Cumo nace un paradigma

Dua beç, uns ciantistas punírun cinco macacos nua gueiola, cun uas scaleiras ne l meio i un munton de bananas a la punta de riba.
Siempre que un de ls macacos chubie las scaleiras para acaçar las bananas, ls ciantistas botában-le uns lhatos de auga frie als macacos que quedában ne l chano. Apuis de uns tiempos, siempre que un de ls macacos spurmantaba a chubir las scaleiras, ls outros anchien-lo de porradas. Passados más uns dies, niun de ls macacos se astrebie a chubir las scaleiras, inda que la tantaçon de las bananas cuntinara alhá riba.
Anton, ls ciantistas trocórun un de ls macacos. Stá buono de ber que la purmeira cousa que l nobato fizo fui chubir las scaleiras camino de las bananas, mas tamien nun custa a adebinar que ls outros le dórun ua túndia baliente. Apuis de uas coças, l nobato nun tornou a spurmantar a chubir.
Un segundo macaco fui trocado, pus claro que tamien las lhebou buonas quando se le antolhórun las bananas, i hai que dezir que l que staba alhá hai menos tiempo nun yera l que daba menos.
Trocórun l terceiro macaco, l quarto i siempre la mesma stória. Trocórun anton l redadeiro macaco i quedórun cun ua quadrilha de cinco macacos que nunca habien spurmantado l banho de ls lhatos de auga frie.
Assi i todo, nun faltában las túndias siempre que un deilhes ponie ls pies na scaleira de baixo.
Manginando que le pudíramos procurar als macacos porquei las dában al que se atantaba a chubir, cumo quiera que la respuosta serie: Nun sei… eiqui siempre se fizo assi!...
Isto cun macacos, que son bichos spiertos! Manginai se fúran homes!... que yá Einstein dezie que ye más fácele zantegrar un átemo que un precunceito.
A mi lhambrou-se-me esta stória de ls macacos, un die destes, al ler ne l jornal que ls garotos de trés anhos, an média, dezien “porquei” uas 150 bezes por die.
Pena ye que, apuis cun ls anhos, se mos baia tirando essa manha.