Un die destes, chegou-me a las manos un cachico de un testo que you cuido que puode tener algun anteresse partilhar cun bós. Fui screbido por un tal Ferreira Fernandes, ne l Diário de Notícias, yá an Febreiro atrasado. Yá fui copiado nun blogue - por adonde a mi me gusta dar siempre ua boltica, de maneira que l requemendo - i puode ser bisto eiqui. Cumo fala de l Nino Jasus de la Cartolica i de un tiu de gorra que scribe ne l Público, lhembra-se-me que tamien cabe eiqui an las Froles.
Reza assi:
"Pandora yera pimpona, ambudou Epitemeu, i yera curjidosa, abriu la caixa que l amigo tenie scundida. Maldiçon, stában alhá to ls males. Isso fui ne l tiempo de ls gregos. Agora, paízes de l'Ounion Ouropeia recoincírun la Caixa de Pandora. Çtapado l Kosobo, porque nó Miranda de l Douro? Respondo: porque aquel tiu de gorrica que scribe to ls quinze dies ne l Público an Mirandés ye un home atilado, i nun eisige la andepandéncia de l Nino Jasus de la Cartolica. Quando nó..."
Nien que you me ponga eiqui a boziar, l senhor Ferreira Fernandes nun será capaç de me oubir, mas, assi i todo, inda deixo eiqui tamien dous recadicos:
Purmeiro: se fur perciso ir a un tribunal a jurar que l tal tiu de gorrica de l Público ye un home atilado, cuntai tamien cumigo para assegurar ua bara de l palário;
Segundo: la andepandéncia que l Nino de la Cartolica querie yá quantá que la tubo, nien andou El de spada alhebantada po'riba de las muralhas de l castielho para outra cousa!...
2 comentários:
L tio de la gorrica que scribe, y muito bien ne l “Público” yé aqueila pesona que nos habituamos ber chena de cumbicçons y que muito tien dado y lhutado pu la lhéngua que lo biu nacer. L tio que cun gorica ou sien gorrica nos tie ampurrado p ala frente cun mui antusiasmo,crer e saber. Aqueilhe retratico incunfundible que o adentefica y que a mi me fizo alhembrar mius tiempos de garotico, nua assaige de la mye bida y que you referi nun testo cumo aluno de l mirandês an Corroios. Pa l .tiu de la gorrica un abraço amigo.
Buonas nuites,
1. Oubrigado amigo Tortulhas por te çponeres a ir a tribunal. Spero que nunca seia perciso.
Mas mira a ber se nun t'anganhas. Ye que hai un dito mirandés que diç: «home de gorra, home de porra». You nun l chego a antender mui bien, mas será que diç algo de buono?
Yá l Cartolica, esse nun hai pai par'el.
2. Ye un gusto ber a Zé Ventura porqui a botar palabra, que yá muito tiempo que nun aparecie. Beni mais bezes, que fazeis muita falta i ye siempre buono sentir porqui l oulor i la fuorça de Caçareilhos.
Muto oubrigado pulas buossas palabras.
Bamos anton palantre, cula ajuda uns de ls outros, que la soledade ye ua cousa mala, i un quadrilha siempre mos animamos uns als outros, tal i qual cumo era datrás na segada: un mete-se al suco, antre rabechero i manijero, i ten que andar.
Abraços,
Amadeu
Enviar um comentário