09/02/13

“CÓN.” cumo “cónego”




Rebista Brigantia, númaro de jan/dez/2007...

(Esta rebista fui-me oufrecida hai poucos meses, an Bregáncia, 
mas solo ampecei a dar ua oulhadelha nesse númaro, hoije)



La rebista ten mais de 800 páginas, l que ye muito. Hai que tener muito tiempo disponible para ler todo dua punta a outra mas puode eibidentemente antressar todos aqueilhes que quieren daprender cousas i s’antréssan pula stória local relacionada cula cidade de Bregáncia i l sou destrito, quier dezir: mais ou menos metade de la region trasmuntana ou talbeç até mais.



Bou lhendo ls títulos i l nome de ls outores de ls defrentes artigos persentes nesse outéntico calhamaço  tendo an cuonta la spessura que ten. Nun cunheço, al cuntrairo pula cierta de muitos que me stan agora a lher, ningua de las pessonas que colaborórun direta ou andiretamente na redaçon desse lhibro que assi i todo parece ser ua mina... ua mina de anformaçones !



Bou  folheando i ban aparcendo ne l meio de páginas i páginas dedicadas a studos, pesquisas, comentairos, etc, todos redigidos pula cierta por specialistas, giente que passou tiempo para recolher dados sien cuonta, decumientos de arquibos, cumo tal: cópias de cartas manuscritas (de tiempos an que mui poucos ou inda naide se ponie ou tenie la possebilidade de screber cun teclas i máquinas), cópias de diplomas, certidones de nacimento, retratos, etc. mas todo, absolutamiento todo a preto i branco, l que nun deixa de surprender assi i todo, hoije an que la quelor stá tan persente antre nós i mos parece quaije ansubstituible...

Assi todo, un bai tentando antender i até aprecia ber, cumo fui l miu caso, pula purmeira beç,  cumo tal l scritor Trindade Coelho nua foto de família, cula mulhier i fameliares... L pouco que inda li del, debo dezir que gustei i penso: quando tubir tiempo (mas quando?) , quedo assi i todo cula certeza que gustarie de ler esse trabalho de quaije 500 páginas cunsagradas a esse outor, habendo sido la maior parte screbidas, redigidas, purparadas por alguien que assina cul nome de Hirondino Fernandes.

Mui bien.



Mas por anquanto bou cuntinando a folhear i ye assi que chego quaije al fin, a la p. 741 cun un artigo bien mais curto, de 31 páginas assi i todo, i cun este títalo: “Lembrando: Cón. Manuel Nunes Formigão”, assinado esse tal artigo por outra pessona que you nun cunheço: A. Nogueira Afonso, al punto até de nun saber se ye un home ou ua  mulhier quien l redigiu mas algo me lhieba a crer assi todo que ye dun home de que se trata... Bai un a saber porquei !



Bou percebendo que esse artigo ye çtinado nun solo a fazer l’apologie de l’Eigreija católica an giral, al punto de nunca poner an causa l grau de respunsabilidade que tubo na realidade an relaçon al que inda hoije se chama “Las apariçones de Fátima”, cumo tamien a prestar ua houmenaige, mas sien lhemites, i ye aqui que stá l problema, a esse eiclesiástico, l cónego Manuel Nunes Formigão, nacido an Tomar an 1883 i falecido an Fátima, percisamente, an 1958, mas que chegou a benir para Bragança an 1934 cumo Reitor de l Seminário Maior i fundar l “Mensageiro de Bragança” (an janeiro de 1940)...



I antendi finalmente sien deficuldade, depuis de haber ampeçado a ler solo las cinco purmeiras páginas, qual era l’antençon dessa biografie, se por acaso mos podemos contentar an dezir que se trata dua berdadeira biografie. Melhor serie falar an hagiografie! Nun fáltan retratos cumo eilustraçones: de l papa Pio XI a rezar até, desse Dr. Formigão mesmo ne l tiempo an que era el próprio seminarista, cun gorbata i ampecablemente bestido; cun çapatos, que suorte naquel tiempo an que habie tanto nino çcalço i a tiritar de friu sien ter nunca la suorte de poder até aprender quatro lhetras!, de ls pastoricos de Fátima  que “fugien de ls outros sacerdotes (mas del nó!) pelas maneiras bruscas com que os queriam pôr à prova” i porque el, Manuel Formigão, cumo tenta splicar l outor de l artigo yá citado, “tratava os pastorinhos com carinho”... I por ende fuora...



