30/06/09

Carreirones de la bida

Puls carreirones que passei
Fui siempre als sulabancos
Lhebaba ls sapatos mancos
Muitas bezes atropecei
Nas silbas que ancuntrei
Lhebei algues picadas
Tamien passei pulas aradas
Anté se me anterraban ls pies
Fúran assi ls mius dies
Lhebando muitas, muitas patadas.

Miu Dius tanto remissaco
Tu me deste para passar
L que you puodo cuontar
Se nó que stou feito un caco
Quaije a caier no buraco
Stou ne l final de l carreiron
Cun tamanha cunfuson
Carreirones a tuorto i a dreito
Bibo assi deste jeito
Ne l meio de tanta cumplicaçon.

Miesmo assi bou passando
Por caminos i carreirones
Lhebando alguns ancontrones
De cousas que bou ancuntrando
Zilusones bou lhebando
Puls carreirones de la bida
Que assi ten sido bibida
Caindo eiqui caindo eilhi
Fui assi que you bibi
Ua bida maldita, mas debertida.

Passei por stradas i caminos
Cun tanto, tanto remissacos
Ancuntrei alguns buracos
Fúran estes la mius çtinos
Antregue als puderes debinos
Que ye perciso fé an Dius
Furan estes ls çtinos mius
Tapa eiqui çtapa eilhi
Ls mius carreirones fúran assi
Siempre., siempre mui frius.

Puls montes i puls cerrados
Tanhindo you las mies bacas
Era un rujier de matracas
Culs pies todos mulhados
Al lhume eram secados
Quando acendie algun piorno
Hoije guardo cumo adorno
Aqueilhas cousas passadas
Agora ye que son lhembradas
Quando todo stá yá morno

Tamien andube cun canhonas
I nien chequier eran mies
Fúran assi ls mius dies
Passei por cousas pimponas
Por esso you stou nas lhonas
Sien nada para cuontar
Apenas puodo recuordar
Cumo la cousa se passou
Ye por esso qu´eiqui stou
Aqueilhas cousas lhembrar.

Las bacas i las canhonas
Eran todas de miu pai
L que la bida mos fai
Para mos deixar nas lhonas
Calha-te alhá sou anzonas
Nun te steias a queixar
Nun t´adelantra reclamar
Que esse tiempo yá passou
Mas hoije you solo stou
Aqueilhas cousas recuordar.

Dizen que recuordar ye bibir
Por esso stou a recuordar
Nun me stou a queixar
Por eilhi nun puoder ir
Inda nun quiero zistir
Mas adonde ir you nun sei
Nunca antes eimajinei
Que houbisse tantos buracos
Fúran alguns de ls remissacos
Que pula bida you passei.

José António Esteves



3 comentários:

Tiégui disse...

Mas...mas quien fui que dixo ya qu'al mirandés nun tenie lhiteratura, han ?

Parabienes !

faustino.antao disse...

Dius mos deia buonos dies amigo José Esteves.

Cumo siempre, ls buossos scritos son berdadeiros teçtemunhos de bida.

Gustei muito, cuntinai

Até qualquiera die

Un abraço
Faustino

franciscobelharino disse...

Buonos dies José Esteves,

Mais ua beç botestes uns guapos bersos que son l retrato de tantos tius i ties que ende se criórun. Estes bersos son ua lhiçon de bida.

Un abraço,

francisco Domingues