Quando m’agarro al teclado de l cumpotador para screbir ua cuonta ou fazer un zabafo, puode lhebar tiempo mas quaije siempre sal l que quiero, que you me lhembre, ralas fúrun las bezes que l’eideia se zbiou para outro lhado.
Mas yá nun puodo dezir l mesmo de l sentido, l mais de las bezes nun sou capaç de l pear, mete trote cumo mula de peleiro.
Un de ls mius bícios ye salir de casa to las manhanas, dar ua spreitadela pulas fuolhas de ls jornales i rebistas, ye çfaçateç i queda feio mas que se bai a fazer, que abúndan çpinduladas pulas squinas de las rues i aporbeito para zantulhir las canielas, andando un cachico. I ye ende que l sentido aporbeita i scapa-se para loinge, bagabunda cumo pelegrino pur caminos.
Hoije dei cul pula ancruzilhada de las dúbedas.
You medrei nua família que tubo siempre l cuidado de scolher buns modos, cumo se fai nas lheiras de las huortas, arrincado las yerbas malas que podien atafanhar l crecimiento de ls filhos. Se nun dou buns fruitos la culpa nun fui deilha. L respeito i buns modos éran untados por bias de las dúbedas de crecéren sanos cun cunta i medida. La buona i merecida eiducaçon que debemos dar i tener puls outros nunca fizo mal a nadie, fui assi que m’ansinórun. Poner a la mesa las patatas, l pan i la chica nun bonda, ua família ten que ser mais, ten que ser bibeiro de balores.
Dá l pan mas tamien l’eiducaçon
Nua manhana bien armana destas d’agora, yá alhá ban muitos anhos, miu pai botou-mos fuora de la cama bien cedico, todos de patarras, çadas, çadones i palas al ombro alhá fumos pa la cortina de la Barreira. Riscanhou l chano i assi marcou l sítio de l galaton que teniemos que fazer para cortar las raizes (eiqui malas) de ls freznos que mos assobedában l patatal.
Cortadas que quedórun las raízes, l patatal medrou berdejante i alhá colhiemos un baliente carro de patatas.
Cumo you gustaba agora i porqui fazer balientes galatones, galatones que cortássen pula raiç, la falta de respeito que hai puls mais bielhos i strupiados, puls probes i sien abrigo, puls trabalhadores i hounestos, pula cultura i tradiçones, pula família struturada i de balores, pula natureza i falta de lhimpeza, pur ua buona eiducaçon i scuola de feturo.
Chego a pensar que zapeórun tanta la cousa que yá nun hai galatones que mos bálhan.
Mas la spráncia debe ser siempre la redadeira a muorrir-se, mesmo que las dúbedas séian de l tamanho dun termo.
Sem comentários:
Enviar um comentário