Sei que nun tenerei tiempo de momiento de ler todo l que nesse númaro de la rebista Brigantia fui screbido subre esse cónego para tentar balorizar, palabra após palabra, l'açon que fui la del, l ampacto i l’anfluéncia que tubo i talbeç inda hoije cuntine a tener . De certeza que muito haberie i haberá que dezir... I un pergunta-se tamien al fin i al cabo: mas será que todo l que nesse artigo fui screbido ye mesmo berdade ou nun haberá tamien anganhos, erros i gralhas até...?



L que ye que me lhieba rapidamente a fazer essas perguntas ?



Parece-me eiloquente l eisemplo que bos bou agora a dar, un probablemente antre muitos outros, quien sabe:  trata-se de l pequeinho comentairo dua linha que fui acrecentado al retrato de la p. 746 que mostra un santuário que you por acaso cunheço pul menos zde l'eidade de 8 anhos:  cun ua torre mui alta ne l centro i ua torre mais pequeinha de cada lhado, i por trás muntanhas. Para mi, nun fui defícele antender que era de Lourdes de que se trataba i las muntanhas: eibidentemente ls Pirinéus que quédan  tan acerca de adonde you moro inda hoije... Fui fácele tamien cunfirmar essa mie purmeira ampresson yá que nesse mesmo capitlo, l outor ansiste subre l facto desse antigo reitor de l seminairo de Bragança haber passado, puls bistos yá antes dessa nominaçon, ua temporada nessa cidade de l sul de la França i de haber partecipado an Pertual na propagaçon (ou porpaganda mas ye ?!) de l culto de l’eimage de l’"Eimaculada Cunceiçon" que retomou  antre nós nuobo fuolgo culas “apariçones de Fátima”, an 1917...



Mas cumo fui possible, dezi-me!, nessa rebista bragançana feita an 2007 por tan grandes specialistas, na legenda  desse mesmo retrato que fui de facto sacado delantre de l santuário de Lourdes, an França por cunseguinte, (mas sien un poder ber ua só pessona que seia nesse mesmo retrato) , un ler nada mais nada menos que l seguinte: “O Dr. Formigão, em Londres” !!



Si, nun minto! Anganho solo, ou mesmo gralha ? Londres!? Inda porriba nua cidade adonde nien hai muntanhas nien tampouco santuários! I nun paíç, l’Anglatierra, que hai seclos yá, deixou de cunsiderar l’Eigreija católica i l papa cumo únicas refréncias relegiosas ou dignas de total oubediéncia! Será neçairo lhembrar por acaso, que la relegion dominante nesse paíç nun ye la relegion católica mas si la relegion anglicana oupuosta an muitos aspetos a aqueilha representada pul  papa an Roma ?



Bá! mas cun esto todo, inda m’anchi de rir! Nun podie ser d’outra maneira !Ye que cun tantas bezes que un lei l título hounorífico acrecentado de “cónego” l mais de las bezes abrebiado assi,  cumo ye la regra an pertués yá que l artigo fui screbido nessa lhéngua: “cón.



“CÓN.”  ???!!!



Deixai-me rir anton outra beç ! Puis! Ye que essa palabra dezida i screbida de la mesma maneira (anque sien l acento mas esso nun ten amportáncia ningua) tamien an francés, yá que se falou aqui tanto de Lourdes tamien,  nun solo ye quaije ua anjúria cumo tamien...  



Ai, ai! Só puode antender quien sabe tamien un pouco de francés, mas un francés assi i todo purfeitamiente corriente...



Isto para dezir, agora muito mais seriamente, que nada scapa, se furmos a ber, a quien sabe ler até antre las linhas sien ir até mui loinge ou perder até muito tiempo !



Cumprimentos a todos !



Ah ! Ah !!



       

      

Sem comentários: