23/03/11

Mais ua buona cuntribuiçon pa la dibulgaçon de la lhéngua mirandesa.

I acunteciu hoije, 4ª feira die 23 ne l salon de la Sociadade Filarmónica Seixalense-Seixal a las 17 horas ne l ambito de las yá anstituidas 4ªs feiras culturales que la Unisseixal–Ounibersidade Jenior do Seixal pormobe.

Esta cul tema de “Trás-os-Montes: Tertúlia da Cultura ao Lazer" coube bien la stória de la lhéngua mirandesa, la sue oufecializaçon, las sues çficuldades cumo meio de comunicaçon, las çficuldades que tubo para salir de l squecimiento, ls eisitos que arrancou de ls mirandeses i pertueses que la acarinórun i a eilha bénen pa la daprender a screbir i a falar, las caminadas que fizo i fai to ls dies nas scuolas de la region i fuora deilha, ne ls jornales, n’anternete atrabeç de bários sites i blogues an publicaçones i l salimiento de lhibros de poesie, cuontas, testos i crónicas.

Todo esto i muito mais fui dezido i splicado pul porsor Francisco Domingues nua anterbeçon para ua assemblé bien cumpuosta i atienta, que sabe oubir, que ye bien madura i ye sabedora melhor que naide de l balor de qualquiera património, cumo ye este de l mirandés. Cua lheitura dun cachico dua crónica de l aluno de la Unisseixal, Faustino Antão i bersos, quedou para todos ls persentes, ls alunos desta anstituiçon d’ansino la cunfirmaçon de que la lhéngua mirandesa ten que star siempre ne ls eibentos culturales por dreito própio, porque cada beç hai mais quien la quier ber bien alta.

Ten mérito la porsora Mariana, que fai parte de ls Uorganos de Direçon de la Unisseixal, respunsable pula área cultural, assi cumo l senhor Reitor que acarinórun i nun deixórun de fuora l mirandés, ponendo-lo a la par de ls demais balores patrimóniales i materiales eisistentes na region i an Trás ls Montes, cumo tamien i muito bien eiqui nesta jornada outros stramuntanos i stramuntanas l demunstrórun nas sues anterbeçones.

La repersentaçon, se assi se puode dezir, de falantes mirandeses stubo buona, puis alhá stubírun ls cunterráneos, Francisco, Firmino, António Cangueiro (cumbidados) José dos Anjos i Faustino (alunos). Que cumo fuorma de çpedida dórun ls parabienes a l’ourganizaçon pul eicelente trabalho i ampeinho i esta cumo fuorma de reconhecimiento de l cuntributo dado nun se poupou an dezir que eicediu las spectatibas.

Cuido que fui mais ua upa, pequeinha talbeç, mas debagarico se bai fazendo camino, i tengo la certeza que agora andentro desta anstituiçon i tamien na lhembráncia de mais pessonas hoije las cousas i l querer pul mirandés yá son mais claras.

Ganhou l mirandés, ganhou la cultura.

















http://www.youtube.com/watch?v=gr9PvI0UMik

6 comentários:

ACangueiro disse...

Faustino, la lhéngua saliu-se mui bien. A todos ls que alhá nun stubíran, esta buossa crónica diç todo l que alhá se passou. Fracisco fizo ua buona apresentaçon i apuis stubímos alhá nós para compuner l ramalhete.

Amadeu que nun puode star alhá, por razones profissionales, pula cierta queda cuntento que todo tubísse corrido bien.

Parabines lhéngua mirandesa!

Antonho Cangueiro

AF disse...

Bien hais Faustino pulas amboras

Bien me custou nun poder star alhá cumo staba treminado, mas nun fui possible. Nunca tube dúbedas que todo iba a correr bien. Bien haia a Francisco i Antonho i tamien a Firmino i Faustino.

Abraço para todos
Amadeu

leonardo antao disse...

Buonas nuites Faustino,

Parabienes por esta dibulgaçon de la lhéngua mirandesa, an special por quaije todos ls participantes, falantes de mirandés,seran associados de la Boubielha.

Un abraço,
Leonardo

franciscobelharino disse...

Buonas tardes Faustino,
Solo agora bi l testo i ls retratos, stá todo mui baliente. Parabienes i un abraço.
Francisco

Unknown disse...

O mirandês surge-me como uma surpresa positiva. Lamento não o falar. Deveria ser disciplina obrigatória no ensino. Nestas contribuições de mirandês aparece um nome: António Cangueiro. Conheci uma pessoa que era desta região e que tinha este nome. Essa pessoa estudou no Instituto Nun'Alvres, nas Caldas da Saúde, Santo Tirso. Poderá ser a mesma pessoa? Se for, até que poderei vir a aprender a falar o mirandês! Quem sabe!
Aníbal Martins

ACangueiro disse...

Para o comentário de Aníbal:

A pessoa de António Cangueiro de quem fala, pula certa não sou eu, pois nunca aí estudei. Sou de Bemposta Mogadouro e estudante tardego. Quanto a aprender mirandês, penso que será acarinhado por todos. Aqui no Froles, se explorar os vários sítios, tem a possibilidade de aprender.
Mesmo não o conhecendo, um abraço e saúde.

António Cangueiro