05/05/08

La Senhora




Nun son todas que ténen un retábulo desta culidade


Mesmo podendo parecer que you ando a fazer la boulta turística Mariana de l cunceilho, nun quiero deixar de bos lhembrar que onte fui la fiesta de Nuossa Senhora de l Resairo, ne l termo de San Pedro, eilhi cerquita de las minas de Santo Adrian.
Subre la fiesta i subre l santuário you nun tenerei muito que dezir: podie ampeçar por çclarar que ye l santuário más formidable i más guapo destes trés cunceilhos, mas isso serie cumo dezir que l sol almeia!... i apuis tamien, dando-le you eiqui muitos agabones, inda pori quedábades a pensar que, an se tratanto de San Pedro, you sou un cachico tandancial. Ora isso nun ye berdade: quando se trata de San Pedro you nun sou un cachico tandancial, you sou cumpletamiente tandancial, fechado de todo, chapado, l que quejirdes.
Para ls de San Pedro, topáren-mos na Senhora de l Resairo ye cumo topáren-mos na alma, mas isso cuido que solo l poderá antander bien quien yá se le arrepiçórun ls pelos quando las eimaiges - la de San Pedro i la de la Senhora - se azinólhan ua an frente de la outra durante l Ancontro, na purciçon a la chegada. Ls padres quieren acabar cun isso, dízen eilhes que nun ten jeito niun fazer un ancontro antre dues eimaiges que reperséntan l mesmo... bien anganhados andamos nós todos, anton, durante estes redadeiros cientos de anhos an que la purciçon se fizo... nun me parece que serie assi tan mal mirar para esse ancontro cumo la repersentaçon de l nuosso ancontro cun nós mesmos, buona falta mos fai a las bezes, i sítio garanto-bos-lo you que nun puode haber más buono...
Para nun me sticar muito, nun seia pori que me acúsades cun rezon de yá star cun la tal tandéncia, amostro-bos solo dous ou trés retraticos, para bos aguçar la curjidade, digo-bos que la fiesta ye to ls anhos ne l purmeiro demingo de Maio, mas an Maio podeis alhá ir nun die qualquiera, se las scobas i las xaras stubíren an frol, de certeza que anté bos arrelhampais!...
Solo más ua cousica: se inda nunca ponistes ls pies na Senhora - an San Pedro nun ye perciso dezir que ye de l Resairo, nun hai outra - se inda nunca alhá punistes ls pies, anton, nun andeis por ende a dezir que sabeis bien l que ye la belheza, que anganhais las pessonas... i l pior ye que bos anganhais a bós mesmos!...

1 comentário:

Amadeu disse...

Buonas nuites,

Essa de dues santas se azinolháren ua delantre de la outra yá iba dando porrada cul padre an Sendin. L argumiento de padre ye l mesmo i la cousa até apareciu na telbison i dou ourige a decison de l bispo i todo.
An Sendin las santas son la N. S. de ls Remédios i la N. S. de l Rosairo. I esse azinolhar dá-se na 5ª feira santa, cuido you.
Sei que l padre ye contra de modo que nun sei se inda se faç ou cumo stá la cousa.

Adonde queda essa capielha tan guapa, ye mesmo an San Pedro ou ne l termo? I cumo le cháman? I la fuonte que pones ne l retrato a botar auga, que ten eilha a ber cula capielha i cul san Marcos ou la Senhora? L caramono de l San Marcos de l cabanhal parece bien feito, sabe-se quien fui l pintor?

Bá, çculpa tanta pregunta.
Un abraço,
Amadeu