L cabanhal i l Santo
Falando de Senhora de l Resairo, inda faltou dezir que hai muitos que le chámam L San Marcos. Nun bos sei splicar muito bien porquei, ne ls comentairos subre la fiesta de la Lhuç, you peç que antandi que tamien hai quien le chame l San Marcos, nun sei se se poderá meter todo na mesma cesta.
An San Pedro, há de haber de ser por bias de ua eimaige de l San Marcos que stá pintada nun cabanhal ancostado a la eigreija, esta eiqui anriba.
Assossego-bos yá: l buosso cumputador nun stá derramado, isso que bedes na cabeça de l Santo ye mesmo l que stais a pensar - cuornos!
Tamien nun bos sei splicar porquei stá l San Marcos repersentado cun cuornos na cabeça, más balie haber stado queto, mirai que serbiço, poner-me a screbir para apuis nun dezir nada, l que bal ye que tengo cunfiança na pacéncia que teneis para me aturar!...
Assi i todo, inda sei ua cousica: rapaç que se case na Senhora de l Resairo - ó San Marcos - nun se scapa sien le dar un beijico ne ls cuornos al Santo, diç que ye remédio santo (neste causo será mesmo santo!) para que ls ditos anfeites nun le náçan a el na cabeça.
You nun sei se dá resultado ou nó!
L que si sei ye que, mesmo nun se fintando muito na ouparaçon, nun hai pimpon que se negue a dar eilhi dous beijicos bien dados... cumo you que fura, causo me houbira casado alhá, tamien nun habie de ser manco!!...
Bós bien bedes, nestas cousas, ye cumo la cuonta de las bruxas, you nun acredito, mas nunca se sabe, ye melhor perbenir que apuis andar de calças na mano a remediar, i cumo diç l outro, anda que mal nun ha de fazer!
5 comentários:
Buonas Turtolha ! Inda ando purqui... las bacanças desta beç son mui lhargas inda bien !
San MArcos caie nal 25 d'Abril... la Lhuç caie nal ultimo deimingo dal mes... muitas bezes calha al ultimo deimingo ser tamien al die 25....
Assi que la Lhuç i San Marcos ye la mesma cousa.
Bien Miranda sta algo muorto... aqueilhes nabos fechoran al resta déiducaçon... ye melhor que buolbe pra Cicuiro
anté...
Buonas nuites,
Á Tortulhas, achei tan antressante essa tradiçon de ls cuornos de San Marcos, an San Pedro, que nun registi a saber de cousas aparecidas na anternete. Ne ls Açores parece que hai ua questume bien antressante, que serie de ourige flamenga. Eiqui deixo ua resumida çcriçon para poupar trabalho:
«Um curioso apontamento das cinco ilhas mais aconchegadas, São Jorge, Faial, Pico, Flores e Corvo, onde predominou a colonização flamenga, é a festa de São Marcos, patrono dos maridos que não podem contar com a fidelidade das mulheres.
A 25 de Abril arma-se em determinada casa um altar, tendo ao alto um corno ou uma coroa de cornos com apropriada ornamentação. A Irmandade de São Marcos, que de tal festa se ocupa, é composta por homens casados, que não devem afronta a suas mulheres. Durante o dia festivo não falta quem se encarregue de chegar à rua, tentando convencer aqueles que vão em seu caminho a vir beijar o corno. Com os protestos indignados dos que não aceitam o convite, começa a galhofa.
À noite, realiza-se a procissão com a coroa levada sob um lençol em forma de pálio, em que a raspa de corno faz as vezes de incenso. Por entre berreiro ensurdecedor, vai procurando as ruas e parando diante de certas casas de seguro ou suposto motivo.
Aqui reside o maior interesse desta desusada festarola, quando as mulheres vêm à janela, em destemperado palavrório, defender a honra dos maridos e insultar os que vão no préstito.»
Adonde ye que ls de San Pedro eirien a saber de tan guapa tradiçon? You, por mi, nunca habie oubido falar de nada desso i gustei muito de saber.
Un abraço,
Amadeu
Olá, Tortulhas.
Bem interessante esta tradição.
Mas o que pensam as mulheres dela?
Não terá havido nenhuma moça a sentir-se ofendida com o rapaz que foi beijar o corno?
E não pode haver o efeito inverso? A moça pensa "o desgraçado não confia em mim, espera aí que lhe darei razões de desconfiança".
Um abraço.
Anton puode ser que ua mulhier bos ajude tamien a antender alguas cousas...
Porque nun bos lhembrestes, bós que todo esso antressa tanto, de la relaçon possible tamien cun la lienda de ourige céltica de Tristan i Eisolda que remonta al seclo IX ?
Reparai que de la Flandres (i de ls Flamiengos açoreanos de que falou, Amadeu, por cunseguinte) a la Eirlanda (La ilha adonde decuorre ua parte de ls eipisódios cuntados nessa lienda mediebal) ye solo un passico (de barco) i parece que nessas tierras de Miranda nun fáltan tamien tradiçones de ourige céltica trazidas probablemente tamien puls trobadores que benírun para la Península ne l tiempo de la Recunquista i de ls purmeiros reis de Pertual (de la dinastie de Borgonha cumo sabeis todos), traiendo palabras nuobas mas tamien liendas cumo aqueilhas de ls cabalheiros de la Tábola Redonda ...
Naide se squeciu de la stória:
“Tristan, baliente guerreiro i sobrino de l rei Mark (Marco, Marcos i Marc an francés), rei de Cornuales na Bretanha Armórica, bai até a la Eirlanda a saber de Eisolda para que eilha se case cul sou tio. Antretanto, ne l camino de buolta, ls dous bében ua poçon maigica que faç cun que ls dous se apaixónen perdidamente...”
Mas an Pertual cumo an muitos países, i yá na Eidade Média, sabe-se bien tamien que la Eigreja recuperou todas essas liendas i tradiçones, antegrando-las... mas diabolizando tamien, cumo podeis notar nessa eimage de san Marcos, ende an San Pedro, esso que alguns cháman “adultério” i outros “fornicaçon”...
Cumo puoden ber, yá stamos bien loinge de la lienda i de la poesie curtesa de ls rumanses mediebales …
Será que l pobo ganhou cun esso antretanto ?
« Encuntre tuiz engins d'amur ! »
(Contra todas las armadilhas de l amor...! )
Tomé de la Anglaterra, trobador anglo-normando de l seclo XII, outor de l poema Tristan.
Esta stória nun deixa naide andefrente. Pudera!... se cun simples giesto, se pude bibir l restro scansado que la mulhier nun nos pon ls palitos, Ora!...Ora!..., até l Santo nun scapou.
Un abraço
Válter
Enviar um comentário