Se aquel caleijo, l “Caleijo de l Scaleiro” para muita giente
era un caminho que nun lhebaba a lhado nanhun, par’el nun era bien assi.
La bida de Fracisco Meirinhos tenie muito an quemun cun este
Caleijo i até se puodie afirmar sien açembonar erros que quedou lhigado para
siempre i para todo.
L Caleijo de l Scaleiro sal de l’aldé inda hoije, antriçado
antre las casas i paredes de las cortinas de la Quinta de la Senhor'Ana, para serbir
lhatas i suortes, que nun éran de Fracisco, puis nada recebiu de bienes de
raiç, porque sue mai que se muorriu de nuoba nada tenie a pagar décima nien a çclarar
a la fazienda pública, acabanda a pie dua funtica agora toda acobilhada de tierra
adonde solo se bei un canho de plástico que ende anterrórun.
Mas porque carga d’auga Fracisco habie de fazer serbentie
deste caleijo, streito i curto, porque por ende andaba ua rapaza de pastora,
aqueilha mesma qu’el lhebou al altar, aqueilha mesma que fui la mai de l sou
rapaç i rapaza, aqueilha mesma que apuis de alguns anhos deixou para trás
quando se botou a salto (pula raia seca) pa l’eimigraçon de Spanha (Astúrias) i apuis
Fráncia, aqueilha mesma que apuis chamou i a pie del quedou anhos i anhos puls
caleijos de Bordeus.
Agora siempre que ten tiempo, yá nun cula mesma frescura,
puis nesse tiempo saltaba ua parede sien precisar de boqueiro cun solo brinco,
inda se bota pul Caleijo arriba, coça la cabeça i chama las alhembráncias cumo
se fussen las canhonicas a lhambiscar las códias de pan de centeno que lhebaba
ne l bolso de la jiqueta, para assi ganhar la cunfiança i l amor de la dunha, até salir fala.
Cumo le sabie bien tornar a ser rapaç, an pensamiento, squecir por un rato ls
trabalhos i canseiras que benciu alhá pulas tierras de la reboluçon cultural,
i la sue eiconomicamente, que nun fúrun menos penosas que las que porqui tubo de garoto.
Agora sabie que todo an sue bida tubo segneficado, que nada
fui por acauso, nien el nien sue tie éran pastores, tamien yá nun tenien mesma bida (salude) que tenien dantes, i que inda stában bien persentes todos
aquelhes cachicos que passórun juntos, terminando cumo habien de tocar la bida a
dous palantre.
Sem comentários:
Enviar um comentário