Porquei dibulgar la lhéngua mirandesa?

Ampeçou l més atrasado mais ua eidiçon de l curso de mirandês. Muitos son ls alunos que tubíran antresse ó curjidade. Outros  tubíran suidades ó ourgulho de la sue berdadeira lhéngua de nascença. I outros tubíran ls sous motibos própios.

You bou ampeçar l terceiro anho de studos de lhéngua mirandesa. Nunca tenie falado ó scrito, nien mesmo oubido falar i mesmo lido. La mie formaçon ye angenharie i pouco antendo de lhetras.  Assi l sfuorço tene que ser maior.

A las bezes perguntan-me quantas pessonas falan mirandés. You questumo dezir que nun sei quantas son mas sei que las que falan se sfuorçan por falar bien i tamien se sfuorçan por screbir. Spero que de brebe you tamien seia ua deilhas. Cada beç mais sinto l peso i la respunsablidade de dibulgar la lhéngua mirandesa. Mesmo que seia solo para saludar, cun pequeinhas frases ó cuntar la stória, se çpertarmos la curjidade de qualquiera yá stamos a divulgar. I divulgar ye nun deixar morrier.