La Figueira de ls Pascoales

Inda alhá stá la figueira bien arrodiada dua silbeira a modos de guardiana desta, que queda eili nun casal mui acerquita de la cruç de Bal Molhado ne l camino de la Fuonte de las Spadanhas. Esta fui la figueira de muitos pastores i buieiros de Caçareilhos i Zenízio que andában cun las canhonas, bacas, machos ou burros por aqueilhes lhados de las Spadanhas, Chana, Bidoledo, Bal Molhado ou Trabacinos. Muitos fúrun ls que quedórun culs beiços a queimar apuis de quemer ls figos inda berdes desta figueira i buer auga na fuonte de las Spadanhas. Ls figos desta figueira quando stában maduros si éran buonos, mas la maiorie de las bezes nun habie tiempo pa ls deixar amadurar i apuis duas apalpadelas de ls muitos garotos ancarrapitados anriba deilha, yá parcien buonos i éran quemidos inda mei berdes. La garotada de buieiros de Zenízio eili pulas Spadanhas ne ls anhos cinquenta, sessenta i setenta de l seclo atrasado era siempre mui grande, chegando muitas bezes a mais dua dúzia i alguas bezes tamien alhá stában buieiros de Caçareilhos. La fuonte de las Spadanhas era assi a modos dun lhocal sagrado adonde ls buieiros s´ancuntrában para jogar a la belharda, al fito, a la bola, a las lhuitas i ne ls meses d’ agosto i setembre la besita a la dita figueira nun podie faltar.

De l duonho de la figueira solo se sabie que tenie un cabalhico de ls garranos i por isso serie un de ls ricos de Caçareilhos. Assi, la garotada anriba la figueira staba siempre a la spreita d’ oubir l scatrapolhar de l cabalho benido de ls lhados de la cruç de Bal Molhado, mas nunca aparcie. Ls buieiros cumo l duonho nun daba mostras fúrun ganhando cunfiança i anté parcie que la figueira yá era deilhes i, íban als figos cumo se nada fusse. Ora, nun cierto die ende puls finales de la década de sessenta, quando ua catrefa de garotos de Zenízio staba ancarrapitada na figueira a las apalpadelas de ls figos haber se cunseguien ancuntrar algun maduro oubírun un bózio dun tiu. Ls garotos chenos de miedo ampeçórun a saltar de la figueira uns pa l chano i outros pa la silbeira quedando chenos de picos, mas la priessa era tanta que nien ls picos picában. Quando yá stában ne l camino oubírun nuobo bózio i l scatrapolhar dun cabalho atrás deilhes. Deili a la fuonte fui ua corrida cun toda la fuorça que tenien, mas l scatrapolhar de l cabalho staba cada beç mais arrimado a eilhes i, chegados a la fuonte eili stában todos ancolhidicos i chenos de miedo. L duonho de la figueira anriba de sou cabalho ampeçou a perguntar als garotos de quien éran. Eilhes cuitados chenicos de miedo alhá fúrun dezindo l nome de ls pais i sperando siempre por uas buonas patadas ou por un puxón d´oureilhas de l tiu quando s´abaixasse de l cabalho. Apuis de ls haber anterrogado a todos l tiu aquel saca dun saco i dixo:

Ah garoticos! Tomai alhá este saco de figos maduros que you yá habie apanhado, que bós solo andubistes a quemer ls berdes i debeis tener la boca toda queimona. Ls garotos nien querien acreditar ne l que stában a oubir, mas cumo quien nun quier la cousa i chenos de miedo i bergonha, agarrórun ne l saco cheno de figos i lhougo l tiu picou l cabalho i alhá fui a scatrapolhar anriba del pa ls lhados de la cruç de Bal Molhado a camino de Caçareilhos.

Este fui un géstio cun un senificado mui grande para esse tiempo. Géstio que solo podie salir dua pessona buona, bien formada i mui amiga de ls garoticos. Esta stória fui-me cuntada inda nun hai muitos anhos por Zé Narciso, un de ls garotos cun quien se passou la stória. You nun quedei nada admirado quando Zé Narciso, me cuntou la stória, pus yá coincie l tiu buono de Caçareilhos, i yá muitas bezes habie assistido als géstios de ternura i carino que el tenie culs garoticos adonde ls mius dous filhos muitas de las bezes stában ancluídos. La stória aqueilha, era mesmo la cara del, que parcie un de ls garoticos quando staba cun eilhes.

Tiu Chico Burtlameu, era l nome desse tiu buono que agora mos deixou i fui a anterrar na sue última morada de Caçareilhos die diç de febreiro. Sendo you un de ls que muitas bezes fúrun a la sue figueira de ls Pascoales, eiqui queda ua sentida houmenaije an miu nome pessonal, mas tamien an nome de todos ls Zenizienses i an special daqueilhes garoticos a quien el dou aquel saco de figos que nun mais squeceran esse géstio desse tiu tan buono.

A todos ls filhos, nietos, nuoras i an special al Manuel Emílio, eiqui queda nesta hora de grande sofrimento,  un abraço solidairo dos amigos Francisco, Irene i Ana Rosa.

Francisco Domingues