Naide stá arriba

Yá muitas bezes l dixe, este sítio para alhá de to las birtudes que ten, ten sido para mi un spácio adonde tengo spabilado l mirandés screbido i dado lhargas a las mies eideias.
Tengo dito l que me bai n’alma cun respeito i botado oupeniones subre muitas i báriadas cousas.
Ye l que bou fazer agora
Diç l pobo que, mal daquel que mira só pa l sou ambelhigo. Quienquiera ten dreito a pensar, ser i fazer l que bien le dir na gana, çque respeite ls percípios de la lhibardade, naide ten haber cun isso, mas se fur associado dua Associaçon yá nun ye bien assi. Fui siempre assi que antendi l associatibismo, i mais se ls sous oujetibos son la pormoçon cultural i mantenença de ls questumes i tradiçones que son teneres de todos.
I l pobo nun s’anganha, pior inda ye se un associado se squece de l cuorpo (un modo de dezir) de l’Associaçon, que son ls associados i solo bei l del.
Seia qual fur, perteneça ou nó als Uorganos eileitos, faga muito ou nun faga nada, steia anscrito hai muito tiempo ou pouco, bielho ou nuobo, tenga çponiblezado muito ou pouco tiempo a essa Associaçon, debe tener siempre an cunta la fin pa la qual fui criada i l deseio i antresse coletibo, deixando de lhado l andebidual.
Pur outras palabras, l querer dun solo ten balidade se tubir siempre an cunta l querer de ls outros que cun el s’ounírun, la causa quemun, a nun ser assi puode ser antendido cumo un ato prouista, un deseio de pormoçon i querer colher maduro, querer chubir na scaleira social i quedar bien bisto culs amigos. Ancarrapitar-se nó por tener balor mas si porque ten l’Associaçon cumo rodriga.
I se todo esto ten que ser lhebado cun rigor por todos, mais ten que ser culs associados eileitos pa ls Uorganos, puis estes ténen deberes eilebados ne l que fázen, dében dar l eisemplo para que la bida de l’Associaçon seia saludable i un lhugar adonde todos se síntan bien.
To ls associados son eiguales, ne ls dreitos i deberes, tenga repunsablidades de xefie ou nun tenga.
La maior birtude, quando se quier bien ua Associaçon ye saber l que ls associados quéren, cumo pénsan i l que deséian. Fazer cousas, mesmo que essas cousas séian bien feitas se nun fur de la buntade desse coletibo, nun acrecéntan nada al sprito associatibo.
Ua Associaçon debe ser ua casa sien baranda, cua sola debison i muitas jinelas.