Dá-me ua rosa
Anque arrimada a spinos
Nesta primabera augaceira.
Nacírun-me ne l jardin
Mas an beç de roseira medrar
Neste jardin a la borda l mar
Medrórun-me garbanceiras.
Ténen tanto pico, tanto
Que quando las quije cheirar
Picórun-me
Sabes alhá quanto
I só nun zatei nun pranto
Porque nun sou de chorar.
Nun ye que nun guste deilhas
Ne ls caminos son singelas
Mas assi un garbançal
An beç de roseiras
Tu nun me lhiebes a mal
Quiero çfazé-me deilhas.
Apuis nesse jardin
A la borda l mar
Tengo que le botar
Yerbicida de la grama
Para ber se l medrar atama
Naqueilha yerbaçada toda
Que se nun le dou ua sgoda
Nun sei adonde bai a parar.
Dá-me ua rosa
De las que puoda cheirar!
Subscrever:
Enviar feedback (Atom)
3 comentários:
[Comentairo de Ana Maria Fernandes]
Adelaide,
Para mi fui mui defícele tamien poner ne l Froles esse miu « quelóquio» cumo chegou a dezir Antonho Cangueiro. Tube que spurmentar mais dua beç i pouco faltou para perder paciéncia. Fui preciso ansistir.
Bede tamien se nun hai maneira de tirar als poucos essas garbanceiras que tendes ne l buosso jardin sien usar yerbicida. Sabeis que ye mesmo beneno. I you pessonalmente acho ua tristeza (ua cierta rebuolta tamien. Até adonde bamos chegar?) ber yá an ciertos sítios yerba yá cumpletamiente amarielha porque houbo quien la quijo çtruir quando mos agrada tanto ber todo fresco i berde cumo ye questume i normal nesta época de renacimiento que ye la Primabera.
Un abraço.
Ana
30 de Março de 2011 18:10
[Comentairo de Adelaide Monteiro]
Ana,
You nunca uso yerbicida Ana mas hai garbanceiras que médran porende, garbanceiras i outras cousas que nien cun yerbicida déixan de medrar...
Quanto a la forma de l poema, you zisti. Stou sien pacéncia.
Beisicos Ana.
Delaide
30 de Março de 2011 21:51
I adonde hai rosas que quergan medrar a la borda de las garbanceiras?!?
Estas, más cuincidas cumo "rosa canina" fázen justícia al nome! talbeç porque puode estar ende la seluçon que cunsiga espantar las matilhas que andan purparadas de carrancas al cachaço para que naide ls muorda.
Grande retrato esse tou jardin.
Un chi
Enviar um comentário