Ser ou nun ser chapuço

Muita cousa me quedou de hardáncia de família, nien you sei l balor cierto desse património, cumoquiera nien chegarei algun die a saber-lo.

De l bien i de l mal, tengo si la cuncéncia de que la mie família de brício i la tierra adonde naci fúrun i cuntínan a ser detreminantes ne l que fui i sou, nas scolhas i bibéncias culs outros. L modo i ne l tiempo que me criei, fúran cumo canhiças que m’amparórun pula bida afuora, ajudórun a çtinguir l bien de l mal, ls buonos de ls lhafraus.
Ye berdade que to ls dies daprendemos i tamien l modo de melhorar l que sabemos i fazemos, se percisamos de demudar algue i nun l fazemos ye porque nun tenemos ganas, to ls dies somos atores i regradores de l quelóquio de la bida.
I todo esto ben bien a perpósito de que nun son poucas la bezes que me dá ganas de dar uas buonas lhambadas a muitos, pul modo cumo fálan i de quien l fáien, cumo bótan las culpas de las zgráçias a quien nun ten culpa nanhua i stan siempre a botar lhérias i a dar barduadas naqueilhes que nun son capazes, nin ténen ua sola ouportunidade para se çfender. Palradores sabidos, l mal nunca fui feito por eilhes, bénden la mentira i calúnia cumo l fai l bendedor de l unto de queluobra nua feira, atrabéssan las temporadas cumo se nada fusse culs. To l mundo yá se dou cunta de la pouca bergonha que anda a la suolta pur ende, i nun falo só daqueilhes que cúçpen pa l chano que ye anojoso. Bater ne l pequerrico nun custa nada, botar las culpas ne ls que nun la ténen tamien ye fácele, sacudir l’auga de l capote ye moda que pegou.
Stá na hora de daprender a çtingir quien fai l mal, dua beç pur todas.
I para fechar bou a cuntar-bos ua cuonta.
An mie casa, quando me criei teniemos bacas pa la lhaboura i la criaçon deilhas, ganado de canhonas, perros i ua burra que mos daba muito jeito para muita cousa, era burra i pachorrenta se fusse giente dirie un paç d’alma, que série de nós garotos quando íbamos para Cabeça Gorda (chamadeiro de Zenízio)que queda nas marras d’Angueira (bien loinge)?
Muitas éran las bezes que estes bienes (andantes) stában todos juntos ne l termo i you i mius armanos quedabamos a tomar cunta, ua deilha l perro quemiu la nuossa merenda, spierto cumo era (puis sabie que habie feito mal) quando l chamaba para le dar uas biqueiras el nun se deixaba agarrar, fugie. Anraibado cumo staba de nun çcarregar ne l maniante quando a la nuite benie para casa, la mie bingança fui picar la burra, que nun tenie culpa nanhua i nien se çfendie.
Mui pai quando soubo de todo dixo-me, nun seias chapuço.
Se fui l perro que las fizo, nun debe ser la burra que las paga.

Quedou-me este ansinamiento, hoije antristece-me quando beio que son muitos ls que las págan quando ls outros las fazírun.