09/03/11

Cuncurso de Cuontas de Natal 2010 - Resultado

Cumo pormetido, eiqui stamos a dar amboras subre l cuncurso de Cuontas de Natal 2010, de que fumus nomeada(o)s cumo júri.

Ampecemos por ler cun atençon todas las 20 cuontas, abaluando l domínio de la lhéngua mirandesa, ne ls sous bários nibles, la sensiblidade de cada outor(a), l modo cumo agarraba l assunto i respeitou l tema aperpuosto, la riqueza lhenguística que demustrou i l lhado mais specialmente lhiterairo.

L júri quier-le dar ls parabienes a todos ls partecipantes, puis aparecírun a cuncurso cuontas mui bien screbidas, que dórun un amportante cuntributo pa la lhéngua i la lhiteratura mirandesas. Por essa rezon, l júri cuida que era amportante haber mais cuncursos destes i deixa essa requemendaçon a la admenistraçon de l blogue.

Dada la deficuldade an scolher ua sola cuonta, tubimos que andar por stadas, para mos aprossimarmos de l oujetibo. Assi, purmeiro scolhimos 10 cuontas. Apuis, dessas 10 scolhimos 3 cuontas. I destas trés, por fin, scolhimos ua sola deilhas. I la cuonta scolhida cumo ganhadora deste 1º cuncurso Cuontas de Natal 2010 fui

La Mona Negra, de Alcides Meirinhos

Queremos-le dar ls parabienes a Alcides i ancentibá-lo a que cuntine a screbir, puis muito l mirandés i todos nós tenemos a ganhar cun esse sou trabalho.

L júri,

Alberto Bautista

Alcina Pires

Amadeu Ferreira

Bina Cangueiro

Franscisco Domingues

10 comentários:

Tortulhas disse...

Buonas nuites!

Parabienes a Alcides, que ye grande mirandés i grande scritor!
La Mona Negra nun ye ua cuonta grande, mas ye ua grande cuonta!

Pedindo çculpa a to ls outros que tamien screbírun (i you nun me boto fuora), se you fura l juri, era mesmo esta la cuonta que you scolhie, de maneira que cuido star tamien de parabienes l juri por haber scolhido tan bien.


L cuncurso fui ua eideia formidable i haber sido screbida tanta cuonta tamien!

Abraços,
Alfredo

ACangueiro disse...

Parabienes Alcides!

La Mona Negra ye ua cuonta cun letras grandes.

Esta tamien serie la mie scuolha i se l juri la scolhiu fui bien scolhida, parabienes l juri.

Abraço i beijicos a to l mundo,

António Cangueiro

Adelaide Monteiro disse...

Mui bien Alcides, mui bien júri.
Ua cuonta muitíssemo anteressante.
Parabienes Amadeu por haberes criado este cuncurso que, cada ua a sou modo, mos truixo cuontas cun criatibidade.

Cuntinemos!!!

Beisicos

Delaide

leonardo antao disse...

Buonas nuites Alcides,

Parabienes por esta honrosa scolha i cuonta muitas antressantes cuontas cumo esta, para dares cuntenidade al tou eicelente trabalho de "La Mona l Maio".

Parabienes al ourganizador desta eniciatiba, als eilemientos de l Júri i a todos ls partecipantes ne l cuncurso, que cuntribuiran mui pa l'anriquecimiento de la lhiteratura mirandesa.

Un arrochado abraço,
Leonardo.

adeusdado disse...

Parabienes Alcides

Gustei de la tue cuonta. Ye bien mirandesa

Un abraço
Válter Deusdado

Ana disse...

You nun serei nien tan eufórica nien tan loudatiba...mas mais reserbada i eisegente subretodo dous dies solo depuis de l Die Anternacional de la Mulhier de que aqui tamien se falou i que eisiste, cumo todo mundo sabe, hai yá un bun par d’anhos agora.
Porquei ?
1)La paridade ne l júri que fui cunstituído nun ye de 50/50. Podie ser pior mas tamien podie ser melhor !
2)« Malgarida feita lhabandeira abanando l rabo pul lajedo de piçarra de la cozina», nua cuonta de Natal: será que este tipo de acumparaçon nun anquemoda a naide?

Queremos l quei afinal ?
Ye que se l oubjetibo ye dar prestígio (i sien ambiguidades) a la lhéngua mirandesa, anton Amigos, inda hai camino para andar !

faustino.antao disse...

"Parabienes"

Puode parcer tarde, mas son siempre horas de dar ls parabienes al outor desta cuonta eileita, al amigo i camarada Alcides.

Cumo yá fui dezido, un grande mirandés i scritor.


Tamien nesta hora de dar ls parabienes ban para todos ls scritores partecipantes, pul miu lhado you ganhei momientos de lheitura que siempre me regálan muito.


Mais, parabienes al admenistrador de l blogue por tan guapa i buona einiciatiba, ganhou la lhéngua, ganhórun todos ls que partecipórun porque partecipar yá ye ganhar.

Un abraço arrochado
Faustino

Unknown disse...

Tamien lebaba l miu boto.
Parabienes Alcides
Abraço
Almendra

Manolacas disse...

Siempre dixe que l Alcides ye un grande scritor de lhéngua mirandesa. Apaixonado pula lhéngua oural de la raia. Parabienes al amigo i al cicuirano.

Alcides disse...

Buonas tardes

Solo me queda agradecer a todos aqueilhes que se dórun al trabalho de ler la cuonta d'ua Mona, espeilho de tantas monas de ninas de l Praino nos anhos sessenta i setenta de l séclo passado. Bien haiades.
Assi, a modos de eipílogo: "Bitor, está hoje reformado, graças a su mai,a tio Moreno e a tio ..., Malgarida ia tem más sapatos ..."

Abraço a todos

Alcides