La magie de la praça

Torna atrás i sinte la simplecidade de la casa. Las arcadas acolhedoras

abráçan mos a la chegada. Ben a la baranda i sinte

la magie de la tarde cálida ne l Praino. Ua tarde cun sentimiento.

Sinte la sinfonie de la ribeira que mos refresca la miente

i l retombo de ls segredos de l mar ne l búzio de la mie anfáncia.

Esta baranda de prainada ten ua fruiçon abierta al eirreal

mas ye rial esta pracica, las casas i la giente que mora neilhas.

Ls ninos sóltan-se por ende a la macaca, a ua de la mula, a las scundidas...

Ye la praça que las cumbida.

Repara na risa de la tarde ne l mirar de la mie bezina.

Ne l aceinho cúmplice l prazer de l'amisade. L prazer de star hoije eiqui.

L perfume de l café ye ancumparable eilhi na splanada, nien sei porquei.

Mas sinte-se ambiente. Calor houmano. Cuntentamiento.

Ah i la roseira que chube la queluna de la casa al lhado la mie,

mais a la dreita, aqueilha que cedo spreita la manhana. Ye ua rosa bacará.

Yá solo ten ua rosa ye berdade, mas alhumbra la tarde.

I l tiempo ten eiqui un lhugar para ti. Nien te sei splicar

cumo quedas bien neste lhugar. Fazies falta. Ye qu'hai sítios

que nacírun assi cun alma i cumo ye buono aporbeitar

l sereno desta pracica. Stou na baranda i sinto te achegar

i la tarde queda inda mais guapa i la praça ten outro balor.

Mira cumo l´amargura de tou sumbrante se zbaneciu i sintes

esta buntade de bibir - cumo you.

Teresa Almeida