9º anho an Mirandés

Ls que teneis un lhápeç a la mano fazei ua ruodra an bulta de l die 9 de Junho de 2009, que bai a ser un die amportante pa la stória de la nuossa lhéngua.
Albertina de São Pedro i Luís Silva ban a fazer (AN LHÉNGUA MIRANDESA) l Júri de Certeficaçon de l sou Porcesso RVCC (Recunhecimiento, (V)Balidaçon i Certeficaçon de Cumpeténcias ne l CNO (Centro Nuobas Ouportunidades) de l Anstituto Piaget, an Macedo de Cabaleiros, que le dará dreito a un certeficado de habelitaçones, para to ls eifeitos, eiquibaliente al 9º anho. L júri sera ourientado pul porsor Amadeu Ferreira, que you çcunfio que ye un tiu de que bós yá oubistes falar.

Pus claro que queda tod'mundo cumbidado, diç que yá somos tan poucos, mal será que se encha la casa!...
L Porcesso RVCC ye ua de las maneiras de las pessonas tenéren un certeficado ou diploma drento de las Nuobas Ouportunidades. Trata-se de zambuobar un portefólio, adonde quéden spelhadas las bidas de las pessonas: l que bibírun, l que daprendírun, l que sáben fazer, para que le poderá serbir i cumo poderán alhargar esses saberes. L porcesso acaba-se cun l Júri de Certeficaçon, adonde esses trabalhos son apersentados. Quien quejir saber más, poude antrar, cumo tal, eiqui.
Yá miles de pessonas fazírun este porcesso, mas ls nobidade cun Albertina i Luís ye que l sou porcesso fui todo zambolbido an lhéngua mirandesa, l sou portefólio stá todo screbido an Mirandés i l sou Júri de Certeficaçon tamien bai a ser an mirandés, de maneira que se puode dezir que ye l purmeiro certeficado/diploma passado pul sistema de ansino pertués tenendo cumo sustentaçon solo la lhéngua mirandesa, ou, dezido duma maneira más simples, Albertina i Luís fazírun l nono anho an Mirandés.
I peç me que nun será abuso dezir que, para alhá de la certeficaçon de las pessonas, tamien ye l mirandés quien bai a ser certeficado, cumo lhéngua de tanto balor cumo las outras, seia pa l que fur, seia para cerrar l portielho, seia para ir a scuola.
Fui un porcesso lhargo, hai más de un anho que ándan nisto (quando hai quien faga l porcesso an 2/3 meses) i hai que dar ls parabienes a quien ls merece: a la ANQ (Agéncia Nacional para la Qualificaçon, que ye la chefa de todo l que respeita a las Nuobas Ouportunidades), que tubo la coraige de outerizar este porcesso; al Anstituto Piaget, por haber apostado ne l mirandés i saber andar delantre de ls outros ne l que respeita a zambolbimiento i ansino; i, an special, a Albertina i a Luís, estes dous “boubicos” mirandeses, por habéren puosto de pies más este “menhir” ne l camino yá tan lhargo de l mirandés, sien miedo que l cielo le caíra anriba de la cabeça!
Ah, i yá se me iba squecendo de l más amportante: Albertina i Luís son de San Pedro, bandita tierra que bota assi fruitos destes, quando ls outros ban cun l trigo, yá eilhes bénen cun la farina.