo Almendra, ye l'andiferença de ls que mos gobernan pulas pessonas smagadas pul peso de las medidas d'austeridade, smagadas pul zamprego, a que se juntan nalguns causos la malina, la solidon, la rejeiçon.

Estas preocupaçones cumbidan-mos a nun cairmos ne l zánimo ó ne l comodismo i a lhuitarmos por un Paíç melhor.

Un arrochado abraço,
Leonardo

Unknown disse...

Leonardo, todo l que screbiste ye berdade, mas nun mos podemos anredar nessa cultura de la eigreija católica de tener pena de todo mundo, de ser santos, de ir an cantos de la sereia! Ser buono nun ye ser burro! I la nuoba religion "LA SQUIERDA" quier fazer esso de nós!
You sou libre!

leonardo antao disse...
Este comentário foi removido pelo autor.
leonardo antao disse...
Este comentário foi removido pelo autor.
leonardo antao disse...

Buonas nuites Almendra,

Aprecio las buossas preocupaçones a miu respeito i agradeço ls simpáticos cunseilhos que me trasmitis neste comentairo, que son úteles pa l'aperfeiçoamiento de la mie maneira de star na bida.

Ansinoram-me que ls homes i mulhieres mais felizes i mais amportantes de l mundo éran aqueilhes que bibien al serbício de ls outros, ls que se çgastaban ne l serbício zeinteressado als outros, ls que se preocupaban cula felicidade de ls outros i nun pensaban solo an sastifazer eigoisticamente ls sous zeios. Esta ye, por esso, ua de las mies atuales grandes preocupaçones. Starei assi a “ir an cantos de la sereia”?, ó la “ser burro”?

Burro ó spierto, de squierda ó de dreita, solo zeio “que you nunca falte a quien percisar de mi”.

Un abraço,
Leonardo

Unknown disse...

Amigo Leonardo, tamien you tengo esses balores, mas nun ls lhiebo al fanatismo ó als antresses ancunfessábles de ls partidos i de las religiones! Hai pobres i pobres, hai gente que precisa i gente que faç que precisa. Hai gente que quier trabalhar i hai ls que nunca trabalhórun i a quien nunca faltou nada! Ls necitados i probes nun púoden ser aporbeitados para ajudar a ir pal goberno gente sien alma i apuis tratar de la salúde de ls amigos.

Abraço amigo Leonardo

leonardo antao disse...
Este comentário foi removido pelo autor.
leonardo antao disse...

Buonas nuites Almendra,

Ye berdade todo l que dezis, ye berdade qu'alguns “spertos” i “sin alma”, aprobeitan l'atordoamiento de ls “necitados i porbes” para trepáren, iren pal goberno i tratáren-le de la salúde.

Mas you tengo la certeza que quien pensa i fai esso, percebiran que se nun gobernáren cun hounestidade quedan solicos i anfelizes, i qu'até puoden tener “roubado” un curso i cunquistado un buono amprego, mas que nun ténen feturo nin dan feturo a naide.

Un abraço,
Leonardo

Unknown disse...

Leonardo, sei que l goberno poderie fazer melhor, mas nun mos debemos agarrar a cousas de gente malina para star acontra!
Screbiste tu:
"...i qu'até puoden tener “roubado” un curso i cunquistado un buono amprego, mas que nun ténen feturo nin dan feturo a naide..."
Se te stás a referir al Relbas, fazes mal porque nun ye esso que ye amportante!
Quantos fazírun cumo el? Ye por ser de l PSD? Deixa alhá ls partidos i la squierda i dreita!
Quien nun ye de la nuoba relegion "SQUERDA" ten lepra? Ten que ser queimado cumo na Anquisição?
Quien ye católico ye malino por natureza?
Hai homes i mulhieres que ténen que ser respeitados i que son einocentes até proba an cuntrairo.
Nun julgues para nun ser julgado!

Abraço
Almendra

leonardo antao disse...

Buonas nuites Almendra,

Nun me staba a referir a naide an particular, staba solo a pensar an alguns gobernantes.Gustabamos que todos ls gobernantes i todas las pessonas fússen hounestas, ancorrutibles i antolerables als casos de corrupçon. Mas assi nun acuntece, porque todos nós ls houmanos somos amperfeitos. Esta ye ua certeza que you tengo.

Siempre gustei mui dessa mássima que me relhembrestes “Nun julgues para nun ser julgado!”. Mas sou houmano i scriebo cousas que nun debie screbir i digo cousas que nun debie dezir, mas todo esto que scriebo i digo ye, quaije siempre, para respundir a esta anterrogaçon:
- Que puodo fazer para que ls outros séian mais feliçes?

Penso, penso, i ben-me la repuosta:
- Se partilhassemos un pouco de l nuosso tiempo i de las nuossas eideias, se mos dessemos mais uns als outros, seríamos todos mais feliçes.

