Die de ls ninos

Hoije ye l die que se comemora l die de ls ninos.
Nun ye perciso star mui atiento i lhougo se dá pur eilha, ls jornales, rebistas, anstituiçones de l Stado , Outarquies, telbisones i rádios, ende stan l mais deilhes há ber se queda an purmeiro, bien a la bista de todos, mesmo que las sues antençones nun pássen desso mesmo, amostrar-se i nun perder l andar de la carruaige.
La houmanidade ten destas cousas, cria i spalha pulas quatro squinas de l mundo l die de ls ninos, cumo cria outros dies de nomeada, i loinge de mi star acuontra tales cousas, sei antender l balor i l poder de l eifeito que ténen an todos nós cumo sineta pa la cuncéncia andebidual i coletiba.
Nunca ye de mais tener estes dies de nomeada, son buonas ouportunidade para se falar, screbir, dibulgar, pormober i refletir ne l muito que hai que fazer, ne ls porblemas pur resolber, nas cegueiras, zmanchos, stropies que amponemos cumo sociadade prouista i ambejosa. Ls ninos son património dun balor sagrado, que mos ye mui querido, nun debe ser cun meias quartas que debemos custruir al redror deilhes un mundo falso nien un babonal d’ancertezas, ye neilhes que se debe poner to l ampeinho, fazer to l sfuorço i apostar sien pedir nadica.
Mesmo balorizando estes dies de nomeada, muitas son las bezes que çcunfio i de muitos que ls pormóben, porque este campo ye un portielho scancelado para antrar todo l que hai de bien i de mal, muitos son ls que scarranchados an fartura, açagando l que ténen i nun ténen, l deilhes i de ls outros, nestes dies bénen lhampeiros a terreiro i sien scárnio nanhun, dezir que stan de coraçon abierto quando yá hai muito ampenhórun l’alma al diabro i stan chafurdados de bergonha i sploraçon.
I manhana, será que muito de la houmanidade nun stá de cuosta biradas cumo l fizo onte i trasdontonte, será que que nun bira la cara quando passar na squina de la sue rue i bir un nino çuzío i znudo, será que nun bota uas baboseiras i fai cumo Pilatos quando tubir nuobas de que pur esse mundo afuora hai mais ninos a morrir-se çcanzilados pula guerra i la fame ampuosta pula ganáncia de gobernantes de Stados poderosos?
Biba este die que se comemora l die de ls ninos, para que l menos aqueilhes que lo tubíren cumo fiesta, l sou sprito medre sano i puro, na spráncia de que l die de manhana seia buono para to ls ninos de l mundo. I todo l de malo que hai hoije subre eilhes, seia aricado cumo son las serralhas dua sementeira que se quier lhibre i bien granada.