16/03/11

Comer pan centeno


Ua beç, un garoto francés andaba ne l brincote c’un garoto pertués. Dixo-le anton l francés

- You como chocolate i tu comes pan centeno!

Mui triste, l garoto pertués nun antandiu nada, mas quando chegou a casa cuntou-le a sue mai l sucedido. I sue mai meio pensatiba dixo-le:

- Para outra beç que el bolbir a falar nisso, responde-le l seguinte: “I you tengo un PS ne l goberno i tu nun tenes… “

A soutordie l garotico francés buolbe a anfernizá-le la bida al pertués:

- You como chocolate i tu comes pan centeno!

I anton l pertués respondiu-le:

- I you tengo un PS ne l goberno i tu nun tenes…

L garoto francês, sien repuosta, bai para casa i cuntou-le a sue mai l que l garoto pertués l tenie respundido. Anton la francesa dixo-le:

- Mira filho, para outra beç qu´esse caralho desse pertués te bolbir cun essa dizes-le, “Agora nun tengo, mas bou a ir a tener!”

A soutordie l garoto francês chega-se al pertués, triunfante, i ansiste cula miesma treta:

- You como chocolate i tu comes pan centeno!

I responde-le outra beç l garoto pertués:

- I you tengo un PS ne l gobierno i tu nun tenes…

Diç anton l francês.

- Agora nun tengo, mas bou a ir a tener…

I responde-le l garoto pertués mui d´agudo:

- Á si? Anton, caralho, tamien bais a passar a quemer pan centeno que te bais a foder…

José António Esteves




3 comentários:

ACangueiro disse...

Tiu Jesé, la fodice stá bien anjandrada! Bós botai-le que la cousa bien percisa que mos ríamos un cachico.
Abraço,

António Cangueiro

Ana disse...

La buossa cuonta ye ua metáfora cumo todos podemos ber, Amigo Antonho Esteves.

Nun haberá naide que nun poderá dezir que ye totalmente anjusto que un desses garoticos que andában ne l « brincote », l garotico francés mais precisamiente, nun querga partilhar, i neste caso cul garotico pertués, tentando amponer la sue scuolha que ye la que le dá mais jeito a el, el que ye francés!
Mas ye l final de l testo que eisige un cachico mais d’atençon i tamien alguns comentairos!

Purmeiro i an relaçon al pan centeno hai que dezir que se antigamente habie precunceitos an relaçon a esse pan (Muitos achában que era l pan de ls pobres, nun ye berdade ?) hoije las cousas mudórun i yá nun ye nobidade para naide que l pan de centeno, subretodo se fur feito cun farina de culidade i por giente que l sabe fazer, ten todo l sou lhugar, tamien an França, até ne ls melhores restourantes : aqueilhes por eisemplo que aperpónen marisco, para acumpanhar ostras que ls Franceses adóran comer crudas, mas nun sei se sabeis ?

Segundo, you nun tengo miedo de dezir que fago parte de ls que spéran que seia por eisemplo l PS que ganhe an todas las eileiçones que bai haber an França mas sabeis que hai ua cousa assi i todo que nun bai a mudar muito, que l goberno seia de squierda ou até de dreita ? La França ye de loinge i bai cuntinar a ser un de ls mais grandes produtores de trigo precisamente i de outros cereales tamien ( i un nó solo de centeno!) ne l mundo i subretodo de l’Ouropa Oucidental : mais que l Canadá até, mais que l Oustrália, mais que l’Alemanha, mais que l Reino Ounido... I Pertual pul cuntrairo, hai que relhembrar tamien essa realidade, nun produç anfeliçmente las cuntidades de trigo que precisa i ye oubrigado a amportar até quaije l dobro de l que produç... se quier comer « pan » ! Por outro lhado, nun será einútele tamien dezir para aqueilhes que inda nun sabien que zde hai uns meses agora, ls produtores de trigo franceses stan mas ye bien cuntentos ! Ls précios de l trigo oumentou cunsiderablemente inda nestes últimos meses, l que ye ua buona cousa nun só para eilhes cumo tamien para l’eiquenomie francesa an giral... I porquei ? Nun bos lhembrais que houbo este Berano por eisemplo fuogos terribles na Rússia que tradecionalmente tamien era (i speremos que cuntine a ser) un grande produtor de trigo ? Puis, mas ye que tamien ardírun muitas tierras que habien sido sumbradas de trigo... Un paíç cumo l Eigito por eisemplo que cunsome muito trigo (Eilhes son 80 milhones i l trigo que eilhes prodúzen tamien nun chega!) que questumaba comprar muito trigo a la Rússia tubo que comprar este anho trigo francés... mais caro mas, tamien bi esso screbido : de bien melhor culidade !

Hai que splicar bien todas estas cousas als mais nobatos i cun serenidade, amigo Jesé Antonho, i ansinar tamien a nun ber solo ua puntica de ls problemas... Se queremos ganhar nós tamien an beç de starmos talbeç siempre a perder.

leonardo antao disse...

Buonas nuites Amigo Zé Antonho,

Guapo testo, ambora cun alguns palabrones, sin nada d'eimoralidades, qu'andan muitas bezes nas bocas de ls mirandeses.

Fazistes-me lhembrar esta de l Francisco Louçã:
- Senhor Purmeiro-menistro, esto stá de tal maneira qu'até las rapazas lhicenciadas ténen que se prostituir para subrebibir.
L Purmeiro-menistro cul sou sorriso respunde:
- Alhá stá l Senhor Deputado a ambertir todo,l que se passa ye que l nuosso sistema d'ansino stá tan buono, qu'até las prostitutas hoije son lhicenciadas.

Ye lhoubable la grande cantidade d'antressantes testos que teneis screbido eiqui no Froles.

Teneis de dar cuntenidade al buosso guapo lhibro “Ls Bersos de Jantonho” que fui un amportante trabalho de scrita para dibulgar la nuossa querida lhéngua mirandesa.

Un arrochado abraço,
Leonardo