Froles de Spadanha (rosa)Siempre gustei de dezir algue cousa subre las eimaiges de las froles que eiqui pongo. Algo que tenga a ber cul nome, ou subre las lhigaçones de l nome a cousas, sítios ou restros que me quédan nas lhembráncias.
I eiqui me cunfesso, cumo sei tan pouco subre eilhas, l que me ten balido son las ajudas de ls outros, quier de l porsor Amadeu quier de la porsora Ana que acrecéntan l nome científico i la sue ourige. Son eilhes que sácan l Belhete d’Eidentidade siempre. Acában por las froles séren un trabalho de todos, i assi eilhas chéguen a muitos mais, ye l que se quier. Nun fusse assi nun tenerie grande balor.
Esta Spadanha (lírio), talbeç nun seia assi ua frol de lhameiros, scadales, adiles ou mesmo de borda de caminos, nun ye por ende que you stou agarrado a eilha, nun me lhembro de la ber ne l campo, mas l nome de Spadanhas siempre me dixo muito. Nas marras de l termo de Zenízio cul de Caçareilhos hai un chamadeiro Spadanhas, i cun nomeada para muitos garotos de l miu tiempo. Ende faziemos jolda nas tardes de ls Deimingos quando ibamos de buieiros. Apuis, cumo tamien hai un balhe i uas fuontes, passou a ser un sítio para s’ir a quemer la merenda an tiempo de bacanças. Quaije to ls anhos bou alhá, nien que seia solo para me quedar un cachico an siléncio, çpertar ls sentidos i chamar l de riba ls tiempos dantes, sorber la paç que aquelha beiga antriçada antre l Cabeço de la Gaga i de l Chafariç ouferece, cumo se sabisse que la mie alma fui çterrada para ua cidade adonde todo esso nun hai.
Spadanhas nun hai Boubielho pastor ou buieiro que nun conheça i cuido que ls Coneilhos tamien nó. L miu amigo Manuol Bartolamei (Caçareilhos) siempre que alhá bai diç que bózia por mi i spera a haber se you dou seinha. Cumo termo, ye tan guapo cumo las froles que ténen l nome armano. S’algun die tubirdes tiempo dai ua buolta por aquel bal. L tiempo por ende parou.Esta Spadanha (lírio), talbeç nun seia assi ua frol de lhameiros, scadales, adiles ou mesmo de borda de caminos, nun ye por ende que you stou agarrado a eilha, nun me lhembro de la ber ne l campo, mas l nome de Spadanhas siempre me dixo muito. Nas marras de l termo de Zenízio cul de Caçareilhos hai un chamadeiro Spadanhas, i cun nomeada para muitos garotos de l miu tiempo. Ende faziemos jolda nas tardes de ls Deimingos quando ibamos de buieiros. Apuis, cumo tamien hai un balhe i uas fuontes, passou a ser un sítio para s’ir a quemer la merenda an tiempo de bacanças. Quaije to ls anhos bou alhá, nien que seia solo para me quedar un cachico an siléncio, çpertar ls sentidos i chamar l de riba ls tiempos dantes, sorber la paç que aquelha beiga antriçada antre l Cabeço de la Gaga i de l Chafariç ouferece, cumo se sabisse que la mie alma fui çterrada para ua cidade adonde todo esso nun hai.
4 comentários:
Caro Amigo Faustino:
Zde essa linda cidade de Corroios estás a mostrar ua grande paixon por cousas de la natureza, por botánica i por froles de las nuossas tierras que son ua anbaliable riqueza de las nuossas tierras mirandesas.
Passei muitas tardes a la selombra de ls carbalhos i pierto de ua fuonte de las Spadanhas, onde ancuontraba personas de ls dous lhugares de Zenízio, de Caçareilhos i a las beçes de Angueira. Nieste tiempo de Primabera i tamien no Berano ancantaba-me a admirar las lindas froles que eile nascien.
Para num deixar perdir essa riqueza, fazes bien an cuontinuar a puner no Froles tan lindas froles. Para alhá de cuntinuares a angrandecer la nuossa cultura Botánica i la nuossa lhéngua, stás a fazer un eicelente lhebantamento de las riquezas de ls terrenos mirandeses, de ancalculable balor para todos nós que bibimos naqueilhas pequeinhas i humildes aldés, mas mui ricas paisages i an balores naturales.
Cun este tou studo de Botanica, l Froles Mirandesas está a dar un buono cuntribuido para aumantar l amor pulas aldés i pulas giêntes de Miranda, mesmo a aqueilhes que nun tubírun l perbileijo de alhá nascir i alhá bibir, porque, cada frole i cada de ls tous testos de Botanica son ua semiente de zambolbimiento de la lhéngua i de la cultura mirandesas.
Leonardo Antão
Guapas, guapas, son essas froles nesses retratos, Amigo Faustino !
L que balie tamien tentar saber ye la rezon eisata de l nome que debe de ser de la mesma família que la palabra “spada” de la mesma maneira que la palabra pertuesa “gladíolo” ou até francesa “glaïeul”tamien fazen parte de la mesma família que la palabra “gládio” de l lhatin “gládius” (Neste caso, la palabra designa ua spada curta).
Mas custa a eimaginar ls gladiadores de la Roma Antiga por eisemplo cumbater até a la muorte por bezes cun essas “spadanas”... a nun ser que le fússen oufrecidas depuis als bencedores.
Quien sabe ?
..."spadanhas"...
La spadanha eisiste por l termo i ye aparecida cun l lírio, na fuolha. L nome ben mesmo de la fuolha que ye a modos que ua spada.
Ls "gladíolos" son l que tu mos mostreste i son de la familhia de las spadanhas i de ls lírios.
Ana si que sabe de froles i hai que atender ne l que eilha diç.
You solo screbi para bos dezir que las bi pul campo, anque la frol seia mais pequeinha, mas ye linda na mesma.
Enviar um comentário