«Ende, cada un fui para sou lado, todo de camboio. You i tiu Agusto Friscal fumos para Gueugnon, que ye ua cidadica acerca de Lion. Fui para ende porque stában alhá ls Francos, l Jesé, l Agusto i l tio. Mas tiu Agusto Friscal lougo se fui para Paris, que tenie alhá un armano. El era soldador, de haber stado antes an França, i fui-se pa l sítio adonde yá habie trabalhado. Era buono andar cun el que falaba un cachico de francés. An Gueugnon l trabalho éran altos fornos, ua fábrica mais grande que Sendin, que até un camboio andaba alhá andrento. La guerra inda staba bien biba por aqueilhes lados, todo inda mui queimado, que inda pouco mais dun anho se habie acabado. Mira tu que nessa fábrica inda trabalhában alhá arrimado a 500 almanes prejoneiros. You tenie 26 anhos i nunca habie trabalhado sien ser na tierra. Aqueilho todo metie un cacho de miedo, mas nunca me quedei.»
(cuntina)
3 comentários:
Acradito que la personaige de la sue stória (Sou pai, nun ye berdade, Amadeu ?) tenga ancuntrado an Gueugnon “altos fornos, ua fábrica mais grande que Sendin, que até un camboio andaba alhá andrento”...
L artigo dedicado a essa “cidadica” situada a pouco mais de 100 kms de Lyon (hoije cun ua populaçon de 9000 habitantes mas que yá chegou a atingir 11 000 an 1975) na Wikipédia ye l mais cumpleto an francés i hai alhá anformaçones que permíten antender an que cuntesto esses Sendineses i ouperários de outras nacionalidades tamien (Eitalianos por eisemplo yá que la Eitália nun queda mui loinge) fúrun aceites sien grandes problemas para trabalhar naqueilha einorme empresa siderúrgica que se iba a tornar ne ls anhos cinquenta i sessenta la maior de l mundo na produçon de aço einoxidable chegando a tener até 3750 ampregados.
Nesse artigo de la Wikipédia, hai todo un artigo antitulado “ Gueugnon pendant la Seconde Guerre mondiale » (Gueugnon durante la Segunda Guerra Mundial) an que splícan, antre outras cousas amportantes, que fui an Junho de 1940 que fui anstalada pul eisército alman la « Kommandantur » mesmo delantre de ls fornos (« face aux forges de Gueugnon »)...
I depuis ne l capítulo seguinte, depuis de la guerra : “la reprise économique appelle un énorme besoin de main d’œuvre, de constructions habitables, scolarisation, d’urbanisation de type social. ». L adjetibo « énorme » nun debe de ser eisagerado.
I inda ne ls anhos sessenta (ne l capítulo «L’âge d’or et la domination mondiale des Forges ») : « L’usine embauche à tout va et des milliers d’emplois induits sont créés dans les entreprises de sous-traitance qui gravitent autour de l’usine de Gueugnon mais également dans les entreprises du bâtiment et de l’artisanat local. Les Forges vont atteindre 3 750 salariés au début des années soixante. »
Será neçairo traduzir para antender an que cuntesto sou pai, Amadeu, bino el i outros Pertueses dessas tierras de Miranda para aqueilhas tierras de l departamento do Sâone-et-Loire, quaije ne l centro de la França, para essa cidadica “Gueugnon” que quedaba durante esse período negro que representou la Segunda Guerra Mundial a solo quinze quilómetros de la linha de demarcaçon antre la zona Libre a Sul i la zona Oucupada a Norte ....?
Oubrigado, Amadeu, por mos cuntar la stória desses nuossos cunterráneos que tamien se screbiu por aqueilhas tierras, alhi para ls lados de Lyon. You, para le dezir la berdade, inda nunca stube nessas cidades mas aprobeitei agora para saber un cachico mais subre cousas que son amportantes... Talbeç até mais amportantes que aqueilho que se oube muitas bezes a perpósito de Gueugnon por eisemplo i de sue la eiquipa de futebol que siempre fui afamada...
Buona cuntinaçon anton. Ye amportante cunhecer esta stória que mos cunta i que tamien faç parte antegrante de la Stória, essa bien cruel por bezes.
Solo mais ua cousa.
Ye na Borgonha que se situa tamien Gueugnon.
Yá mais dua beç acunteciu neste site falarmos ou eibocarmos ls purmeiros reis de Pertual que éran reis de la dinastie de Borgonha por bias de l pai de D. Fonso Anriques que era nieto de Roberto I°, duque de Borgonha.
Mas será que ls Sendineses que fúrun a ganhar la bida an Guegnon nessa segunda metade de ls anhos quarenta desse seclo yá passado habien chegado a studar todo esso na scuola an Sendin ou até depuis ?
Será demais dezir que çcunfio que nó ? Ou será que m’anganho ?
Cumprimentos.
Buonas tardes, Ana,
Bien haias por todas essas anformaçones.
Si, la pessona que cunta la stória na purmeira pessona ye miu pai. Todas las palabras que scribo son del, todo sin tirar nin poner tal i qual cumo el cuntou. You solo le dei ua orde al que el me fui cuntando. Muitas bezes la mimória yá nun ajuda.
Cumo el fúrun muitos outros nesse tiempo apuis la 2ª Guerra i noutras alturas. Ye ua houmenaige nun deixar que todo esso se squeça.
Ouxalá outras pessonas mos puodan traer assi outras cuontas. Son cuontas simples, cumo las pessonas que las dízen, mas siempre mui eimotibas i a las bezes dramáticas ou até trágicas.
Un abraço,
Amadeu
Enviar um comentário