Un abraço,
Leonardo

Unknown disse...

Amigo Leonardo, tamien you sou cumo tu. I a las bezes l que scribo sei que bai a ser mal antendido, mas "mal pensa quien mal faç"!
Sei que muita gente mos lei, por esso ye amportante screbir, podemos ser mal antendidos, mas algo queda na cuncência de cada un!
Deixo solo ua pregunta:
Ls probes trabalhadores i agricultores sien studos, la maiorie, fazírun de ls filhos, porsores, doutores, eiquenomistas, angenheiros i por ende adelantre, que ansino tubírun todos estes formados se nun son capazes agora de se gobernar i gobernar ls filhos?
Pus se son capazes, para quei starmos cun preacupaçones!
Deixar funcionar la democracie i cumo diç Amadeu "bibir i deixar bibir". "Esso és", dízen ls spanholes!
Cun çcunfianças, cun rábias i ambeija nun se bai alhá!

Abraço
Almendra

leonardo antao disse...

Buonas nuites Almendra,

Esta ye ua de las rezones porque you screbo tantos comentairos “sei que muita giente mos lei, por esso ye amportante screbir,…”. Mas la percipal rezon ye outra, que yá la dixe an anteriores comentairos, ye porque acradito que screbir la lhéngua mirandesa ye un ato d'amor i d'houmenaige als nuossos antepassados que mos trasmitiran ouralmente esta lhéngua, até als dies d'hoije, i tamien als qu'eilabororun la Cumbençon Ourtográfica de la Lhéngua Mirandesa i als que cuntribuiran para que l mirandés fusse aprobado cumo 2ª lhéngua oufecial.

Para alhá desso, cumo me dixe un miu amigo (adbogado alantejano de Borba) que bejita frequentemente l Froles, “estes testos i estes comentairos son l prolongamiento pul mundo fura de la bida i de la cultura de l pequeinho i houmilde pobo de l praino mirandés, que stubo squecido mais de dous mil anhos i son tamien un buono meio de criar ó anriquecer ls lhaços d'amisade cun muitas outras pessonas", que a mi me ténen sido úteles para bender muitas dezenas de lhibros de ls nuossos scritores de lhéngua mirandesa, an special de ls patrocinados pula Associaçon Cultural i Recreatiba Nial de la Boubielha.

Gustei desta buossa antressante pregunta: “Ls probes trabalhadores i agricultores sien studos, la maiorie, fazírun de ls filhos, porsores, doutores, eiquenomistas, angenheiros i por ende adelantre, que ansino tubírun todos estes formados se nun son capazes agora de se gobernar i gobernar ls filhos?” You tamien penso que “son capazes” de gobernar, mas la mie preocupaçon ye outra amigo Almendra: Nun haberá alguns desses doutores, angenheiros,…, que studórun pouco i por ganáncia ó buntade de ser giente chegan a gobernantes?

La democracie i la crise zmascaroran alguns gobernantes que buscorn l poder fácele, que nun faziran crecer este nuosso stimado Paíç. Oura l que nun crece, decrece, yá stá a retroceder i a çtruir-se. Ye este decrecer que me fai sofrer, amigo Almendra. Mas a las bezes penso: este sofrimiento i esta perda d'alguns ouros al fin de l més nun mos ajudará a tornar mais fuortes i mais rialistas?

D’ua cousa you tengo la certeza, para bencermos la crise percisamos de criar lhaços (fuortes) de cooperaçon i d’apoio als nuossos gobernantes (séian eilhes de squierda ó de dreita) i daprender que l progresso i zambolbimiento solo se custrói cun trabalho coletibo d'eiquipa, atrabeç de la coperaçon, de la coeson i de la partilha d'alguns de ls nuossos ouros, de l nuosso tiempo i de las nuossas eideias.

Un arrochado abraço de l sempre amigo,
Leonardo

Unknown disse...

Gustei desta parte:
..."D’ua cousa you tengo la certeza, para bencermos la crise percisamos de criar lhaços (fuortes) de cooperaçon i d’apoio als nuossos gobernantes (séian eilhes de squierda ó de dreita) i daprender que l progresso i zambolbimiento solo se custrói cun trabalho coletibo d'eiquipa, atrabeç de la coperaçon, de la coeson i de la partilha d'alguns de ls nuossos ouros, de l nuosso tiempo i de las nuossas eideias."...
Mas tamien ls gobernantes ténen que querer i aceitar la nuossa colaboraçon i inda mais, ténen que usar bien l nuosso sacrafício!
Quanto al mirandés, ye cun este eisercício que nós fazemos que la nuossa lhéngua steia biba!
La lhéngua tamien ten que serbir para çcutir, falar de politica, comunicar!

Abraço arrochado
Almendra